Raj B Shetty: ಖ್ಯಾತ ಬಾಲಿವುಡ್‌ ನಿರ್ದೇಶಕನ ಸಿನಿಮಾದಲ್ಲಿ ಕನ್ನಡದ ರಾಜ್‌ ಬಿ ಶೆಟ್ಟಿ

Team Udayavani, Aug 15, 2024, 3:49 PM IST

ಬೆಂಗಳೂರು: ʼಒಂದು ಮೊಟ್ಟೆ ಕಥೆʼ ಮೂಲಕ ಸ್ಯಾಂಡಲ್‌ವುಡ್‌ (Sandalwood) ಜನಮನ ಗೆದ್ದ ಕರಾವಳಿಯ ಪ್ರತಿಭೆ ರಾಜ್‌ ಬಿ ಶೆಟ್ಟಿ(Raj B Shetty) ಇತ್ತೀಚೆಗೆ ಮಾಲಿವುಡ್‌ನಲ್ಲೂ ತನ್ನ ನಟನಾ ಕೌಶಲ್ಯ ತೋರಿಸಿ ಸೈ ಎನ್ನಿಸಿಕೊಂಡಿದ್ದಾರೆ.

ಮಾಲಿವುಡ್‌(Mollywood) ಸೂಪರ್‌ ಸ್ಟಾರ್‌ ಮಮ್ಮುಟ್ಟಿ(Mammootty) ಅವರೊಂದಿಗೆ ʼಟರ್ಬೋʼ ಸಿನಿಮಾದಲ್ಲಿ ನಟಿಸಿ ಮಾಲಿವುಡ್‌ ಪ್ರೇಕ್ಷಕರನ್ನು ರಂಜಿಸಿದ್ದಾರೆ. ರಾಜ್‌ ಬಿ ಶೆಟ್ಟಿ ಅವರ ಪ್ರತಿಭೆಯನ್ನು ಹುಡುಕಿಕೊಂಡು ಬಾಲಿವುಡ್‌ನಿಂದ ಅವರಿಗೆ ಖ್ಯಾತ ನಿರ್ದೇಶಕರೊಬ್ಬರಿಂದ ಆಫರ್‌ ಬಂದಿದೆ.

ರಾಜ್ ಬಿ ಶೆಟ್ಟಿ ನಿರ್ದೇಶಿಸಿ ಅಭಿನಯಿಸಿದ್ದ ‘ಗರುಡ ಗಮನ ವೃಷಭ ವಾಹನ’ ಕನ್ನಡದಲ್ಲಿ ಗಮನ ಸೆಳೆದಿತ್ತು. ಸಿನಿಮಾವನ್ನು ಬಾಲಿವುಡ್‌ನ ಖ್ಯಾತ ನಿರ್ದೇಶಕ ಅನುರಾಗ್‌ ಕಶ್ಯಪ್‌ (Anurag Kashyap) ಅವರು ಶ್ಲಾಫಿಸಿದ್ದರು.

ಇದೀಗ ಅನುರಾಗ್‌ ಕಶ್ಯಪ್‌ ಅವರಿಂದಲೇ ರಾಜ್‌ ಬಿ ಶೆಟ್ಟಿ ಅವರಿಗೆ ಆಫರ್‌ ಬಂದಿದೆ. ಅನುರಾಗ್‌ ಕಶ್ಯಪ್‌ ಹೊಸ ಹಿಂದಿ ಸಿನಿಮಾ ಮಾಡುತ್ತಿದ್ದಾರೆ. ಈ ಸಿನಿಮಾದಲ್ಲಿ ರಾಜ್‌ ಬಿ ಶೆಟ್ಟಿ ಅವರು ಅತಿಥಿ ಪಾತ್ರವನ್ನು ಮಾಡಲಿದ್ದಾರೆ. ಅತಿಥಿ ಪಾತ್ರದಲ್ಲಿದ್ದರೂ ಅವರ ಪಾತ್ರಕ್ಕೆ ಹೆಚ್ಚಿನ ಮಹತ್ವವಿರಲಿದೆ ಎನ್ನಲಾಗಿದೆ.

ಮಲಯಾಳಂನ ನಟ ಜೋಜು ಜಾರ್ಜ್ ಹಾಗೂ ʼಅನಿಮಲ್‌ʼನಲ್ಲಿ ಮಿಂಚಿದ್ದ ಬಾಬಿ ಡಿಯೋಲ್ (Bobby Deol) ಕೂಡ  ಈ ಸಿನಿಮಾದಲ್ಲಿ ರಾಜ್‌ ಬಿ ಶೆಟ್ಟಿ ಕಾಣಿಸಿಕೊಳ್ಳಲಿದ್ದಾರೆ.

ಬಾಲಿವುಡ್‌ ಎಂಟ್ರಿ ಬಗ್ಗೆ ಮಾತನಾಡುವ ರಾಜ್‌ ಬಿ ಶೆಟ್ಟಿ, “ಅನುರಾಗ್ ಕಶ್ಯಪ್ ಅವರ ಸಿನಿಮಾಗಳನ್ನು ನೋಡುತ್ತಾ ಬೆಳದವನು ನಾನು. ಅವರ ಸಿನಿಮಾಗಳು ಅಂದರೆ ಇಷ್ಟ. ಅವರ ಸಿನಿಮಾದಲ್ಲಿ ಒಂದು ಪಾತ್ರ ಇದೆ ಮಾಡುತ್ತೀಯಾ ಎಂದು ಕೇಳಿದರು. ನಾನು ಅದಕ್ಕೆ ಒಪ್ಪಿದೆ. ಸಿನಿಮಾದ ಶೀರ್ಷಿಕೆ ಸಮೇತ ಉಳಿದ ವಿವರವನ್ನು ಅವರೇ ಸದ್ಯದಲ್ಲಿಯೇ” ಎಂದು ಅವರು ಹೇಳಿದ್ದಾರೆ.

ಇದೇ ಆಗಸ್ಟ್‌ ತಿಂಗಳಿನಿಂದ ಸಿನಿಮಾದ ಚಿತ್ರೀಕರಣ ಆರಂಭಗೊಳ್ಳಲಿದೆ ಎನ್ನಲಾಗಿದೆ. ಸದ್ಯ ರಾಜ್‌ ಬಿ ಶೆಟ್ಟಿ ಅವರು, ಡಾ.ಶಿವರಾಜ್ ಕುಮಾರ್ ಮತ್ತು ಉಪೇಂದ್ರ ಅಭಿನಯದ, ಅರ್ಜುನ್ ಜನ್ಯ ನಿರ್ದೇಶನದ ’45’ ಚಿತ್ರದಲ್ಲಿ ನಟಿಸುತ್ತಿದ್ದಾರೆ.