Ashwini Ambrish; ಭೀಮ ಅಡ್ಡದಲ್ಲಿ ಮಿನುಗಿದ ಅಶ್ವಿ‌ನಿ ನಕ್ಷತ್ರ

Team Udayavani, Aug 2, 2024, 7:11 PM IST

“ದುನಿಯಾ’ ವಿಜಯ್‌ ನಟನೆಯ “ಭೀಮ’ ಚಿತ್ರ ಆ.9ಕ್ಕೆ ತೆರೆಕಾಣುತ್ತಿದೆ. ಈ ಮೂಲಕ ನವನಟಿಯೊಬ್ಬಳು ನಾಯಕಿಯಾಗಿ ಚಿತ್ರರಂಗಕ್ಕೆ ಎಂಟ್ರಿಕೊಡುತ್ತಿದ್ದಾರೆ. ಆಕೆ ಅಶ್ವಿ‌ನಿ ಅಂಬರೀಶ್‌. ಈಗಾಗಲೇ ಸಿನಿಮಾದ ಸ್ಟಿಲ್‌ಗ‌ಳಲ್ಲಿ ಸಾದಾಸೀದಾ ಹುಡುಗಿಯಾಗಿ ಕಾಣಿಸಿಕೊಂಡಿರುವ ಅಶ್ವಿ‌ನಿ, ಈಗ ಈ ಚಿತ್ರದ ಮೇಲೆ ಭರ್ಜರಿ ನಿರೀಕ್ಷೆ ಇಟ್ಟಿದ್ದಾರೆ.

ಅಶ್ವಿ‌ನಿ ಅವರ ನಟನೆಯ ಹಿನ್ನೆಲೆ ಬಗ್ಗೆ ಹೇಳುವುದಾದರೆ, ಮೂಲತಃ ರಂಗಭೂಮಿ ಹಿನ್ನೆಲೆಯಿಂದ ಬಂದವರು. “ಭೀಮ’ ಚಿತ್ರಕ್ಕೆ ಆಯ್ಕೆಯಾದ ಬಗ್ಗೆ ಮಾತನಾಡುವ ಅಶ್ವಿ‌ನಿ, “ನಾನು ರಂಗಭೂಮಿ ಮೂಲಕ ನಟನೆಗೆ ಬಂದೆ. ಅಚ್ಯುತ್‌ ಕುಮಾರ್‌ ಅವರ ಥೇಟರ್‌ ತತ್ಕಾಲ್‌ ತಂಡದಲ್ಲಿ ನಟನೆ ತರಬೇತಿ ಪಡೆದಿದ್ದೇನೆ. “ಭೀಮ’ ಚಿತ್ರಕ್ಕೆ ಆಯ್ಕೆಯಾಗಿದ್ದು, ಆಕಸ್ಮಿಕ. ಯಾವುದೇ ಆಡಿಷನ್‌ ನೀಡಿರಲಿಲ್ಲ. ಕಾರ್ಯಕ್ರಮವೊಂದರಲ್ಲಿ ದುನಿಯಾ ವಿಜಯ ಅವರನ್ನು ಭೇಟಿಯಾಗಿದ್ದೆ. ಆಗ, “ಒಂದು ಪಾತ್ರ ಇದೆ ಮಾಡ್ತೀಯಾ?’ ಎಂದು ಖುದ್ದು ಅವರೇ ಕೇಳಿದ್ದರು. ಹೀಗೆ “ಭೀಮ’ ಚಿತ್ರ ತಂಡ ಸೇರಿಕೊಂಡೆ’ ಎನ್ನುತ್ತಾರೆ ಅಶ್ವಿ‌ನಿ.

