Paris Olympics Hockey: ನ್ಯೂಜಿಲ್ಯಾಂಡ್‌ ವಿರುದ್ಧ ಗೆದ್ದು ಭಾರತ ಶುಭಾರಂಭ

Team Udayavani, Jul 27, 2024, 11:04 PM IST

ಪ್ಯಾರಿಸ್‌: ಒಲಿಂಪಿಕ್ಸ್‌ ಹಾಕಿ ಪಂದ್ಯಾವಳಿಯಲ್ಲಿ ಭಾರತ ಗೆಲುವಿನ ಆರಂಭ ಮಾಡಿದೆ. ಮೊದಲ ಮುಖಾಮುಖಿಯಲ್ಲಿ ನ್ಯೂಜಿಲ್ಯಾಂಡ್‌ಗೆ 3-2 ಗೋಲುಗಳ ಸೋಲುಣಿಸಿದೆ.

ಪಂದ್ಯದ ಮೊದಲ ಗೋಲು ನ್ಯೂಜಿಲ್ಯಾಂಡ್‌ನಿಂದ ದಾಖಲಾಯಿತು. 8ನೇ ನಿಮಿಷದಲ್ಲೇ ಸ್ಯಾಮ್‌ ಲೇನ್‌ ಭಾರತದ ಮೇಲೆ ಆಕ್ರಮಣಗೈದರು. ದ್ವಿತೀಯ ಕ್ವಾರ್ಟರ್‌ನಲ್ಲಿ ಮನ್‌ದೀಪ್‌ ಸಿಂಗ್‌ ಪಂದ್ಯವನ್ನು ಸಮಬಲಕ್ಕೆ ತಂದರು. 24ನೇ ನಿಮಿಷದಲ್ಲಿ ಈ ಗೋಲು ಸಿಡಿಯಿತು. 3ನೇ ಕ್ವಾರ್ಟರ್‌ನ 34ನೇ ನಿಮಿಷದಲ್ಲಿ ವಿವೇಕ್‌ ಸಾಗರ್‌ ಪ್ರಸಾದ್‌ ಭಾರತಕ್ಕೆ ಮುನ್ನಡೆ ತಂದುಕೊಡುವಲ್ಲಿ ಯಶಸ್ವಿಯಾದರು. ಹೀಗೆ 3 ಕ್ವಾರ್ಟರ್‌ಗಳಲ್ಲಿ 3 ಗೋಲು ದಾಖಲಾಯಿತು.

53ನೇ ನಿಮಿಷದಲ್ಲಿ ಸೈಮನ್‌ ಚೈಲ್ಡ್‌ ಬಾರಿಸಿದ ಗೋಲಿನೊಂದಿಗೆ ನ್ಯೂಜಿಲ್ಯಾಂಡ್‌ ಪಂದ್ಯವನ್ನು ಸಮಬಲಕ್ಕೆ ತಂದಿತು. ಇನ್ನೇನು ಪಂದ್ಯದ ಮುಕ್ತಾಯಕ್ಕೆ ಒಂದು ನಿಮಿಷ ಉಳಿದಿರುವಾಗ ನಾಯಕ ಹರ್ಮನ್‌ಪ್ರೀತ್‌ ಸಿಂಗ್‌ 3ನೇ ಗೋಲು ಬಾರಿಸಿ ಭಾರತದ ಗೆಲುವನ್ನು ಸಾರಿದರು.