TT: 32ರ ಸುತ್ತಿಗೆ ಶ್ರೀಜಾ, ಮಣಿಕಾ; ಶರತ್‌ ಕಮಲ್‌ಗೆ ಸೋಲಿನ ಆಘಾತ

Team Udayavani, Jul 29, 2024, 12:36 AM IST

ಪ್ಯಾರಿಸ್‌: ಭಾರತದ ಅಗ್ರ ರ್‍ಯಾಂಕ್‌ನ ಟೇಬಲ್‌ ಟೆನಿಸ್‌ ಆಟಗಾರ್ತಿ ಶ್ರೀಜಾ ಅಕುಲಾ ಮತ್ತು ಮಣಿಕಾ ಬಾತ್ರಾ ಪ್ಯಾರಿಸ್‌ ಒಲಿಂಪಿಕ್ಸ್‌ ಮೊದಲ ಪಂದ್ಯವನ್ನು ಗೆದ್ದು 32ರ ಸುತ್ತು ಪ್ರವೇಶಿಸಿದ್ದಾರೆ. ಆದರೆ ಹಿರಿಯ ಆಟಗಾರ ಅಚಂತ ಶರತ್‌ ಕಮಲ್‌ ಮೊದಲ ಸುತ್ತಿನಲ್ಲೇ ಸೋತು ಆಘಾತ ಅನುಭವಿಸಿದರು.

ಶ್ರೀಜಾ ಅಕುಲಾ ಸ್ವೀಡನ್‌ನ ಕ್ರಿಸ್ಟಿನಾ ಕಾಲ್ಬರ್ಗ್‌ ವಿರುದ್ಧ 4-0 ಅಂತರದ ಗೆಲುವು ಸಾಧಿಸಿದರು (11-4, 11-9, 11-7, 11-8). ಮೊದಲ ಸೆಟ್‌ನಲ್ಲಿ ಶ್ರೀಜಾ ಸ್ವಲ್ಪ ಸಮಸ್ಯೆ ಎದುರಿಸಿದರು. ಆದರೂ ಇದನ್ನು ನಿಭಾಯಿಸುವಲ್ಲಿ ಯಶಸ್ವಿಯಾದರು. ಮಣಿಕಾ ಬಾತ್ರಾ ಗ್ರೇಟ್‌ ಬ್ರಿಟನ್‌ನ 103ನೇ ರ್‍ಯಾಂಕಿಂಗ್‌ ಆಟಗಾರ್ತಿ ಅನ್ನಾ ಹರ್ಸಿ ವಿರುದ್ಧ 4-1ರಿಂದ ಗೆದ್ದು ಬಂದರು (11-8, 12-10, 11-9, 9-11, 11-5). ಆತಿಥೇಯ ಫ್ರಾನ್ಸ್‌ನ ಭಾರತೀಯ ಮೂಲದ ಆಟಗಾರ್ತಿ ಪ್ರತಿಕಾ ಪಾವಡೆ ವಿರುದ್ಧ ಮಣಿಕಾ ಮುಂದಿನ ಸುತ್ತಿನ ಪಂದ್ಯ ಆಡಲಿದ್ದಾರೆ.

ಶರತ್‌ ಶರಣಾಗತಿ

42 ವರ್ಷದ, ಈ ಒಲಿಂಪಿಕ್ಸ್‌ನಲ್ಲಿ ಧ್ವಜಧಾರಿಯ ಗೌರವ ಸಂಪಾದಿಸಿದ್ದ ಅಚಂತ ಶರತ್‌ ಕಮಲ್‌ ತಮಗಿಂತ 86 ಸ್ಥಾನದಷ್ಟು ಕೆಳ ಕ್ರಮಾಂಕದ ಆಟಗಾರ, ಸ್ಲೊವೇನಿಯಾದ ಡೆನಿ ಕೊಝುಲ್‌ ವಿರುದ್ಧ 2-4 ಅಂತರದ ಸೋಲನುಭವಿಸಿದರು (12-10, 9-11, 6-11, 7-11, 11-8, 10-12). 53 ನಿಮಿಷಗಳಲ್ಲಿ ಶರತ್‌ ಶರಣಾಗತಿ ಸಾರಿದರು. ಇದರೊಂದಿಗೆ ಅಚಂತ ಶರತ್‌ ಕಮಲ್‌ ಅವರ ಒಲಿಂಪಿಕ್ಸ್‌ ಸಿಂಗಲ್ಸ್‌ ಅಭಿಯಾನ ದುರಂತದಲ್ಲಿ ಕೊನೆಗೊಂಡಿತು.