US ;ಟೆಕ್ಸಾಸ್ ನಲ್ಲಿ ಭೀಕರ ಅಪಘಾತದಲ್ಲಿ ಭಾರತೀಯ ಮೂಲದ ಮೂವರ ದುರ್ಮರಣ

Team Udayavani, Aug 18, 2024, 6:30 PM IST

ಟೆಕ್ಸಾಸ್ (ಯುಎಸ್ ): ಟೆಕ್ಸಾಸ್‌ನಲ್ಲಿ ಸಂಭವಿಸಿದ ಭೀಕರ ಕಾರು ಅಪಘಾತದಲ್ಲಿ ಭಾರತೀಯ ಮೂಲದ ಕುಟುಂಬದ ಮೂವರು ಸೇರಿದಂತೆ ಐವರು ಸಾವನ್ನಪ್ಪಿದ್ದಾರೆ.

ಹೃದಯ ವಿದ್ರಾವಕ ದುರಂತ ಬುಧವಾರ(ಆಗಸ್ಟ್ 14) ಬೆಳಗ್ಗೆ 5:45 ಕ್ಕೆ (ಸ್ಥಳೀಯ ಕಾಲಮಾನ) ಲಂಪಾಸಾಸ್ ಕೌಂಟಿಯಲ್ಲಿ ನಡೆದಿದೆ ಎಂದು ಆಸ್ಟಿನ್ ಅಮೆರಿಕನ್-ಸ್ಟೇಟ್ಸ್‌ಮನ್ ವರದಿ ಮಾಡಿದೆ. ದುರಂತದಲ್ಲಿ ಪ್ರಾಣ ಕಳೆದುಕೊಂಡ ಎಲ್ಲಾ ಐವರನ್ನು ಗುರುತಿಸಲಾಗಿದೆ ಎಂದು ಸಾರ್ವಜನಿಕ ಸುರಕ್ಷತಾ ವಿಭಾಗದ ಅಧಿಕಾರಿಗಳು ತಿಳಿಸಿದ್ದಾರೆ. ಅಪಘಾತದ ತೀವ್ರತೆಗೆ ಕಾರು ಸುಟ್ಟು ಕರಕಲಾಗಿರುವ ಚಿತ್ರಗಳು ಭೀಕರತೆಯನ್ನು ಸಾರುತ್ತಿದೆ.

ಅಪಘಾತದ ಬಳಿಕ ಬೆಂಕಿ ಹೊತ್ತಿ ಉರಿದಿದ್ದು, ಅರವಿಂದ್ ಮಣಿ(45),ಪತ್ನಿ ಪ್ರದೀಪಾ ಅರವಿಂದ್(40) ಮತ್ತು ಪುತ್ರಿ ಆಂಡ್ರಿಲ್ ಅರವಿಂದ್ (17) ಮೃತ ದುರ್ದೈವಿಗಳು. ಡಿಪಿಎಸ್ ವರದಿಯ ಪ್ರಕಾರ, ಮೂವರ ಕುಟುಂಬವು ಟೆಕ್ಸಾಸ್‌ನ ಲಿಯಾಂಡರ್ ನಗರದಲ್ಲಿ ನೆಲೆಸಿತ್ತು. ಅಪಘಾತದ ಸಮಯದಲ್ಲಿ ಅವರೊಂದಿಗೆ ಕಾರಿನಲ್ಲಿ ಇಲ್ಲದ ಆದಿರ್ಯಾನ್‌(14) ಬದುಕುಳಿದಿದ್ದು, ಏಕಾಂಗಿಯಾಗಿದ್ದಾನೆ.ಸಂಕಷ್ಟದ ಸಮಯದಲ್ಲಿ ಬಾಲಕನಿಗೆ ಎಲ್ಲ ರೀತಿಯಲ್ಲಿ ನೆರವು ನೀಡುತ್ತೇವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.