Kasaragod ಅಪರಾಧ ಸುದ್ದಿಗಳು

Team Udayavani, Sep 3, 2024, 9:06 PM IST

ಬೆಡ್‌ ರೂಂ ದೃಶ್ಯಗಳನ್ನು ಚಿತ್ರೀಕರಿಸಿ ಬ್ಲ್ಯಾಕ್‌ ಮೇಲ್‌ : ಬಂಧನ
ಕಾಸರಗೋಡು: ಸ್ನೇಹಿತನಾದ ಯುವಕನ ಬೆಡ್‌ರೂಂ ದೃಶ್ಯಗಳನ್ನು ರಹಸ್ಯ ಕ್ಯಾಮರಾದಲ್ಲಿ ಚಿತ್ರೀಕರಿಸಿ ಅದನ್ನು ತೋರಿಸಿ ಬ್ಲ್ಯಾಕ್‌ ಮೇಲ್‌ಗೊಳಿಸಿ ಅಪಹರಿಸಿ 58 ಲಕ್ಷ ರೂ. ಎಗರಿಸಿದ ಪ್ರಕರಣಕ್ಕೆ ಸಂಬಂಧಿಸಿ ಆರೋಪಿಯಾದ ಕಾಸರಗೋಡು ಚಟ್ಟಂಚಾಲ್‌ ಬಂದಾಡ್‌ ಹೌಸ್‌ನ ಅಬ್ದುಲ್‌ ರಹ್ಮಾನ್‌(43)ನನ್ನು ಕೊಚ್ಚಿ ಕಡವತ್ರ ಪೊಲೀಸರು ಬಂಧಿಸಿದ್ದಾರೆ.

ಈತನ ವಿರುದ್ಧ ಸ್ನೇಹಿತ ಕಾಸರಗೋಡು ನಿವಾಸಿ ನೀಡಿದ ದೂರಿನಂತೆ ಅಬ್ದುಲ್‌ ರಹ್ಮಾನ್‌ ಸಹಿತ ಆರು ಮಂದಿ ವಿರುದ್ಧ ಪೊಲೀಸರು ಕೇಸು ದಾಖಲಿಸಿದ್ದರು. ದೂರು ನೀಡಿದ 30 ರ ಹರೆಯದ ಯುವಕ ಕಲ್ಲುರ ಕತ್ತುಕಡವು ರಸ್ತೆ ಪರಿಸರದಲ್ಲಿ ಹೊಟೇಲ್‌ ನಡೆಸುತ್ತಿದ್ದಾರೆ. 2020 ಮಾರ್ಚ್‌ ತಿಂಗಳಲ್ಲಿ ರಹಸ್ಯವಾಗಿ ಚಿತ್ರೀಕರಿಸಿ ಬ್ಲ್ಯಾಕ್‌ ಮೇಲ್‌ ಮಾಡಿ ಹಣ ಲಪಟಾಯಿಸಿದ್ದನು. ಹಲವು ಬಾರಿಯಾಗಿ 52 ಲಕ್ಷ ರೂ. ಹಾಗು ಬ್ಯಾಂಕ್‌ ಮೂಲಕ ಆರು ಲಕ್ಷ ರೂ. ನೀಡಿದ್ದಾಗಿ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ. ಘಟನೆಗೆ ಸಂಬಂಧಿಸಿ ಕಾಸರಗೋಡು ನಿವಾಸಿಗಳಾದ ಇರ್ಫಾನ್‌, ಅಮ್ಮಿ, ಆಶಿಫ್‌, ಮಟ್ಟಂಚೇರಿ ನಿವಾಸಿಗಳಾದ ಇತರ ಇಬ್ಬರ ವಿರುದ್ಧ ಕೇಸು ದಾಖಲಿಸಲಾಗಿದೆ.

ಕಾರಡ್ಕ ಸೊಸೈಟಿ ವಂಚನೆ ಪ್ರಕರಣ; ಮತ್ತೆ 160 ಗ್ರಾಂ ಚಿನ್ನ ವಶಕ್ಕೆ
ಮುಳ್ಳೇರಿಯ: ಕಾರಡ್ಕ ಅಗ್ರಿಕಲ್ಚರಿಸ್ಟ್‌ ವೆಲ್ಫೈರ್‌ ಕೋ-ಆಪರೇಟಿವ್‌ ಸೊಸೈಟಿಯಿಂದ ಲಪಟಾಯಿಸಿದ ಚಿನ್ನಾಭರಣಗಳ ಪೈಕಿ ಮತ್ತೆ 160 ಗ್ರಾಂ ಚಿನ್ನವನ್ನು ವಶಪಡಿಸಲಾಗಿದೆ. ಪೆರಿಯದ ಸೊಸೈಟಿಯೊಂದರಲ್ಲಿ ಅಡವಿರಿಸಿದ ಚಿನ್ನವನ್ನು ರಾಜ್ಯ ಕ್ರೈಂ ಬ್ರಾಂಚ್‌ನ ಆರ್ಥಿಕ ಅಪರಾಧ ಪತ್ತೆ ವಿಭಾಗದ ಇನ್ಸ್‌ಪೆಕ್ಟರ್‌ ಅನೀಶ್‌ ನೇತೃತ್ವದಲ್ಲಿ ವಶಪಡಿಸಲಾಗಿದೆ.

ಸೊಸೈಟಿಯಿಂದ ಲಪಟಾಯಿಸಿದ ಚಿನ್ನದ ಪೈಕಿ 63 ಪವನ್‌ ಚಿನ್ನಾಭರಣ ಪೆರಿಯದ ಬ್ಯಾಂಕೊಂದರಲ್ಲಿ ಅಡವಿರಿಸಿರುವುದಾಗಿಯೂ ಕ್ರೈಂಬ್ರಾಂಚ್‌ ತನಿಖೆಯಲ್ಲಿ ತಿಳಿದು ಬಂದಿದೆ. ಈ ಚಿನ್ನವನ್ನು ವಶಪಡಿಸಿಕೊಳ್ಳಲು ತನಿಖಾ ತಂಡ ಕ್ರಮ ಆರಂಭಿಸಿದೆ. ಸೊಸೈಟಿಯಲ್ಲಿ 4.76 ಕೋಟಿ ರೂ. ವಂಚನೆ ನಡೆದಿದೆ.

ಬಡಗಿಗೆ ಒಲಿದ 80 ಲಕ್ಷ ರೂ.
ಕಾಸರಗೋಡು: ಕಾರುಣ್ಯ ಪ್ಲಸ್‌ ಲಾಟರಿಯ ಪ್ರಥಮ ಬಹುಮಾನ 80 ಲಕ್ಷ ರೂ. ಚಟ್ಟಂಚಾಲ್‌ ನಿವಾಸಿ ಅಶೋಕನ್‌ ಅವರಿಗೆ ಲಭಿಸಿದೆ. ಕಾಸರಗೋಡು ನಗರದ ಕೆಎಸ್‌ಆರ್‌ಟಿಸಿ ಬಸ್‌ ನಿಲ್ದಾಣದ ಮಧು ಲಾಟರಿ ಏಜೆನ್ಸಿಯಿಂದ ಟಿಕೆಟ್‌ ಖರೀದಿಸಿದ್ದರು.