Wimbledon ಕ್ವೀನ್‌;ಕ್ರೆಜಿಕೋವಾ-ಪೌಲಿನಿ ಪೈಪೋಟಿ

ಯಾರೇ ಗೆದ್ದರೂ ಮೊದಲ ಸಲ ಚಾಂಪಿಯನ್‌

Team Udayavani, Jul 13, 2024, 6:00 AM IST

ಲಂಡನ್‌: ಇಟಲಿಯ ಜಾಸ್ಮಿನ್‌ ಪೌಲಿನಿ ಶನಿವಾರದ ವಿಂಬಲ್ಡನ್‌ ವನಿತಾ ಫೈನಲ್‌ನಲ್ಲಿ ಕಜಾಕ್‌ಸ್ಥಾನದ ಬಾರ್ಬೊರಾ ಕ್ರೆಜಿಕೋವಾ ಸವಾಲನ್ನು ಎದುರಿಸಲಿದ್ದಾರೆ. ಕಳೆದ ರಾತ್ರಿಯ “ಆಲ್‌ ಕಜಾಕ್‌’ ಸೆಮಿಫೈನಲ್‌ನಲ್ಲಿ ಕ್ರೆಜಿಕೋವಾ 3-6, 6-3, 6-4 ಅಂತರದಿಂದ 2022ರ ಚಾಂಪಿಯನ್‌ ಎಲೆನಾ ರಿಬಾಕಿನಾ ಅವರನ್ನು ಮಣಿಸಿದರು. ಇದಕ್ಕೂ ಮೊದಲಿನ ಉಪಾಂತ್ಯದಲ್ಲಿ ಪೌಲಿನಿ ಕ್ರೊವೇಶಿಯಾದ ಡೋನಾ ವೆಕಿಕ್‌ ಅವರಿಗೆ ಸೋಲುಣಿಸಿದ್ದರು.
ಬಾಬೊìರಾ ಕ್ರೆಜಿಕೋವಾ ಕಾಣುತ್ತಿರುವ ಮೊದಲ ವಿಂಬಲ್ಡನ್‌ ಫೈನಲ್‌ ಇದಾಗಿದೆ.

ಈಗಾಗಲೇ 2021ರ ಫ್ರೆಂಚ್‌ ಓಪನ್‌ ಫೈನಲ್‌ ಗೆದ್ದು ಗ್ರ್ಯಾನ್‌ಸ್ಲಾಮ್‌ ಟ್ರೋಫಿಯ ಖಾತೆ ತೆರೆದಿದ್ದಾರೆ. ಗ್ರ್ಯಾನ್‌ಸ್ಲಾಮ್‌ ಡಬಲ್ಸ್‌ನಲ್ಲಂತೂ ಇವರು ಚಾಂಪಿಯನ್‌ ಆಟಗಾರ್ತಿ. ಈಗಾಗಲೇ 7 ಡಬಲ್ಸ್‌ ಪ್ರಶಸ್ತಿಯನ್ನು ಜಯಿಸಿದ್ದಾರೆ. ಇದರಲ್ಲಿ 2 ವಿಂಬಲ್ಡನ್‌ ಪ್ರಶಸ್ತಿಗಳೂ ಸೇರಿವೆ. 2018 ಮತ್ತು 2022ರಲ್ಲಿ ಕ್ಯಾಥರಿನಾ ಸಿನಿಯಕೋವಾ ಜತೆಗೂಡಿ ಚಾಂಪಿಯನ್‌ ಆಗಿದ್ದರು. ಈ ಎಲ್ಲ ಸಾಧನೆಯ ಲೆಕ್ಕಾಚಾರದಲ್ಲಿ ಕ್ರೆಜಿಕೋವಾ ನೆಚ್ಚಿನ ಆಟಗಾರ್ತಿಯಾಗಿ ಗೋಚರಿಸುತ್ತಾರೆ.

ಜಾಸ್ಮಿನ್‌ ಪೌಲಿನಿಗೂ ಇದು ಮೊದಲ ವಿಂಬಲ್ಡನ್‌ ಫೈನಲ್‌. ಹಾಗೆಯೇ ಸತತ 2ನೇ ಗ್ರ್ಯಾನ್‌ಸ್ಲಾಮ್‌ ಫೈನಲ್‌ ಕೂಡ ಹೌದು. ಕಳೆದ ಫ್ರೆಂಚ್‌ ಓಪನ್‌ನಲ್ಲೂ ಪೌಲಿನಿ ಪ್ರಶಸ್ತಿ ಸುತ್ತಿಗೆ ಮುನ್ನಡೆದಿದ್ದರು. ಆದರೆ ಇಗಾ ಸ್ವಿಯಾಟೆಕ್‌ಗೆ ಶರಣಾಗಿ ಪ್ರಶಸ್ತಿ ವಂಚಿತರಾಗಿದ್ದರು.

ಮತ್ತೆ ನೂತನ ಚಾಂಪಿಯನ್‌
2016ರಲ್ಲಿ ಸೆರೆನಾ ವಿಲಿಯಮ್ಸ್‌ ಪ್ರಶಸ್ತಿ ಉಳಿಸಿಕೊಂಡ ಬಳಿಕ ವಿಂಬಲ್ಡನ್‌ನಲ್ಲಿ ವರ್ಷಕ್ಕೊಬ್ಬರಂತೆ ಹೊಸಬರು ಚಾಂಪಿಯನ್‌ ಆಗುತ್ತಿರುವುದು ವಿಶೇಷ. ಗ್ಯಾಬ್ರಿನ್‌ ಮುಗುರುಜಾ, ಆ್ಯಂಜೆಲಿಕ್‌ ಕೆರ್ಬರ್‌, ಸಿಮೋನಾ ಹಾಲೆಪ್‌, ಆ್ಯಶ್ಲಿ ಬಾರ್ಟಿ, ಎಲೆನಾ ರಿಬಾಕಿನಾ, ಮಾರ್ಕೆಟಾ ವೊಂಡ್ರೂಸೋವಾ ಪ್ರಶಸ್ತಿ ಜಯಿಸಿದ್ದರು.
ಈ ಸಲವೂ ಹೊಸಬರ ಸರದಿ. ಜಾಸ್ಮಿನ್‌ ಪೌಲಿನಿ, ಬಾಬೊìರಾ ಕ್ರೆಜಿಕೋವಾ ಅವರಲ್ಲಿ ಯಾರೇ ಗೆದ್ದರೂ ಮೊದಲ ಸಲ ವಿಂಬಲ್ಡನ್‌ ಕ್ವೀನ್‌ ಎನಿಸಿಕೊಳ್ಳಲಿದ್ದಾರೆ.