Maharaja Trophy:ಮಳೆ ಪಂದ್ಯದಲ್ಲಿ ಮಂಗಳೂರಿಗೆ ಸೋಲು

Team Udayavani, Aug 17, 2024, 12:26 AM IST

ಬೆಂಗಳೂರು: “ಮಹಾರಾಜ ಟ್ರೋಫಿ’ ಕ್ರಿಕೆಟ್‌ ಪಂದ್ಯಾವಳಿಗೆ ಮಳೆ ಕಾಟ ಮುಂದುವರಿದಿದೆ. ಶುಕ್ರವಾರದ ಮೊದಲ “ಮಳೆ ಪಂದ್ಯ’ದಲ್ಲಿ ಹುಬ್ಬಳ್ಳಿ ಟೈಗರ್ ವಿಜೆಡಿ ನಿಯಮದಂತೆ ಮಂಗಳೂರು ಡ್ರ್ಯಾಗನ್ಸ್‌ಗೆ 15 ರನ್ನುಗಳ ಸೋಲುಣಿಸಿತು.

16 ಓವರ್‌ಗಳಿಗೆ ಇಳಿಸಲ್ಪಟ್ಟ ಪಂದ್ಯ ದಲ್ಲಿ ಮಂಗಳೂರು 7 ವಿಕೆಟಿಗೆ 143 ರನ್‌ ಗಳಿಸಿತು. ಹುಬ್ಬಳ್ಳಿಗೆ 7 ಓವರ್‌ಗಳಲ್ಲಿ 80 ರನ್‌ ಗುರಿ ನಿಗದಿಯಾಯಿತು. ಅದು 5.1 ಓವರ್‌ಗಳಲ್ಲಿ ಒಂದು ವಿಕೆಟಿಗೆ 69 ರನ್‌ ಮಾಡಿದಾಗ ಮತ್ತೆ ಮಳೆ ಸುರಿದ ಕಾರಣ ಪಂದ್ಯ ಮುಂದುವರಿಯಲಿಲ್ಲ. ಈ ಹಂತದಲ್ಲಿ ಹುಬ್ಬಳ್ಳಿ ಟೈಗರ್ 15 ರನ್‌ ಮುನ್ನಡೆಯಲ್ಲಿತ್ತು.

ಹುಬ್ಬಳ್ಳಿ ಪರ ನಾಯಕ ಮನೀಷ್‌ ಪಾಂಡೆ ಅಜೇಯ 24, ತಿಪ್ಪಾ ರೆಡ್ಡಿ ಅಜೇಯ 19 ರನ್‌ ಮಾಡಿದರು. ಮಂಗಳೂರು ತಂಡದ ಅಗ್ರ ಕ್ರಮಾಂಕದ ಬ್ಯಾಟರ್ ಉತ್ತಮ ಪ್ರದರ್ಶನವಿತ್ತರು. ಸಿದ್ಧಾರ್ಥ್ 44, ನಿಕಿನ್‌ ಜೋಸ್‌ 33, ರೋಹನ್‌ ಪಾಟೀಲ್‌ 24 ಮತ್ತು ಮೈಕಲ್‌ ನೊರೋನ್ಹಾ 23 ರನ್‌ ಮಾಡಿದರು. 30ಕ್ಕೆ 3 ವಿಕೆಟ್‌ ಉರುಳಿಸಿದ ಎಲ್‌.ಆರ್‌. ಕುಮಾರ್‌ ಹುಬ್ಬಳ್ಳಿಯ ಯಶಸ್ವಿ ಬೌಲರ್‌.

ಮೈಸೂರಿಗೆ ಜಯ
ಗುರುವಾರ ರಾತ್ರಿಯ ಮೈಸೂರು ವಾರಿಯರ್-ಶಿವಮೊಗ್ಗ ಲಯನ್ಸ್‌ ನಡುವಿನ ಪಂದ್ಯದ ಫ‌ಲಿತಾಂಶವೂ ವಿಜೆಡಿ ನಿಯಮದಂತೆ ನಿರ್ಧಾರಗೊಂಡಿತು. ಇದನ್ನು ಮೈಸೂರು 7 ರನ್ನುಗಳಿಂದ ಜಯಿಸಿತು. ಮೈಸೂರು 8 ವಿಕೆಟಿಗೆ 159 ರನ್‌ ಗಳಿಸಿದರೆ, ಶಿವಮೊಗ್ಗ 9 ಓವರ್‌ಗಳಲ್ಲಿ 5 ವಿಕೆಟಿಗೆ 80 ರನ್‌ ಮಾಡಿತು.