Financial Crisis; ಹಿಮಾಚಲದಲ್ಲಿ ಸಚಿವರು, ಶಾಸಕರ ವೇತನಕ್ಕೂ ದುಡ್ಡಿಲ್ಲ!

ಪ್ರವಾಹದಿಂದ ಹಣವಿಲ್ಲ: ಸಿಎಂ; ರಾಜ್ಯ ಸರಕಾರ ದಿವಾಳಿ: ಬಿಜೆಪಿ

Team Udayavani, Aug 30, 2024, 7:20 AM IST

Financial Crisis; ಹಿಮಾಚಲದಲ್ಲಿ ಸಚಿವರು, ಶಾಸಕರ ವೇತನಕ್ಕೂ ದುಡ್ಡಿಲ್ಲ!

ಶಿಮ್ಲಾ: ಕಾಂಗ್ರೆಸ್‌ ಆಡಳಿತದ ಹಿಮಾಚಲ ಪ್ರದೇಶದಲ್ಲಿ ಆರ್ಥಿಕ ಬಿಕ್ಕಟ್ಟು ಸೃಷ್ಟಿಯಾಗಿದ್ದು, ಸಚಿವರು ಮತ್ತು ಶಾಸಕರಿಗೆ ಸಂಬಳ ನೀಡಲು ಹಣದ ಕೊರತೆ ಎದು ರಾಗಿದೆ. ಈ ಹಿಂದೆ ಆಡಳಿತ ನಡೆಸಿದ ಬಿಜೆಪಿಯೇ ಆರ್ಥಿಕ ಬಿಕ್ಕಟ್ಟಿಗೆ ಕಾರಣ ಎಂದು ಕಾಂಗ್ರೆಸ್‌ ಆರೋಪಿಸಿದರೆ ರಾಹುಲ್‌ ಗಾಂಧಿ ಪ್ರಣೀತ ಉಚಿತ ಕೊಡುಗೆಗಳೇ ದಿವಾಳಿಗೆ ಕಾರಣ ಎಂದು ಬಿಜೆಪಿ ತಿರುಗೇಟು ನೀಡಿದೆ.

ಎದುರಾಗಿರುವ ಆರ್ಥಿಕ ಬಿಕ್ಕಟ್ಟನ್ನು ನಿರ್ವಹಿಸಲು ಮುಂದಾಗಿರುವ ಮುಖ್ಯ ಮಂತ್ರಿ ಸುಖ್ವಿಂದರ್ ಸಿಂಗ್ ಸುಖು, “ಸಚಿವ ಸಂಪುಟದ ಸಹೋದ್ಯೋಗಿಗಳು, ಮುಖ್ಯ ಸಂಸದೀಯ ಕಾರ್ಯದರ್ಶಿಗಳು ಹಾಗೂ ಸಂಪುಟ ದರ್ಜೆಯ ಸದಸ್ಯರು 2 ತಿಂಗಳ ಕಾಲ ಸಂಬಳ ಹಾಗೂ ಭತ್ತೆಗಳನ್ನು ಪಡೆಯದಿರಲು ನಿರ್ಧರಿಸಿದ್ದಾರೆ’ ಎಂದು ಗುರುವಾರ ವಿಧಾನಸಭೆಗೆ ತಿಳಿಸಿದ್ದಾರೆ.

ಯಾಕೆ ಆರ್ಥಿಕ ಬಿಕ್ಕಟ್ಟು?
ಈ ಸ್ಥಿತಿಗೆ ಹಿಂದೆ ಆಡಳಿತ ನಡೆಸಿದ ಬಿಜೆಪಿ ಕಾರಣ. 15ನೇ ಹಣಕಾಸು ಆಯೋಗದಪ್ರಕಾರ 10 ಸಾವಿರ ಕೋ.ರೂ. ಅನುದಾನ ಕೊರತೆ ಎದುರಾಗಿದೆ.

ಅಂದಿನಿಂದ ಇಂದಿನವರೆಗೆ ಈ ಅನುದಾನ ಕುಸಿಯುತ್ತಲೇ ಇದೆ. ಬಿಜೆಪಿ ಜಾರಿಗೊಳಿಸಿದ ಉಚಿತ ನೀರು ಮತ್ತು ವಿದ್ಯುತ್‌ ಯೋಜನೆಗಳಿಂದಾಗಿ ಬೊಕ್ಕಸಕ್ಕೆ 1,080 ಕೋಟಿ ರೂ. ಹೊರೆಯಾಗುತ್ತಿದೆ ಎಂದು ಸಿಎಂ ಸುಖು ಆರೋಪಿಸಿದ್ದಾರೆ.

