Vinay Rajkumar: ‘ಪೆಪೆ’ ಸರಳವಲ್ಲ, ವಿಭಿನ್ನ…

Team Udayavani, Aug 27, 2024, 11:58 AM IST

ಇತ್ತೀಚೆಗೆ ತನ್ನ ಶೀರ್ಷಿಕೆಯಿಂದಲೇ ಸದ್ದು ಮಾಡುತ್ತಿರುವ ವಿನಯ್‌ ರಾಜ್‌ಕುಮಾರ್‌ ನಟನೆಯ “ಪೆಪೆ’ ಸಿನಿಮಾ ಆ. 30ರಂದು ಬಿಡುಗಡೆಯಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಚಿತ್ರದ ಕುರಿತು ಶ್ರೀಲೇಶ್‌ ನಾಯರ್‌ ಮಾತನಾಡಿದ್ದಾರೆ.

“ಇದು ಸರಳ ಕಥೆಯಲ್ಲ, ಸಂಕೀರ್ಣ ಕಥೆ’ ಎನ್ನುತ್ತಾ ಸಿನಿಮಾ ಬಗ್ಗೆ ಮಾತು ಆರಂಭಿಸಿದ ಶ್ರೀಲೇಶ್‌, “ಚಿತ್ರದ ಕಥಾನಾಯಕನ ಹೆಸರು ಪ್ರದೀಪ್‌. ಎಲ್ಲರೂ ಅವನನ್ನು ಪೆಪೆ ಎಂದು ಕರೆಯುತ್ತಾರೆ. ನಾನು ಮೂಲ ಕೇರಳದವನು ಅಲ್ಲಿ ಈ ಹೆಸರು ಸಾಮಾನ್ಯ. ಇಲ್ಲಿ ನಾಯಕನ ಪಾತ್ರದ ಹೆಸರೇ ಚಿತ್ರದ ಶೀರ್ಷಿಕೆ. ಇದು ನನ್ನ ಮೊದಲ ಕಮರ್ಷಿಯಲ್‌ ದೊಡ್ಡಮಟ್ಟದ ಸಿನಿಮಾ. ನಾನು ಮೊದಲು ಕಥೆ ಹೇಳಿದ್ದೇ ವಿನಯ್‌ ಅವರಿಗೆ. ಒಂದೇ ಬಾರಿ ಕೇಳಿ, ಇಷ್ಟಪಟ್ಟು ಸಿನಿಮಾ ಒಪ್ಪಿಕೊಂಡ್ರು’ ಎನ್ನುತ್ತಾರೆ ಶ್ರೀಲೇಶ್‌.

ಈವರೆಗೆ ಕೌಟುಂಬಿಕ, ಸಾಫ್ಟ್ ಪಾತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡವರು ವಿನಯ್‌ ಅವರನ್ನು ಆ ಚೌಕಟ್ಟಿನಿಂದಾಚೆಗೆ ಶ್ರೀಲೇಶ್‌ ಕರೆತಂದಿದ್ದಾರೆ.

ಪೆಪೆಯಲ್ಲಿ ವಿನಯ್‌ ಅವರ ಹೊಸ ಅವತಾರ ಹಾಗೂ ಚಿತ್ರದ ಬಗ್ಗೆ ಮತ್ತಷ್ಟು ಹೇಳುವ ಶ್ರೀಲೇಶ್‌, “ನಿಜ, ವಿನಯ್‌ ಅವರು ಮೊದಲು ಈ ರೀತಿ ಪಾತ್ರ ಮಾಡಿರಲಿಲ್ಲ. ಅವರನ್ನು ನಿರ್ದೇಶಿಸುವುದು ಬಹಳ ಸುಲಭ. ಕಥೆ, ಸನ್ನಿವೇಶ ಕೇಳಿದ ಮೇಲೆ ಅದರಲ್ಲೇ ಮುಳುಗಿಬಿಡ್ತಾ ಇದ್ದರು. ಪಾತ್ರಕ್ಕೆ  ಅವರ ಮಾನಸಿಕ ತಯಾರಿ ಹೆಚ್ಚಾಗಿರುತ್ತಿತ್ತು. ಪೆಪೆಯದ್ದು ಸೇಡು ತೀರಿಸಿಕೊಳ್ಳುವ ಕಥಾಹಂದರ. ಇಲ್ಲಿ ಕಾಮಿಡಿ ಇಲ್ಲ. ಮಾಸ್‌ ಅಂಶಗಳನ್ನು ಕಲಾತ್ಮಕವಾಗಿ, ಕೆಲವು ಗಾಢ ವಿಚಾರಗಳನ್ನು ನೇರವಾಗಿ ಹೇಳಲಾಗಿದೆ. ಚಿತ್ರದ ಕಥೆ ಜತೆಗೆ ಇದರ ಪಾತ್ರಗಳೂ ಪ್ರಮುಖ. ಹಾಗೆ ಬಂದು ಹೋಗುವ ಪಾತ್ರ ಇಲ್ಲಿಲ್ಲ. ಪ್ರತಿ ಪಾತ್ರ ತಮ್ಮದೇ ಭಾವನೆ ಪ್ರದರ್ಶಿಸುತ್ತದೆ’ ಎಂಬುದು ನಿರ್ದೇಶಕ ಶ್ರೀಲೇಶ್‌ ಮಾತು.