ರಂಗಭೂಮಿಯಲ್ಲಷ್ಟೇ ಅಲ್ಲ, ಅಶ್ವಿ‌ನಿ, ಕೆಲ ಧಾರಾವಾಹಿಗಳಲ್ಲೂ ನಟಿಸಿದ್ದಾರೆ. “ಸಿನಿಮಾಗೆ ಬರುವ ಮುನ್ನ ಎರಡು ಧಾರಾವಾಹಿಗಳಲ್ಲಿ ನಟಿಸಿದ್ದೆ. ಜೀವನದಿ’ಯಲ್ಲಿ ನನ್ನದು ಮುಖ್ಯ ಪಾತ್ರವಾಗಿತ್ತು. ಜೊತೆಗೆ ಟಿ.ಎನ್‌. ಸೀತಾರಾಮ್‌ ಅವರ “ಮಗಳು ಜಾನಕಿ’ ಧಾರಾವಾಹಿಯಲ್ಲಿ ಒಂದು ಪಾತ್ರ ನಿರ್ವಹಿಸಿದ್ದೆ. ಅದಾದ ಬಳಿಕ ಈಗ ಸಿನಿಮಾಗೆ ಕಾಲಿಟ್ಟಿದ್ದೇನೆ’ ಎನ್ನುವುದು ಅಶ್ವಿ‌ನಿ ಮಾತು.

ಚಿತ್ರೀಕರಣದ ಅನುಭವಗಳ ಹಾಗೂ ತಮ್ಮ ಪಾತ್ರದ ಬಗ್ಗೆ ಮಾತನಾಡುವ ಅಶ್ವಿ‌ನಿ, “ನಾನು ನಟನೆಗೆ ಹೊಸಬಳಲ್ಲ.ಆದರೆ, ಸಿನಿಮಾಗೆ ಹೊಸಬಳು. ಚಿತ್ರೀಕರಣವಿಭಿನ್ನ ಅನುಭವ ನೀಡಿದೆ. ಅದರಲ್ಲೂ ಮುಖ್ಯವಾಗಿ, ನನ್ನ ಮೊದಲ ಸಿನಿಮಾದಲ್ಲೇ ವಿಜಯ ಅವರೊಂದಿಗೆ ನಟಿಸುವ ಅವಕಾಶ ಸಿಕ್ಕಿದ್ದು ಬಹಳ ಖುಷಿ ತಂದಿದೆ. ಅವರ ನಿರ್ದೇಶನ ವೈಖರಿ, ಪ್ರತಿ ಸನ್ನಿವೇಶವನ್ನೂ ವಿಭಿನ್ನವಾಗಿ ಚಿತ್ರಿಸುವ ಶೈಲಿಯನ್ನು ಹತ್ತಿರದಿಂದ ನೋಡಿ ಕಲಿಯುವ ಅವಕಾಶ ಸಿಕ್ಕಿತ್ತು. ಬೆಂಗಳೂರಿನ ಕೆ.ಆರ್‌. ಮಾರ್ಕೆಟ್‌, ಮತ್ತಿತರ ಗಲ್ಲಿಗಳಲ್ಲಿ ರಾತ್ರಿ ಶೂಟಿಂಗ್‌ ಮಾಡಿದ್ದು ಸಹ ಥ್ರಿಲ್ಲಿಂಗ್‌ ಅನುಭವ. ಚಿತ್ರದಲ್ಲಿ ವಿಜಯ ಅವರನ್ನು ಪ್ರೀತಿಸುವ ಮುಖ್ಯ ಪಾತ್ರ ನನ್ನದು. ಕತೆಯ ಜೊತೆಗೆ ನನ್ನ ಪಾತ್ರವೂ ಕೂಡಿಕೊಂಡಿದೆ. ನನ್ನ ಮೊದಲ ಚಿತ್ರ ಇದು. ಹಾಗಾಗಿ ಸಾಕಷ್ಟು ನಿರೀಕ್ಷೆ ಇದೆ.’ ಎನ್ನುತ್ತಾರೆ ಅಶ್ವಿ‌ನಿ.

“ಭೀಮ’ ಅಶ್ವಿ‌ನಿ ನಟನೆಯ ಮೊದಲ ಸಿನಿಮಾ. ಸದ್ಯ ಅದು ಬಿಡುಗಡೆಯಾಗುವ ಹೊತ್ತಲ್ಲೆ ಅಶ್ವಿ‌ನಿಗೆ ಚಂದನವದಲ್ಲಿ ಮತ್ತಷ್ಟು ಅವಕಾಶಗಳು ಕೈ ಬೀಸಿ ಕರೆಯುತ್ತಿವೆ. “ಈಗಾಗಲೇ ಮೂರು ಚಿತ್ರಗಳಿಗೆ ಅವಕಾಶ ಬಂದಿವೆ’ ಎನ್ನುತ್ತಾರೆ.

ನಿತೀಶ ಡಂಬಳ