Guru Purnima Spcl: ವೈಎನ್‌ಪಿ ಎಂಬ ಅಪರೂಪದ ಶಿಕ್ಷಕರು

Team Udayavani, Jul 21, 2024, 6:01 PM IST

ಸಾಂದರ್ಭಿಕ ಚಿತ್ರ

ನನಗೆ ಕಲಿಸಿದ, ನನ್ನ ವ್ಯಕ್ತಿತ್ವವನ್ನು ರೂಪಿಸಿದ ಎಲ್ಲ ಗುರುಗಳೂ ನನಗೆ ಮಾನ್ಯರೇ. ಆದರೆ ಅವರ ಪೈಕಿ, ನನ್ನ ನೆನಪಲ್ಲಿ ಸದಾ ಉಳಿದವರೆಂದರೆ ಹೈಸ್ಕೂಲ್‌ನಲ್ಲಿ ಕಲಿಸಿದ ವೈ.ಎನ್‌.ಪರಮೇಶ್ವರಯ್ಯ ಎನ್ನುವ ಗುರುಗಳು.

ವೈಎನ್‌ಪಿ ಎಂದೇ ಕರೆಯಲಾಗುತ್ತಿದ್ದ ಅವರು ಬೇರೆ ಬೇರೆ ತರಗತಿಗಳಲ್ಲಿ ಇಂಗ್ಲಿಷ್‌, ಗಣಿತ, ವಿಜ್ಞಾನಗಳನ್ನು ಬೋಧಿಸಿದವರು. ಅವರ ಪಾಠಗಳನ್ನು ಕೇಳುವುದೇ ಒಂದು ರೋಚಕ ಅನುಭವ. ಒಮ್ಮೆ ತರಗತಿಯಲ್ಲಿ ಕೇಳಿದರೆ ಸಾಕಾಗ್ತಿತ್ತು. ಮನದಲ್ಲಿ ಗಟ್ಟಿಯಾಗಿ ಕುಳಿತು ಬಿಡ್ತಿತ್ತು. ಅವರ ಪಾಠವೆಂದರೆ ಒಂದು ನಿಗೂಢ ಲೋಕದೊಳಗೆ ಹೊಕ್ಕು ಬರುವ ಒಂದು ಬೆರಗಿನ ಅನುಭವ. ಎಲ್ಲಕ್ಕಿಂತ ನನಗೆ ಇಷ್ಟವಾದದ್ದು ಅವರ ಇಂಗ್ಲಿಷ್‌ ಪಾಠ. ನನ್ನ ಬಗ್ಗೆ ವಿಶೇಷ ಪ್ರೀತಿ ಇದ್ದ ಅವರು, ಬಿಡುವಿನ ವೇಳೆಯಲ್ಲಿ, ಸ್ಟಾಫ್ ರೂಮಿನಲ್ಲಿ ಇಂಗ್ಲಿಷ್‌ ಕವಿತೆಗಳನ್ನು ವಾಚನ ಮಾಡೋದು ಹೇಗೆ, ಅವುಗಳ ಲಯವೈವಿಧ್ಯ ವನ್ನು ಹಿಡಿಯೋದು ಹೇಗೆ, ಅವನ್ನು ಅರ್ಥ ಮಾಡಿಕೊಳ್ಳೋದು ಹೇಗೆ ಎಂಬುದನ್ನು ತಿಳಿಸಿ, ಮನದಟ್ಟು ಮಾಡಿಬಿಡ್ತಿದ್ದರು.

ಅವರ ಆ ಪಾಠವು ನನಗೆ ಕನ್ನಡ ಕವಿತೆಗಳ ಲಯ ವ್ಯವಸ್ಥೆಯನ್ನೂ, ಕವಿತೆಗಳನ್ನೂ ಅರ್ಥ ಮಾಡಿಕೊಳ್ಳುವ ಬಗೆಯನ್ನು ತಿಳಿಯಲು ಸಹಾಯವಾಗ್ತಿತ್ತು. ಇಂದು ನಾನು ಸಾಹಿತ್ಯ ಕ್ಷೇತ್ರದಲ್ಲಿ ಒಂಚೂರು ಕೆಲಸ ಮಾಡಿದ್ದರೆ ಅದಕ್ಕೆ ಅವರ ಕೊಡುಗೆಯೂ ಇದೆ ಎಂಬುದು ಖಚಿತ. ಅವರಿಗೆ, ಅವರಂಥ ಅನೇಕ ಗುರುಗಳಿಗೆ, ಆಮೇಲೆ ನನಗೆ ಕವಿತೆಯ ಹೊಸ ದಾರಿಯನ್ನು ಸೂಚಿಸಿದ ಗುರುವಲ್ಲದ ಗುರು ಕವಿ ಗೋಪಾಲಕೃಷ್ಣ ಅಡಿಗರಿಗೆ ನಾನು ಸದಾ ಕೃತಜ್ಞ. ಅವರೆಲ್ಲರಿಗೆ ನನ್ನ ಗೌರವ ಪೂರ್ವಕ ನಮನಗಳು

-ಸುಬ್ರಾಯ ಚೊಕ್ಕಾಡಿ ಅಧ್ಯಾಪಕರು, ಹಿರಿಯ ಸಾಹಿತಿಗಳು