Hubli; ಗಾಂಜಾ ಮಾರಾಟ ಮತ್ತು ಖರೀದಿ ಮಾಡುತ್ತಿದ್ದ ಹತ್ತು ಜನರ ಬಂಧನ

Team Udayavani, Jul 12, 2024, 3:50 PM IST

ಹುಬ್ಬಳ್ಳಿ: ನಗರದ ಬೆಂಡಿಗೇರಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಶುಕ್ರವಾರ ಬೆಳಗಿನ ಜಾವ ಗಾಂಜಾ ಮಾರುತ್ತಿದ್ದ ಹಾಗೂ ಖರೀದಿಸುತ್ತಿದ್ದ ಒಟ್ಟು ಹತ್ತು ಜನರನ್ನು ಬಂಧಿಸಿ, ಅವರಿಂದ ಅಂದಾಜು 1.779 ಕೆಜಿ ಗಾಂಜಾ ಮತ್ತು 2 ಸಾವಿರ ರೂ. ನಗದು ವಶಪಡಿಸಿಕೊಂಡಿದ್ದಾರೆ.

ಅಖಿಲೇಶ ಯರಮಸಾಲ, ಆಂಥೋನಿ ಫರ್ನಾಂಡೀಸ್, ಕಿರಣ ಕುರಕುಂದಿ, ಮಹಾದೇವ ಮಜ್ಜಿಗುಡ್ಡ, ಪ್ರಶಾಂತ ಕಲಾಲ, ಅರುಣ ಕ್ಯಾರಕಟ್ಟಿ, ಲಕ್ಷ್ಮಣ ನಿಡಗುಂದಿ, ಫರಾನ್ ನವಲಗುಂದ, ಆದರ್ಶ ಯರಮಸಾಲ, ವಿಶಾಲ ಗಾಯಕವಾಡ ಬಂಧಿತರಾದವರು.

ಇಬ್ಬರು ಗಾಂಜಾ ಮಾರಾಟ ಮಾಡುತ್ತಿದ್ದ ಹಾಗೂ ಕೆಲವರು ಖರೀದಿಸುತ್ತಿದ್ದ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಬೆಂಡಿಗೇರಿ ಠಾಣೆ ಇನ್ಸ್‌ಪೆಕ್ಟರ್ ಮತ್ತು ಸಿಬ್ಬಂದಿಯು ದಾಳಿ ಮಾಡಿ, ಮಾರುತ್ತಿದ್ದ ಮತ್ತು ಖರೀದಿಸುತ್ತಿದ್ದ ಹಾಗೂ ಇವರಿಗೆ ಸಹಾಯ ಮಾಡಿದ ವ್ಯಕ್ತಿಗಳನ್ನು ಬಂಧಿಸಿ, ಗಾಂಜಾ ಮತ್ತು ಹಣ ವಶಪಡಿಸಿಕೊಂಡಿದ್ದಾರೆ. ಬೆಂಡಿಗೇರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.