Kasargod: ಮೀನಿಗೆ ಗಾಳ ಹಾಕಲು ಹೋಗಿದ್ದ ಯುವಕ ನಾಪತ್ತೆ  

Team Udayavani, Aug 31, 2024, 9:29 PM IST

ಕಾಸರಗೋಡು: ಮೀನುಗಾರಿಕೆಗಾಗಿ ಗಾಳ ಹಾಕಲು ಹೋದ ಯುವಕ ನಾಪತ್ತೆಯಾದ ಘಟನೆ ನಡೆದಿದೆ.

ಕೀಯೂರು ಮೀನುಗಾರಿಕಾ ಬಂದರು ಪರಿಸರದಲ್ಲಿ ಮೀನುಗಾರಿಕೆಗೆ ಗಾಳ ಹಾಕಲು ಹೋಗಿದ್ದ ಚೆಮ್ನಾಡ್‌ ನಿವಾಸಿ ರಿಯಾಸ್‌(40) ನಾಪತ್ತೆಯಾಗಿದ್ದು, ಈ ಬಗ್ಗೆ ಸಂಬಂಧಿಕರು ಮೇಲ್ಪರಂಬ ಪೊಲೀಸರಿಗೆ ದೂರು ನೀಡಿದ್ದಾರೆ. ಕೋಸ್ಟಲ್‌ ಪೊಲೀಸ್‌ ಪಡೆ ಸಮುದ್ರದಲ್ಲಿ ಶೋಧ ಆರಂಭಿಸಿದೆ.

ಬೆಳಗ್ಗೆ 5 ಗಂಟೆಗೆ ಮನೆಯಿಂದ ಹೋಗಿದ್ದರು. ಬ್ಯಾಗ್‌ ಹಾಗು ಸ್ಕೂಟರ್‌ ಬಂದರು ಸಮೀಪ ಪತ್ತೆಯಾಗಿದೆ. ಫೋನ್‌ನಲ್ಲಿ ಕರೆ ಮಾಡಿದರೂ ಸ್ವೀಕರಿಸಲಿಲ್ಲ. ಬ್ಯಾಗ್‌ನಿಂದ ಮೊಬೈಲ್‌ ಫೋನ್‌ ಹಾಗು ಗಾಳ ಹಾಕಲು ಬಳಸುವ ಉಪಕರಣಗಳು ಪತ್ತೆಯಾಗಿವೆ. ಗಾಳ ಹಾಕುತ್ತಿದ್ದಂತೆ ಆಕಸ್ಮಿಕವಾಗಿ ಸಮುದ್ರಕ್ಕೆ ಬಿದ್ದಿರಬಹುದೆಂದು ಶಂಕಿಸಲಾಗಿದೆ.