Ullal Darga: ಆ.17: ಉಳ್ಳಾಲ ದರ್ಗಾ ನೂತನ ಖಾಝಿ ಅಧಿಕಾರ ಸ್ವೀಕಾರ

Team Udayavani, Aug 14, 2024, 8:39 PM IST

ಮಂಗಳೂರು: ಉಳ್ಳಾಲ ಜುಮಾ ಮಸೀದಿಯ ಖಾಝಿಯಾಗಿ ನೇಮಕ ವಾಗಿರುವ ಇಂಡಿಯನ್‌ ಗ್ರಾಂಡ್‌ ಮುಫ್ತಿ ಸುಲ್ತಾನುಲ್‌ ಉಲಮಾ ಎ.ಪಿ. ಅಬೂಬಕ್ಕರ್‌ ಮುಸ್ಲಿಯಾರ್‌ ಅವರ ಅಧಿಕಾರ ಸ್ವೀಕಾರ ಕಾರ್ಯಕ್ರಮ ಆ. 17ರಂದು ಬೆಳಗ್ಗೆ 9.30ಕ್ಕೆ ದರ್ಗಾ ವಠಾರದ ಮದನಿ ಸಭಾಂಗಣದಲ್ಲಿ ಜರಗಲಿದೆ.

ಬುಧವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಉಳ್ಳಾಲ ದರ್ಗಾ ಅಧ್ಯಕ್ಷ ಬಿ.ಜಿ.ಹನೀಫ್‌ ಹಾಜಿ ಅವರು, ಉಳ್ಳಾಲ ಖಾಝಿ ಸಯ್ಯದ್‌ ಫಝಲ್ ಕೋಯಮ್ಮ ತಂಙಳ್‌ ನಿಧನದಿಂದ ತೆರವಾದ ಸ್ಥಾನಕ್ಕೆ ಅಬೂಬಕ್ಕರ್‌ ಮುಸ್ಲಿಯಾರ್‌ ಅವರನ್ನು ನೇಮಕ ಮಾಡಲಾಗಿದೆ ಎಂದರು.

ಇದೇ ವೇಳೆ ದರ್ಗಾ ಸಮಿತಿ ಮತ್ತು ಸಯ್ಯದ್‌ ಮದನಿ ಅರೆಬಿಕ್‌ ಟ್ರಸ್ಟ್‌ ಅಧೀನದ ಸಯ್ಯದ್‌ ಮದನಿ ಶರೀಅತ್‌ ಕಾಲೇಜು ವಿದ್ಯಾರ್ಥಿಗಳಿಗಾಗಿ ನೂತನ ಸುಸಜ್ಜಿತ ಹಾಸ್ಟೆಲ್ ಕಟ್ಟಡ ಶಿಲಾನ್ಯಾಸವನ್ನು ಅಬೂಬಕ್ಕರ್‌ ಮುಸ್ಲಿಯಾರ್‌ ನೆರವೇರಿಸಲಿದ್ದಾರೆ. ಕಾರ್ಯಕ್ರಮವನ್ನು ಸಯ್ಯದ್‌ ಕೆ.ಎಸ್‌. ಆಟಕ್ಕೋಯ ತಂಙಳ್‌ ಉದ್ಘಾಟಿಸಲಿದ್ದು, ಇ. ಸುಲೈಮಾನ್‌ ಉಸ್ತಾದ್‌, ಅಲೀ ಬಾಫಕಿ ತಂಙಳ್‌, ಸ್ಪೀಕರ್‌ ಯು.ಟಿ. ಖಾದರ್‌, ವಕ್ಫ್ ಸಚಿವ ಜಮೀರ್‌ ಅಹ್ಮದ್‌ ಖಾನ್‌, ಸಚಿವರಾದ ರಹೀಂ ಖಾನ್‌, ನಸೀರ್‌ ಅಹ್ಮದ್‌, ನಾಸಿರ್‌ ಹುಸೈನ್‌, ಯೇನಪೊಯದ ವೈ.ಅಬ್ದುಲ್ಲ ಕುಂಞ, ಬಿ.ಎಂ. ಫಾರೂಕ್‌ ಭಾಗವಹಿಸುವರು ಎಂದರು. ಪ್ರಧಾನ ಕಾರ್ಯದರ್ಶಿ ಮಹಮ್ಮದ್‌ ಶಿಹಾಬುದ್ದೀನ್‌ ಸಖಾಫಿ, ಕೋಶಾಧಿಕಾರಿ ನಾಝಿಮ್ ರಹ್ಮಾನ್‌ ಉಪಸ್ಥಿತರಿದ್ದರು.