Bigg Boss ಮನೆಯಲ್ಲಿ ಖುಲ್ಲಂ ಖುಲ್ಲಾ ರೊಮ್ಯಾನ್ಸ್:‌ ವೈರಲ್ ವಿಡಿಯೋಗೆ ಆಯೋಜಕರ ಸ್ಪಷ್ಟನೆ

Team Udayavani, Jul 23, 2024, 1:11 PM IST

ಮುಂಬಯಿ: ಬಿಗ್‌ ಬಾಸ್‌ ಓಟಿಟಿ -3 ಶೋ (Bigg Boss OTT) ಆರಂಭವಾದಾಗಿನಿಂದ ಒಂದಲ್ಲ ಒಂದು ವಿವಾದದಿಂದ ಸುದ್ದಿಯಾಗುತ್ತಿದೆ. ಅದರಲ್ಲೂ ಇಬ್ಬರು ಪತ್ನಿಯರ ಜೊತೆ ದೊಡ್ಡನೆ ಪ್ರವೇಶ ಮಾಡಿದ ಅರ್ಮಾನ್‌ ಮಲಿಕ್‌ (Armaan Malik) ಅವರಂತೂ ಎಲ್ಲರಿಗಿಂತ ಹೆಚ್ಚಾಗಿಯೇ ವಿವಾದದಿಂದ ಸುದ್ದಿಯಾಗಿದ್ದಾರೆ.

ಅರ್ಮಾನ್‌ ಮಲಿಕ್‌ ಅವರ ಪತ್ನಿಯ ಬಗ್ಗೆ ಮಾತನಾಡಿದ್ದಕ್ಕಾಗಿ ಸಹ ಸ್ಪರ್ಧಿ ವಿಶಾಲ್‌ ಪಾಂಡೆ (Vishal Pandey) ಅವರಿಗೆ ಅರ್ಮಾನ್‌ ಮಲಿಕ್‌ ಕಪಾಳಕ್ಕೆ ಬಾರಿಸಿರುವ ಘಟನೆಗೆ ಎಲ್ಲೆಡೆ ಆಕ್ರೋಶ ವ್ಯಕ್ತವಾಗಿತ್ತು. ಅರ್ಮಾನ್‌ ಅವರನ್ನು ಮನೆಯಿಂದ ಹೊರ ಹಾಕಬೇಕೆಂದು ಅನೇಕರು ವಾದಿಸಿದ್ದರು.

ಈ ವಿವಾದದ ನಡುವೆಯೇ ಇದೀಗ ಅರ್ಮಾನ್‌ ಅವರ ಸುತ್ತ ಮತ್ತೊಂದು ವಿವಾದ ಸುತ್ತಿಕೊಂಡಿದೆ. ಇತ್ತೀಚೆಗಷ್ಟೇ ಬಿಗ್‌ ಬಾಸ್‌ ಮನೆಯಲ್ಲಿ ಅರ್ಮಾನ್‌ ಹಾಗೂ ಅವರ ಪತ್ನಿ ಕೃತ್ತಿಕಾ ಮಲಿಕ್(Kritika Malik) ರೊಮ್ಯಾಂಟಿಕ್‌ ಮೂಡ್‌ ನಲ್ಲಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿತ್ತು.

ಬಿಗ್‌ ಬಾಸ್‌ ಕಾರ್ಯಕ್ರಮ ಅಸಹ್ಯವಾಗಿದೆ. ಇದನ್ನು ಕುಟುಂಬ ಸಮೇತ ಕೂತು ನೋಡಲು ಆಗುವುದಿಲ್ಲ ಎಂದು ಅನೇಕರು ಆಯೋಜಕರ ವಿರುದ್ಧ ಆಕ್ರೋಶದ ನುಡಿಗಳನ್ನಾಡಿದ್ದರು.

