Kumble ಆಸ್ಪತ್ರೆಯ ದಾದಿ ಸಾವು: ಮೃತದೇಹ ಕಲ್ಲಿಕೋಟೆಗೆ

Team Udayavani, Aug 28, 2024, 10:46 PM IST

ಕುಂಬಳೆ: ಬಂದ್ಯೋಡಿನ ಖಾಸಗಿ ಆಸ್ಪತ್ರೆಯ ನರ್ಸಿಂಗ್‌ ಟ್ರೈನಿಯಾದ ಕೊಲ್ಲಂ ತೆನ್ಮಲ ಉರಕ್ಕುಳಂ ಸ್ಮೃತಿ ಭವನದ ಎಸ್‌.ಜೆ.ಸ್ಮೃತಿ (20) ಹಾಸ್ಟೆಲ್‌ ಕೊಠಡಿಯಲ್ಲಿ ನೇಣು ಬಿಗಿದು ಸಾವಿಗೀಡಾದ ಸ್ಥಿತಿಯಲ್ಲಿ ಪತ್ತೆಯಾದ ಘಟನೆಗೆ ಸಂಬಂಧಿಸಿ ಸಂಬಂಧಿಕರು ಸಂಶಯ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಕಲ್ಲಿಕೋಟೆಯ ಮೆಡಿಕಲ್‌ ಕಾಲೇಜು ಆಸ್ಪತ್ರೆಗೆ ಕೊಂಡೊಯ್ಯಲಾಗಿದೆ.

ಸೋಮವಾರ ಮಧ್ಯಾಹ್ನ ಬಂದ್ಯೋಡ್‌ನ‌ಲ್ಲಿರುವ ಹಾಸ್ಟೆಲ್‌ ಕೊಠಡಿಯಲ್ಲಿ ನೇಣು ಬಿಗಿದು ಸಾವಿಗೀಡಾದ ಸ್ಥಿತಿಯಲ್ಲಿ ಮೃತದೇಹ ಪತ್ತೆಯಾಗಿತ್ತು. ಕಳೆದ ಮೂರು ತಿಂಗಳಿನಿಂದ ಬಂದ್ಯೋಡ್‌ನ‌ ಖಾಸಗಿ ಆಸ್ಪತ್ರೆಯೊಂದರಲ್ಲಿ ನರ್ಸಿಂಗ್‌ ಟ್ರೈನಿಯಾಗಿ ಕೆಲಸ ನಿರ್ವಹಿಸುತ್ತಿದ್ದರು. ಹಾಸ್ಟೇಲ್‌ನ ಒಂದನೇ ಮಹಡಿಯ ಕೊಠಡಿಯಲ್ಲಿ ಮಂಚದ ಮೇಲಿನ ಕಬ್ಬಿಣ ಸರಳಿಗೆ ಶಾಲು ಬಳಸಿ ನೇಣು ಬಿಗಿದ ಸ್ಥಿತಿಯಲ್ಲಿ ಮೃತದೇಹ ಪತ್ತೆಯಾಗಿತ್ತು. ಪುತ್ರಿಯನ್ನು ಕೊಲೆಗೈದು ತೂಗು ಹಾಕಲಾಗಿದೆ ಎಂದು ತಂದೆ ಕೋಮಳ ರಾಜನ್‌ ದೂರು ನೀಡಿದ್ದರಿಂದ ಮೃತದೇಹವನ್ನು ಕಲ್ಲಿಕೋಟೆಗೆ ಕೊಂಡೊಯ್ಯಲಾಗಿದೆ.

ನಕಲಿ ಲಾಟರಿ ಮಾರಾಟ : ಕೇಸು ದಾಖಲು
ಉಪ್ಪಳ: ಲಾಟರಿ ನಿಯಮವನ್ನು ಉಲ್ಲಂಘಿಸಿ ಆನ್‌ಲೈನ್‌ ಮೂಲಕ ಕೇರಳ ರಾಜ್ಯಲಾಟರಿಯ ನಕಲಿ ಲಾಟರಿ ಮಾರಾಟ ಮಾಡಿದ ಆರೋಪದಂತೆ ಮಂಜೇಶ್ವರ ಪೊಲೀಸರು ಮಜೀರ್ಪಳ್ಳದಲ್ಲಿ ಲಾಟರಿ ಏಜೆಂಟ್‌ ಆಗಿರುವ ಜೋಜೋ ವಿರುದ್ಧ ಕೇಸು ದಾಖಲಿಸಿದ್ದಾರೆ.

ಇದಕ್ಕೆ ಬಳಸಿದ ಲ್ಯಾಪ್‌ಟಾಪ್‌ ಹಾಗು ಮೊಬೈಲ್‌ ಫೋನ್‌ ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಬಗ್ಗೆ ತನಿಖೆಯನ್ನು ತೀವ್ರಗೊಳಿಸಲಾಗುವುದು ಎಂದಿದ್ದಾರೆ.