Mangaluru – ಬೆಂಗಳೂರು ರೈಲು ಹಳಿ: ಗೇಬಿಯನ್‌ ಗೋಡೆ ಕಾಮಗಾರಿ ಪ್ರಗತಿಯಲ್ಲಿ

Team Udayavani, Aug 14, 2024, 6:45 AM IST

ಸುಬ್ರಹ್ಮಣ್ಯ: ಮಂಗಳೂರು – ಬೆಂಗಳೂರು ರೈಲು ಮಾರ್ಗದ ಸಕಲೇಶಪುರ – ಬಳ್ಳುಪೇಟೆ ನಡುವೆ ರೈಲು ಮಾರ್ಗಕ್ಕೆ ಗುಡ್ಡ ಕುಸಿದ ಘಟನೆಗೆ ಸಂಬಂಧಿಸಿದಂತೆ ಮಣ್ಣು ತೆರವು ಕಾರ್ಯಾಚರಣೆ ನಡೆಯುತ್ತಿದ್ದು, ಇದೀಗ ಮಣ್ಣು ಕುಸಿತ ತಡೆಗೆ ಗೇಬಿಯನ್‌ ಗೋಡೆ (ಶಿಲೆ ಕಲ್ಲುಗಳ ತಡೆಗೋಡೆ) ನಿರ್ಮಾಣ ಕಾಮಗಾರಿ ಆರಂಭಿಸಲಾಗಿದೆ.

ಸಕಲೇಶಪುರ ಸಮೀಪ ರೈಲು ಮಾರ್ಗದ ಮೇಲೆ ಗುಡ್ಡ ಕುಸಿದಿದ್ದು, ಮಣ್ಣು ತೆರವು ಕಾರ್ಯಾಚರಣೆ ಸಂದರ್ಭದಲ್ಲಿ ಮತ್ತೆ ಮತ್ತೆ ಮಣ್ಣು ಕುಸಿತವಾಗುತ್ತಿದ್ದುದರಿಂದ ಕಾರ್ಯಾಚರಣೆಗೆ ಹಿನ್ನಡೆಯಾಗಿತ್ತು. ಜತೆಗೆ ಕಳೆದೆರಡು ದಿನಗಳಿಂದ ಸಕಲೇಶಪುರ ಪ್ರದೇಶದಲ್ಲಿ ಭಾರೀ ಮಳೆಯಾಗುತ್ತಿದ್ದು ಕಾಮಗಾರಿ ವಿಳಂಬಕ್ಕೆ ಕಾರಣವಾಗಿದೆ.

ಮಂಗಳವಾರ ವೇಳೆಗೆ ರೈಲು ಮಾರ್ಗದಲ್ಲಿನ ಬಹುತೇಕ ಮಣ್ಣು ತೆರವುಗೊಂಡಿದ್ದು, ಗುಡ್ಡ ಕುಸಿತ ಪ್ರದೇಶದಲ್ಲಿ ಮಣ್ಣು ಕುಸಿತ ತಡೆಗೆ ಕೆಳ ಭಾಗದಿಂದ ಗೇಬಿಯನ್‌ ಗೋಡೆ (ಶಿಲೆ ಕಲ್ಲುಗಳ ತಡೆಗೋಡೆ) ನಿರ್ಮಾಣ ಕೆಲಸ ಆರಂಭಿಸಲಾಗಿದೆ.

ಮಣ್ಣು ತೆರವು ಪೂರ್ಣ; ಇಂದಿನಿಂದ ರೈಲು ಪುನರಾರಂಭ
ಸುಬ್ರಹ್ಮಣ್ಯ: ಸಕಲೇಶಪುರ ಸಮೀಪ ರೈಲು ಮಾರ್ಗಕ್ಕೆ ಗುಡ್ಡ ಕುಸಿದ ಮಣ್ಣು ತೆರವು ಕಾರ್ಯ ಪೂರ್ಣಗೊಂಡಿದ್ದು ಇದೀಗ ಆ. 14ರಿಂದ ಮಂಗಳೂರು – ಬೆಂಗಳೂರು ನಡುವೆ
ರೈಲು ಸಂಚಾರ ಪುನರಾರಂಭ ಆಗಲಿದೆ.

ರೈಲು ಸಂಖ್ಯೆ 07378 ಮಂಗಳೂರು ಸೆಂಟ್ರಲ್‌ – ವಿಜಯಪುರ ಎಕ್ಸ್‌ಪ್ರೆಸ್‌ ವಿಶೇಷ ರೈಲು ಸೇವೆ ಆ. 14ರಂದು ರದ್ದುಗೊಂಡಿದೆ. ಉಳಿದಂತೆ ಎಲ್ಲ ರೈಲು ಸೇವೆಗಳು ಆ.14ರಿಂದ ನಿಗದಿತ ದಿನಾಂಕ ಮತ್ತು ಸಮಯದ ಪ್ರಕಾರ ಸಂಚರಿಸಲಿದೆ ಎಂದು ರೈಲ್ವೇ ಅಧಿಕಾರಿಗಳು ತಿಳಿಸಿದ್ದಾರೆ.

ಶುಕ್ರವಾರ ರಾತ್ರಿ ಗುಡ್ಡ ಕುಸಿದ ಬಳಿಕ ನಾಲ್ಕು ದಿನಗಳ ಸಮಾರೋಪಾದಿಯ ಮಣ್ಣು ತೆರವು ಕಾರ್ಯಾಚರಣೆ ನಡೆದಿದ್ದು ಇದೀಗ ರೈಲು ಮಾರ್ಗ ಸಂಚಾರಕ್ಕೆ ಯೋಗ್ಯವಾಗಿದೆ. ಇದಕ್ಕೂ ಮೊದಲು ಜು. 26ರ ರಾತ್ರಿ ಸುಬ್ರಹ್ಮಣ್ಯ ರೋಡ್‌ ರೈಲು ನಿಲ್ದಾಣದ ಸಮೀಪದ ದೋಣಿಗಲ್‌ ಎಂಬಲ್ಲಿ ರೈಲು ಮಾರ್ಗದಲ್ಲಿ ಭೂ ಕುಸಿತ ಸಂಭವಿಸಿ ರೈಲು ಸಂಚಾರ ತಡೆ ಹಿಡಿದು ದುರಸ್ತಿ ಕಾರ್ಯ ಆರಂಭಿಸಲಾಗಿತ್ತು. ಸುಮಾರು 12 ದಿನಗಳ ನಿರಂತರ ದುರಸ್ತಿ ಕಾರ್ಯಾಚರಣೆ ಬಳಿಕ ಆ. 8ರಂದು ರೈಲು ಸಂಚಾರ ಆರಂಭಗೊಂಡಿತ್ತು