Women’s ಟಿ20 ಪಂದ್ಯ; ದಕ್ಷಿಣ ಆಫ್ರಿಕಾಕ್ಕೆ  ಗೆಲುವು

Team Udayavani, Jul 6, 2024, 12:26 AM IST

ಚೆನ್ನೈ: ದಕ್ಷಿಣ ಆಫ್ರಿಕಾ ವನಿತೆಯರು ಭಾರತಕ್ಕೆ ಆಗಮಿಸಿದ ಬಳಿಕ ಮೊದಲ ಗೆಲುವಿನ ಸಂಭ್ರಮ ಆಚರಿಸಿದ್ದಾರೆ. ಮೊದಲ ಟಿ20 ಪಂದ್ಯದಲ್ಲಿ ಭಾರತಕ್ಕೆ 12 ರನ್‌ ಸೋಲುಣಿಸಿದ್ದಾರೆ.

ದಕ್ಷಿಣ ಆಫ್ರಿಕಾ 4 ವಿಕೆಟಿಗೆ 189 ರನ್‌ ಪೇರಿಸಿದರೆ, ಭಾರತ 4 ವಿಕೆಟಿಗೆ 177 ರನ್‌ ಹೊಡೆಯಿತು. ಇದಕ್ಕೂ ಮೊದಲಿನ ಏಕದಿನ ಹಾಗೂ ಟೆಸ್ಟ್‌ ಸರಣಿಗಳೆರಡನ್ನೂ ದಕ್ಷಿಣ ಆಫ್ರಿಕಾ ಕಳೆದುಕೊಂಡಿತ್ತು.

ಚೇಸಿಂಗ್‌ ವೇಳೆ ಸ್ಮತಿ ಮಂಧನಾ ಉತ್ತಮ ಫಾರ್ಮ್ ಮುಂದುವರಿಸಿ 30 ಎಸೆತಗಳಿಂದ 46 ರನ್‌, (7 ಫೋರ್‌, 2 ಸಿಕ್ಸರ್‌), ಜೆಮಿಮಾ ಅಜೇಯ 53 ರನ್‌ (30 ಎಸೆತ, 7 ಬೌಂಡರಿ, 1 ಸಿಕ್ಸರ್‌), ಕೌರ್‌ 35 ರನ್‌ ಮಾಡಿದರು.

ಬ್ರಿಟ್ಸ್‌, ಕಾಪ್‌ ಅರ್ಧ ಶತಕ
ದಕ್ಷಿಣ ಆಫ್ರಿಕಾದ ಸವಾಲಿನ ಮೊತ್ತಕ್ಕೆ ಕಾರಣವಾದದ್ದು ತಾಜ್ಮಿನ್‌ ಬ್ರಿಟ್ಸ್‌-ಮರಿಜಾ ಕಾಪ್‌ ಅವರ ಅರ್ಧ ಶತಕ. ನಾಯಕಿ ಲಾರಾ ವೋಲ್ವಾರ್ಟ್‌ ಮತ್ತು ಬ್ರಿಟ್ಸ್‌ ಮೊದಲ ವಿಕೆಟಿಗೆ 7.1 ಓವರ್‌ಗಳಿಂದ 50 ರನ್‌ ಒಟ್ಟುಗೂಡಿಸಿದರು. ಇದರಲ್ಲಿ ವೋಲ್ವಾರ್ಟ್‌ ಗಳಿಕೆಯೇ 33 ರನ್‌. ದ್ವಿತೀಯ ವಿಕೆಟಿಗೆ ಬ್ರಿಟ್ಸ್‌-ಕಾಪ್‌ 96 ರನ್‌ ಪೇರಿಸಿದರು. ಬ್ರಿಟ್ಸ್‌ 81 ರನ್‌ ಮಾಡಿದರೆ (56 ಎಸೆತ, 10 ಬೌಂಡರಿ, 3 ಸಿಕ್ಸರ್‌), ಕಾಪ್‌ 33 ಎಸೆತ ನಿಭಾಯಿಸಿ 57 ರನ್‌ ಹೊಡೆದರು (8 ಬೌಂಡರಿ, 1 ಸಿಕ್ಸರ್‌).

ಭಾರತದ ಪರ ಪೂಜಾ ವಸ್ತ್ರಾಕರ್‌ ಮತ್ತು ರಾಧಾ ಯಾದವ್‌ ತಲಾ 2 ವಿಕೆಟ್‌ ಉರುಳಿಸಿದರು.

ಸಂಕ್ಷಿಪ್ತ ಸ್ಕೋರ್‌: ದಕ್ಷಿಣ ಆಫ್ರಿಕಾ-4 ವಿಕೆಟಿಗೆ 189 (ಬ್ರಿಟ್ಸ್‌ 81, ಕಾಪ್‌ 57, ವೋಲ್ವಾರ್ಟ್‌ 33, ಪೂಜಾ 23ಕ್ಕೆ 2, ರಾಧಾ 40ಕ್ಕೆ 2). ಭಾರತ-4 ವಿಕೆಟಿಗೆ 177 (ಜೆಮಿಮಾ ಔಟಾಗದೆ 53, ಮಂಧನಾ 46, ಕೌರ್‌ 35).