ರಿಲೀಸ್‌ಗೂ ಮುನ್ನವೇ ಟೊವಿನೋ ಥಾಮಸ್ ʼAjayante Randam Moshanamʼ ಚಿತ್ರಕ್ಕೆ ಕಾನೂನು ಕಂಟಕ

Team Udayavani, Jul 21, 2024, 4:45 PM IST

ಕೊಚ್ಚಿ: ಇತ್ತೀಚೆಗೆ ಮಾಲಿವುಡ್‌ನ (Mollywood) ಸೂಪರ್‌ ಹಿಟ್‌ ʼಮಂಜಮ್ಮೆಲ್‌ ಬಾಯ್ಸ್‌ʼ ಚಿತ್ರಕ್ಕೆ ಕಾನೂನು ಸಂಕಷ್ಟ ಎದುರಾಗಿತ್ತು. ಆದರೆ ಚಿತ್ರ ಎಲ್ಲವನ್ನೂ ಮೀರಿ ಬಾಕ್ಸ್‌ ಆಫೀಸ್‌ ನಲ್ಲಿ 100 ಕೋಟಿಗೂ ಅಧಿಕ ಕಲೆಕ್ಷನ್‌ ಮಾಡಿತ್ತು.

ಇದೀಗ ಮತ್ತೊಂದು ಬಿಗ್‌ ಬಜೆಟ್‌ ಸಿನಿಮಾಕ್ಕೆ ರಿಲೀಸ್‌ ಗೂ ಮುನ್ನವೇ ಕಾನೂನಿನ ತೊಡಕು ಉಂಟಾಗಿದೆ.

ಟೊವಿನೋ ಥಾಮಸ್ (Tovino Thomas) ಅಭಿನಯದ, ನವ ನಿರ್ದೇಶಕ ಜಿತಿನ್ ಲಾಲ್ ಅವರ ʼಅಜಯಂತೇ ರಂದಮ್ ಮೋಷನಂʼ(Ajayante Randam Moshanam)  ಈ ವರ್ಷ ಮಾಲಿವುಡ್‌ ನಲ್ಲಿ ರಿಲೀಸ್‌ ಆಗಲಿರುವ ಬಹುದೊಡ್ಡ ಸಿನಿಮಾಗಳಲ್ಲಿ ಒಂದು.

ಟೊವಿನೋ ಥಾಮಸ್ ತಮ್ಮ ವೃತ್ತಿಜೀವನದಲ್ಲೇ ವಿಶೇಷ ಸಿನಿಮಾವಾಗಿರುವ ಈ ಚಿತ್ರದಲ್ಲಿ ಅವರು ತ್ರಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ʼಅಜಯಂತೇ ರಂದಮ್ ಮೋಷನಂʼ  ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿರುವಾಗಲೇ ಕಾನೂನಿನ ಸಂಕಷ್ಟದಲ್ಲಿ ಸಿಲುಕಿಕೊಂಡಿದೆ. ಚಿತ್ರದ ಫೈನಾನ್ಷಿಯರ್ ಒಬ್ಬರು ನಿರ್ಮಾಪಕರ ವಿರುದ್ಧ ದೂರು ದಾಖಲಿಸಿದ್ದಾರೆ.

ಎರ್ನಾಕುಲಂನ ಡಾ. ವಿನೀತ್ ಚಿತ್ರದ ನಿರ್ಮಾಣ ಸಂಸ್ಥೆ ಯುಜಿಎಂ ಮೂವೀಸ್ ವಿರುದ್ಧ, ದೂರು ದಾಖಲಿಸಿದ್ದಾರೆ. ತಾವು ಚಿತ್ರದ ನಿರ್ಮಾಣಕ್ಕಾಗಿ 3.2 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಿದ್ದೆ. ಆದರೆ ನನಗೆ ಮಾಲೀಕತ್ವವನ್ನು ನಿರಾಕರಿಸಲಾಗಿದೆ ಮತ್ತು ಹಕ್ಕುಗಳನ್ನು ತನಗೆ ತಿಳಿಯದೆ ಬೇರೆ ಅವರಿಗೆ ವರ್ಗಾಯಿಸಲಾಗಿದೆ ಎಂದು ಅವರು ದೂರಿನಲ್ಲಿ ಆರೋಪಿಸಿದ್ದಾರೆ.

ಥಿಯೇಟರ್ ವಿತರಣಾ ಹಕ್ಕುಗಳು, ಓಟಿಟಿ ಸ್ಟ್ರೀಮಿಂಗ್, ಸ್ಯಾಟಲೈಟ್ ಮತ್ತು ಆಡಿಯೊ ಹಕ್ಕುಗಳ ಒಪ್ಪಂದವನ್ನು ಅಂತಿಮಗೊಳಿಸುವಲ್ಲಿ ನಿರ್ಮಾಪಕರು ತೊಂದರೆಗಳನ್ನು ಎದುರಿಸುತ್ತಿರುವ ಕಾರಣ ಎರ್ನಾಕುಲಂ ಸೆಷನ್ಸ್ ನ್ಯಾಯಾಲಯದ ತಡೆಯಾಜ್ಞೆ ತಂದಿದ್ದು, ಇದರಿಂದ ಚಿತ್ರದ ಬಿಡುಗಡೆ ವಿಳಂಬ ಆಗಬಹುದು ಎನ್ನಲಾಗುತ್ತಿದೆ.

ಬಿಗ್‌ ಬಜೆಟ್‌ ʼಅಜಯಂತೇ ರಂದಮ್ ಮೋಷನಂʼ ಮೊದಲಿಗೆ ಮೇ ತಿಂಗಳಿನಲ್ಲಿ ರಿಲೀಸ್‌ ಆಗುವ ಯೋಜನೆಯಿತ್ತು. ಆದರೆ ಬಹಳ ವಿಎಫ್‌ ಎಕ್ಸ್‌ ಕೆಲಸದಿಂದ ಈ ವರ್ಷದ ಓಣಂ ಹಬ್ಬಕ್ಕೆ ಸಿನಿಮಾ ರಿಲೀಸ್‌ ಮಾಡುವ ಯೋಜನೆಯನ್ನು ಚಿತ್ರತಂಡ ಹಾಕಿಕೊಂಡಿತ್ತು. ಆದರೆ ಇದೀಗ ಬಂದಿರುವ ಕಾನೂನು ತೊಡಕಿನಿಂದ ಸಿನಿಮಾ ರಿಲೀಸ್‌ ಮುಂದೂಡಿಕೆ ಆಗುವ ಸಾಧ್ಯತೆಯಿದೆ.

ಟೊವಿನೋ ಥಾಮಸ್ ಅಜಯನ್, ಮಣಿಯನ್ ಮತ್ತು ಕುಂಜಿ ಕೇಳು  ಎನ್ನುವ ತ್ರಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಬಾಸಿಲ್ ಜೋಸೆಫ್, ಐಶ್ವರ್ಯಾ ರಾಜೇಶ್, ಕೃತಿ ಶೆಟ್ಟಿ, ಮತ್ತು ಸುರಭಿ ಲಕ್ಷ್ಮೀ ಮುಂತಾದವರು ನಟಿಸಿದ್ದಾರೆ.