Canada Tennis Tournament: ಪಾಪಿರಿನ್‌, ಪೆಗುಲಾ ಚಾಂಪಿಯನ್ಸ್‌

Team Udayavani, Aug 13, 2024, 11:24 PM IST

ಮಾಂಟ್ರಿಯಲ್‌ : ಕೆನಡಾದಲ್ಲಿ ನಡೆದ ನ್ಯಾಶನಲ್‌ ಬ್ಯಾಂಕ್‌ ಓಪನ್‌ ಟೆನಿಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಪುರುಷರ ಸಿಂಗಲ್ಸ್‌ ಪ್ರಶಸ್ತಿ ಆಸ್ಟ್ರೇಲಿಯದ ಅಲೆಕ್ಸಿ ಪಾಪಿರಿನ್‌ ಪಾಲಾಗಿದೆ. ವಿಶ್ವದ 62ನೇ ರ್‍ಯಾಂಕ್‌ನ ಅವರು ತಮಗಿಂತ ಉನ್ನತ ದರ್ಜೆಯ ಆಟಗಾರ, ರಷ್ಯಾದ ಆ್ಯಂಡ್ರೆ ರುಬ್ಲೇವ್‌ ವಿರುದ್ಧ 6-2, 6-4 ಅಂತರದ ಗೆಲುವು ಸಾಧಿಸಿ ಮೊದಲ ಎಟಿಪಿ 1000 ಪ್ರಶಸ್ತಿಯನ್ನೆತ್ತಿದರು.

ಪ್ರಶಸ್ತಿಯ ಹಾದಿಯಲ್ಲಿ ಅಲೆಕ್ಸಿ ಪಾಪಿರಿನ್‌ 11ನೇ ಶ್ರೇಯಾಂಕದ ಬೆನ್‌ ಶೆಲ್ಟನ್‌, 7ನೇ ಶ್ರೇಯಾಂಕದ ಗ್ರಿಗರ್‌ ಡಿಮಿಟ್ರೋವ್‌, 4ನೇ ಶ್ರೇಯಾಂಕದ ಹ್ಯೂಬರ್ಟ್‌ ಹುರ್ಕಾಜ್‌, ಬಳಿಕ ಅಮೆರಿಕದ ಸೆಬಾಸ್ಟಿಯನ್‌ ಕೋರ್ಡ ಅವರನ್ನು ಮಣಿಸಿದ್ದರು.
ಈ ಜಯದಿಂದಾಗಿ ಪಾಪಿರಿನ್‌ ಅವರ ಟೆನಿಸ್‌ ರ್‍ಯಾಂಕ್‌ 62ರಿಂದ 23ಕ್ಕೆ ಏರಿಕೆಯಾಗಲಿದೆ.

ಆಲ್‌ ಅಮೆರಿಕನ್‌ ಫೈನಲ್‌
ವನಿತಾ ಫೈನಲ್‌ನಲ್ಲಿ ಜೆಸ್ಸಿಕಾ ಪೆಗುಲಾ ಪ್ರಶಸ್ತಿ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾದರು. ಆಲ್‌ ಅಮೆರಿಕನ್‌ ಸೆಣಸಾಟದಲ್ಲಿ ಅವರು ಅಮಂಡಾ ಅನಿಸಿಮೋವಾ ವಿರುದ್ಧ 6-3, 2-6, 6-1 ಅಂತರದ ಜಯ ಒಲಿಸಿಕೊಂಡರು. ಇದು ಅವರ ಟೆನಿಸ್‌ ಬಾಳ್ವೆಯ
6ನೇ ಪ್ರಶಸ್ತಿಯಾಗಿದೆ.