Olympics: ಜೊನಾತನ್ ಕ್ರಿಸ್ಟಿಗೆ ಶಾಕ್ ನೀಡಿದ ಲಕ್ಷ್ಯ ಸೇನ್: ಸಿಂಧು 16ರ ಸುತ್ತಿಗೆ

Team Udayavani, Jul 31, 2024, 3:28 PM IST

ಪ್ಯಾರಿಸ್ : ಪ್ಯಾರಿಸ್ ಒಲಿಂಪಿಕ್ಸ್‌ನ ಜುಲೈ 31 ರಂದು(ಬುಧವಾರ) ನಡೆದ ಪುರುಷರ ಸಿಂಗಲ್ಸ್ ಬ್ಯಾಡ್ಮಿಂಟನ್‌ ಪಂದ್ಯದಲ್ಲಿ ಭಾರತದ ಲಕ್ಷ್ಯ ಸೇನ್(Lakshya Sen)ಅಮೋಘ ನಿರ್ವಹಣೆ ತೋರಿ ಪ್ರಿ-ಕ್ವಾರ್ಟರ್‌ಫೈನಲ್‌ಗೆ ಪ್ರವೇಶಿಸಿದ್ದಾರೆ.

ನಡೆದ L ಗುಂಪಿನ ಪಂದ್ಯದಲ್ಲಿ ವಿಶ್ವ ನಂ. 3 ಮತ್ತು ಹಾಲಿ ಆಲ್-ಇಂಗ್ಲೆಂಡ್ ಚಾಂಪಿಯನ್ ಇಂಡೋನೇಷ್ಯಾದ ಜೊನಾತನ್ ಕ್ರಿಸ್ಟಿ (Jonatan Christie ) ಅವರನ್ನು ಉನ್ನತ ಫಾರ್ಮ್ ನಲ್ಲಿದ್ದ ಲಕ್ಷ್ಯ ಸೇನ್ ಸೋಲುಣಿಸಿ ಪದಕದ ಆಸೆ ಮೂಡಿಸಿದ್ದಾರೆ. 2018 ರಿಂದ ಏಷ್ಯನ್ ಗೇಮ್ಸ್ ಚಿನ್ನದ ಪದಕ ವಿಜೇತ ಜೊನಾತನ್ ಕ್ರಿಸ್ಟಿ ವಿರುದ್ಧ 21-18, 21-12 ಸೆಟ್‌ಗಳಿಂದ ಸಂವೇದನಾಶೀಲ ಗೆಲುವು ಸಾಧಿಸಿದರು.

ಫಲಿತಾಂಶವು ಬ್ಯಾಡ್ಮಿಂಟನ್ ಆಟದಲ್ಲಿ ಹೊಸ ಸಂದೇಶ ನೀಡಿದ್ದು ಜೊನಾತನ್ ಪ್ಯಾರಿಸ್ ಕ್ರೀಡಾಕೂಟದಲ್ಲಿ ಪದಕ ಗೆಲ್ಲುವ ಮೆಚ್ಚಿನವರಲ್ಲಿ ಒಬ್ಬರಾಗಿದ್ದರು.

ಪಿವಿ ಸಿಂಧು 16ರ ಸುತ್ತಿಗೆ
ಮಹಿಳಾ ಸಿಂಗಲ್ಸ್‌ನಲ್ಲಿ ಪಿವಿ ಸಿಂಧು 16ರ ಸುತ್ತಿಗೆ ಪ್ರವೇಶಿಸಿದರು. ಎಂ ಗುಂಪಿನಲ್ಲಿ ಅಗ್ರಸ್ಥಾನ ಗಳಿಸಿದ ಸಿಂಧು ಒಂದು ಗಂಟೆಯೊಳಗೆ ಎಸ್ಟೋನಿಯಾದ ಕ್ರಿಸ್ಟಿನ್ ಕುಬಾ ಅವರನ್ನು 21-5, 21-10 ಸೆಟ್‌ಗಳಿಂದ ಸೋಲಿಸಿ ಸುಲಭ ಜಯ ತನ್ನದಾಗಿಸಿಕೊಂಡರು.

ಫೈನಲ್‌ಗೆ ಅರ್ಹತೆ ಪಡೆದ ಸ್ವಪ್ನಿಲ್ ಕುಸಾಲೆ

50 ಮೀ ರೈಫಲ್ 3ಪಿ ಪುರುಷರ ಅರ್ಹತಾ ಸುತ್ತಿನಲ್ಲಿ ಭಾರತದ ಸ್ವಪ್ನಿಲ್ ಕುಸಾಲೆ 590 ಅಂಕಗಳೊಂದಿಗೆ 7ನೇ ಸ್ಥಾನ ಪಡೆದು ಫೈನಲ್‌ಗೆ ಅರ್ಹತೆ ಪಡೆದಿದ್ದಾರೆ.