ಈ ಸಂಬಂಧ ಸೋಮವಾರ (ಜುಲೈ 22ರಂದು) ಶಿವಸೇನಾ ಕಾರ್ಯದರ್ಶಿ ಮತ್ತು ವಕ್ತಾರೆ, ಶಾಸಕಿ ಮನಿಶಾ ಕಯಾಂಡೆ ಅವರು ಮುಂಬೈ ಪೊಲೀಸ್ ಕಮಿಷನರ್ ಅವರನ್ನು ಭೇಟಿ ಮಾಡಿ ಬಿಗ್‌ ಬಾಸ್‌ ರಿಯಾಲಿಟಿ ಶೋವನ್ನು ನಿಷೇಧಿಸುವಂತೆ ಒತ್ತಾಯಿಸಿ ದೂರು ದಾಖಲಿಸಿದ್ದರು.

ಇದೀಗ ವೈರಲ್‌ ವಿಡಿಯೋ ಕುರಿತು ಜಿಯೋ ಸಿನಿಮಾ ಸ್ಪಷ್ಟನೆ ನೀಡಿದೆ.

‘ಬಿಗ್ ಬಾಸ್ ಓಟಿಟಿ-3ಯಲ್ಲಿ ಪ್ರಸಾರ ಕಂಡಿದೆ ಎನ್ನಲಾದ ಅರ್ಮಾನ್-ಕೃತಿಕಾ ಅವರ ವೈರಲ್ ವಿಡಿಯೋ ನಕಲಿಯಾಗಿದೆ. ಈ ರೀತಿ ಮಾನಹಾನಿ ಮಾಡಿದವರ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತದೆ. ಪ್ಲಾಟ್‌ಫಾರ್ಮ್‌ನಲ್ಲಿ ಸ್ಟ್ರೀಮ್ ಮಾಡುವ ಯಾವುದೇ ವಿಷಯದ ಗುಣಮಟ್ಟ ಮತ್ತು ಸೂಕ್ತತೆಯನ್ನು ಖಚಿತಪಡಿಸಿಕೊಳ್ಳಲು ಜಿಯೋ ಸಿನಿಮಾ ಕಟ್ಟುನಿಟ್ಟಾದ ಪ್ರೋಗ್ರಾಮಿಂಗ್ ಮಾನದಂಡಗಳು ಮತ್ತು ಮಾರ್ಗಸೂಚಿಗಳನ್ನು ಹೊಂದಿದೆ. ಇಂತಹ ಯಾವುದೇ ವಿಷಯವನ್ನು ನಾವು ಹೊಂದಿಲ್ಲ. ವೈರಲ್‌ ಆಗಿರುವ ವೀಡಿಯೊ ಕ್ಲಿಪ್ ನಕಲಿಯಾಗಿದೆ ಎಂದು ಆಗಿದೆ ಎಂದು ಹೇಳಿದೆ.

ನಮ್ಮ ವೀಕ್ಷಕರು ನಮ್ಮ ಮೇಲೆ ಇಟ್ಟಿರುವ ನಂಬಿಕೆಯನ್ನು ಉಳಿಸಲು ನಾವು ಬದ್ಧರಾಗಿದ್ದೇವೆ. ಈ ನಕಲಿ ಕ್ಲಿಪ್‌ನ ಸೃಷ್ಟಿ ಮತ್ತು ಪ್ರಸಾರವು ಅತ್ಯಂತ ಗಂಭೀರವಾದ ಕಾಳಜಿಯ ವಿಷಯವಾಗಿದೆ. ಈ ಕ್ಲಿಪ್‌ನ ಮೂಲವನ್ನು ಗುರುತಿಸುವ ನಿಟ್ಟಿನಲ್ಲಿ ನಮ್ಮ ತಂಡಗಳು ಕಾರ್ಯನಿರ್ವಹಿಸುತ್ತಿವೆ. ಇಂತಹವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ʼಜಿಯೋʼ ಸಿನಿಮಾ ʼಇಂಡಿಯಾ. ಟುಡೇʼಗೆ ಹೇಳಿದೆ.

ಬಿಗ್‌ ಬಾಸ್‌ ಓಟಿಟಿ -3 ಆರಂಭವಾಗಿ 32 ದಿನಗಳು ಕಳೆದಿದೆ. ಈ ಓಟಿಟಿ ಸೀಸನ್‌ ನ್ನು ಅನಿಲ್‌ ಕಪೂರ್‌ ನಡೆಸಿಕೊಡುತ್ತಿದ್ದಾರೆ.