NEET ಪರೀಕ್ಷೆ ಗೆದ್ದು ಸಾಧಿಸಿದ ದಿಲ್ಲಿ ಸಮೋಸಾ ಮಾರಾಟಗಾರ

Team Udayavani, Aug 31, 2024, 6:50 AM IST

ನೋಯ್ಡಾ: 18 ವರ್ಷದ ಸಮೋಸಾ ಮಾರಾಟಗಾರ ಸನ್ನಿ ಕುಮಾರ್‌ ನೀಟ್‌ ಯುಜಿ ಪರೀಕ್ಷೆಯಲ್ಲಿ ಉತ್ತಮ ಅಂಕ ಗಳಿಸಿ ಎಲ್ಲರಿಗೂ ಮಾದರಿ ಯಾಗಿದ್ದಾರೆ. ನಿರಂತರ ತರಬೇತಿಯ ಬಳಿಕವೂ ಇದು ಅಸಾಧ್ಯ ಎನ್ನುವ ವ್ಯಕ್ತಿಗಳಿಗೆ ಅಚ್ಚರಿಯಾಗುವಂತೆ 720 ಒಟ್ಟು ಅಂಕಗಳಿಗೆ 664 ಅಂಕಗಳನ್ನು ಗಳಿಸಿ ಸಾಧನೆ ಮಾಡಿದ್ದಾರೆ.

ಸಮೋಸಾ ಅಂಗಡಿ ನಡೆಸಿ ಜೀವನ ಮಾಡುವ ನೋಯ್ಡಾದ ಸನ್ನಿ ಕುಮಾರ್‌ ನಿತ್ಯ ಸಂಜೆ 4ರಿಂದ 5 ಗಂಟೆ ಅಂಗಡಿಯಲ್ಲೇ ಕಳೆಯುತ್ತಾರೆ. ಇಂತಹ ಕಷ್ಟದ ನಡುವೆ ವೈದ್ಯನಾಗುವ ಆಸಕ್ತಿ ಹೇಗೆ ಬಂತು ಎಂದರೆ ಸನ್ನಿ ಹೇಳುವ ಉತ್ತರ ಕುತೂಹಲ. ಔಷಧಗಳನ್ನು ನೋಡಿ ಕುತೂಹಲ ಹೆಚ್ಚಾಗಿತ್ತು. ಇಷ್ಟು ಚಿಕ್ಕ ಔಷಧ ಅಷ್ಟು ದೊಡ್ಡ ದೊಡ್ಡ ಕಾಯಿಲೆಗಳನ್ನು ಹೇಗೆ ಗುಣಪಡಿಸುತ್ತದೆ ಎಂದು ಕುತೂಹಲ ಮೂಡಿತು ಎನ್ನುತ್ತಾರೆ ಸನ್ನಿ.

11ನೇ ತರಗತಿಯಿಂದಲೂ “ಫಿಸಿಕ್ಸ್‌ ವಾಲಾ’ ಆನ್‌ಲೈನ್‌ ತರಬೇತಿ ವೇದಿಕೆಯಿಂದ ಕಲಿತು ನೀಟ್‌ ಪರೀಕ್ಷೆ ಬರೆದಿದ್ದಾರೆ. ಫಿಸಿಕ್ಸ್‌ ವಾಲಾದ ಮುಖ್ಯಸ್ಥ ಅಲಖ್‌ ಪಾಂಡೆ ಸನ್ನಿ ಅವರ ಸ್ಪೂರ್ತಿದಾಯಕ ಗಾಥೆಯ ವೀಡಿಯೋ ಹಂಚಿಕೊಂಡಿದ್ದು ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.