Telangana;ಶಿಕ್ಷಕನ ವರ್ಗಾವಣೆ: ಹೊಸ ಶಾಲೆ ಸೇರಿದ 133 ಮಕ್ಕಳು!

Team Udayavani, Jul 6, 2024, 6:36 AM IST

ಹೈದರಾಬಾದ್‌: ನೆಚ್ಚಿನ ಶಿಕ್ಷಕರು ವರ್ಗಾವಣೆ ಆದರೆಂದು ಮಕ್ಕಳು ಅಳುವಂಥ ಭಾವನಾತ್ಮಕ ಸನ್ನಿವೇಶ ಗಳನ್ನು ನೋಡಿದ್ದೇವೆ! ಆದರೆ ತೆಲಂಗಾಣದ ಹೈದರಾಬಾದ್‌ನಲ್ಲಿ ಇದಕ್ಕೂ ಭಿನ್ನವಾದ ಅಪರೂಪದ ಘಟನೆಯೊಂದು ನಡೆದಿದೆ. ಸರಕಾರಿ ಶಾಲೆಯೊಂದರ ಶಿಕ್ಷಕರು ವರ್ಗಾವಣೆ ಆಗಿದ್ದಕ್ಕೆ ಆ ಶಾಲೆಯ ಬರೋಬ್ಬರಿ 133 ವಿದ್ಯಾರ್ಥಿಗಳೂ ಶಾಲೆ ತೊರೆದು, ಶಿಕ್ಷಕ ವರ್ಗಾವಣೆಗೊಂಡ ಶಾಲೆಗೇ ಸೇರ್ಪಡೆಗೊಂಡಿದ್ದಾರೆ!.

ಪೊನಕಲ್‌ ಗ್ರಾಮದ ಸರಕಾರಿ ಪ್ರಾಥ ಮಿಕ ಶಾಲೆಯ ಶಿಕ್ಷಕರಾದ ಶ್ರೀನಿವಾಸ್‌ (53) ಕಳೆದ 12 ವರ್ಷದಿಂದ ಆ ಶಾಲೆಯಲ್ಲಿದ್ದು, ಮಕ್ಕಳು ಮಾತ್ರವಲ್ಲದೇ ಊರಿನ ಗ್ರಾಮಸ್ಥರ ಮನ ಗೆದ್ದಿದ್ದಾರೆ. ಇದೀಗ ಆ ಗ್ರಾಮದಿಂದ 3 ಕಿ.ಮೀ. ದೂರದಲ್ಲಿರುವ ಅಕ್ಕಪೆಲ್ಲಿಗುಂಡಗೆ ಅವರು ವರ್ಗಾವಣೆ ಆಗಿದ್ದಾರೆ. ಈ ವಿಚಾರ ತಿಳಿಯುತ್ತಿದ್ದಂತೆ ಶಾಲೆ ಮಕ್ಕಳು ಅತ್ತು, ಕರೆದು, ಶ್ರೀನಿವಾಸ್‌ ಹೋಗದಂತೆ ಅಡ್ಡಗಟ್ಟಿದ್ದಾರೆ. ಆದಾಗ್ಯೂ ಅವರು ನಿಯಮ ಪಾಲಿಸಲೇ ಬೇಕು ಎಂದು ಹೇಳಿ ತೆರಳಿದ್ದಾರೆ. ಈ ಹಿನ್ನೆಲೆಯಲ್ಲಿ 1ನೇ ತರಗತಿಯಿಂದ 5ನೇ ತರಗತಿ ವರೆಗಿನ 133 ವಿದ್ಯಾರ್ಥಿಗಳು ತಮ್ಮ ಪೋಷಕರೊಂದಿಗೆ ತೆರಳಿ ಅಕ್ಕಪೆಲ್ಲಿಗುಂಡ ಸರಕಾರಿ ಶಾಲೆಗೆ ಸೇರಿಕೊಂಡಿದ್ದಾರೆ.