ಕಳೆದ ಒಂದು ವರ್ಷದಲ್ಲಿ ಸಂಭವಿಸಿದ ನೈಸರ್ಗಿಕ ವಿಪತ್ತುಗಳು ರಾಜ್ಯವನ್ನು ಹಿಂಡಿ ಹಿಪ್ಪಿ ಮಾಡಿವೆ. ಪರಿಹಾರ ಕಾರ್ಯಗಳನ್ನು ಕೈಗೊಳ್ಳಲು ಹಣದ ಕೊರತೆ ಎದುರಾಗಿದೆ. ಆಗಸ್ಟ್‌ನಲ್ಲಿ ಪುನರ್‌ನಿರ್ಮಾಣ ಕಾರ್ಯಗಳಿಗೆ 4,500 ಕೋಟಿ ರೂ. ನೀಡಿದ್ದರೂ ಅದು ಸಾಲದಾಗಿದೆ. ಕೇಂದ್ರ ಸರಕಾರ 2022ರಿಂದ ಜಿಎಸ್‌ಟಿ ಪಾಲನ್ನು ನೀಡಿಲ್ಲ ಎಂದು ಅವರು ಆರೋಪಿಸಿದ್ದಾರೆ.

ಬಿಜೆಪಿ ಆರೋಪ ಏನು?
ಸಿಎಂ ಸುಖು ವಿರುದ್ಧ ನಿರ್ಧಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿರುವ ವಿಪಕ್ಷ ನಾಯಕ, ಬಿಜೆಪಿಯ ಜೈರಾಮ್‌ ಠಾಕೂರ್‌, ಸಂವಿಧಾನಕ್ಕೆ ವಿರುದ್ಧವಾಗಿ ಮುಖ್ಯ ಸಂಸದೀಯ ಕಾರ್ಯದರ್ಶಿಗಳನ್ನು ನೇಮಕ ಮಾಡಿಕೊಂಡಿದ್ದಾರೆ. ಬಹಳಷ್ಟು ಜನರಿಗೆ ಸಚಿವ ಸಂಪುಟ ದರ್ಜೆ ಸ್ಥಾನಮಾನ ನೀಡಿದ್ದಾರೆ. ಇದರಿಂದ ವೆಚ್ಚ ಹೆಚ್ಚಾಗಿದೆ. ತಮ್ಮ ತಪ್ಪು ಬಿಟ್ಟು ಶಾಸಕರಿಗೆ ಸಂಬಳ ಕೈಬಿಡುವಂತೆ ಹೇಳುತ್ತಿದ್ದಾರೆಂದು ಆರೋಪಿಸಿದ್ದಾರೆ.

ಗ್ಯಾರಂಟಿಗಳಿಂದ ಕರ್ನಾಟಕದಲ್ಲೂ
ಆರ್ಥಿಕ ಬಿಕ್ಕಟ್ಟು ಗ್ಯಾರಂಟಿ: ಬಿಜೆಪಿ
ಹಿಮಾಚಲ ಆರ್ಥಿಕ ಪರಿಸ್ಥಿತಿಯ ಬಗ್ಗೆ ಟೀಕಿಸಿರುವ ಬಿಜೆಪಿ ವಕ್ತಾರ ಪ್ರದೀಪ್‌ ಭಂಡಾರಿ, ಸರಕಾರದ ಬಳಿ ಸಂಬಳ ನೀಡಲು ಹಣವಿಲ್ಲ. ಹಿಮಾಚಲದ ಇಂದಿನ ಪರಿಸ್ಥಿತಿಗೆ ರಾಹುಲ್‌ ಗಾಂಧಿಯ ಉಚಿತ ಕೊಡುಗೆಗಳ ಗ್ಯಾರಂಟಿ ಯೋಜನೆಗಳೇ ಕಾರಣ. ಕರ್ನಾಟಕ ದಲ್ಲೂ ಆರ್ಥಿಕ ಬಿಕ್ಕಟ್ಟು ನಿರ್ಮಾಣ ವಾಗುತ್ತಿದೆ ಎಂದು ಹೇಳಿದ್ದಾರೆ.