Belthangady: ಮಾನವನ ಸ್ವಯಂಕೃತ ಅಪರಾಧದಿಂದ ಬಹುಪಾಲು ಸಮಸ್ಯೆ

Team Udayavani, Sep 4, 2024, 1:06 PM IST

ಬೆಳ್ತಂಗಡಿ: ಕಡಿದಾದ ಪ್ರದೇಶ ದಲ್ಲಿ ಭೂ ಸಮತಟ್ಟು ಮಾಡಿ ಬೆಟ್ಟವನ್ನು ಕಡಿದು ಮನೆಗಳ ನಿರ್ಮಿಸಿದ ಪರಿಣಾಮ ಪ್ರಸಕ್ತ ಸಾಲಿನ ಮಳೆಗೆ ಶೇ.80ರಷ್ಟು ಮನೆಗಳು ಹಾನಿಗೊಳಗಾಗಿರುವ ವರದಿ ಬಹಿರಂಗವಾಗಿದೆ.

ಬೆಳ್ತಂಗಡಿ ತಾಲೂಕಿನಲ್ಲಿ 2019ರ ಆಗಸ್ಟ್‌ನಲ್ಲಿ ಪ್ರವಾಹ ಎದುರಾದಾಗ ಅನೇಕ ಮನೆಗಳು ಹಾನಿಗೀಡಾಗಿದ್ದವು. ಈ ಭಾರೀ ಮಳೆ 2019ರ ಪ್ರವಾಹವನ್ನು ನೆನಪಿಸುವಂತಿತ್ತು. ಆದರೆ ಅಂದು ಪ್ರಾಕೃತಿಕ ವಿಕೋಪಕ್ಕೆ ಸಂಭವಿಸಿದ ಹಾನಿಯಾದರೆ, ಪ್ರಸಕ್ತ ಸಾಲಿನಲ್ಲಿ ಮಾನವ ಸ್ವಯಂಕೃತ ಅಪರಾಧದಿಂದ ಬಹುಪಾಲು ಹಾನಿ ಸಂಭವಿಸಿರುವುದು ಸ್ಪಷ್ಟವಾಗಿದೆ.

ಗರಿಷ್ಠ 220 ಮಿ.ಮೀ. ವರೆಗೆ ಮಳೆ ಜೂನ್‌ 2024ರಿಂದ ಈ ವರೆಗೆ ಬೆಳ್ತಂಗಡಿ ತಾಲೂಕಿನಲ್ಲಿ ಒಟ್ಟು 233 ಮನೆಗಳು ಹಾನಿಗೊಳಗಾಗಿದೆ. ಬೆಳ್ತಂಗಡಿ ತಾಲೂಕಿನಲ್ಲಿ ಈ ಬಾರಿ ಸರಾಸರಿ ಕನಿಷ್ಠ 30ರಿಂದ ಗರಿಷ್ಠ 220 ಮಿ.ಮೀ. ವರೆಗೆ ಮಳೆಯಾಗಿದೆ.

ಪರಿಣಾಮ 233 ಮನೆಗಳು ಭಾಗಶಃ ಹಾನಿ ಗೀಡಾಗಿವೆ. ಈ ಪೈಕಿ ಸುಮಾರು 191 ಮನೆ ಗಳು ಮೇಲೆ ಪಕ್ಕದ ಗುಡ್ಡ ಕುಸಿತದಿಂದಲೇ ಹಾನಿಗೊಳಗಾಗಿರುವುದು ಖಚಿತವಾಗಿದೆ.

ತೀವ್ರ ಮಳೆಯಿಂದಾಗಿ ಈ ಬಾರಿ ಹೆಚ್ಚಿನ ಹಾನಿ ಸಂಭವಿಸಿದೆ. ಬೆಟ್ಟ ಹಾಗೂ ಗುಡ್ಡಗಾಡು ಪ್ರದೇಶದಲ್ಲಿ ಭೂಮಿ ಸಮತಟ್ಟು ಮಾಡಿ ಮನೆ ನಿರ್ಮಿಸಿದಲ್ಲಿ ಹೆಚ್ಚಿನ ಹಾನಿ ಸಂಭವಿಸಿದೆ. ಮುಂದೆ ಹೀಗಾಗದಂತೆ ಜಿಲ್ಲಾ ಧಿಕಾರಿಗಳ ನೇತೃತ್ವದ ತಂಡ ಹೊಸ ನಿಯಮ ಜಾರಿಗೆ ತರುವಲ್ಲಿ ವಿಶ್ಲೇಷಣೆ ನಡೆಸುತ್ತಿದೆ. ಮುಂದೆ ಹೊಸ ನಿಯಮ ಜಾರಿಗೆ ಬರುವ ಸಾಧ್ಯತೆಯಿದೆ.
-ಪೃಥ್ವಿ ಸಾನಿಕಮ್‌ ತಹಶೀಲ್ದಾರ್‌, ಬೆಳ್ತಂಗಡಿ

ಗ್ರಾಪಂ ಮಟ್ಟದಲ್ಲಿ ಈ ಬಾರಿ ಹಾನಿಗೊಳಗಾದ ಮನೆ, ರಸ್ತೆ, ಸೇತುವೆ ಸಹಿತ ಸಮಗ್ರ ಮಾಹಿತಿ ಪಡೆದು ವರದಿ ಸಿದ್ಧಪಡಿಸಿ ನೀಡಲಾ ಗಿದೆ. ಇದಕ್ಕಾಗಿಯೇ ಜಿಲ್ಲಾಡಳಿತ ನಿಯೋಜಿಸಿದ ತಂಡ ವರದಿ ನೀಡಿದೆ. ಅದರಂತೆ ಹಾನಿಗೊಳಗಾದ ರಸ್ತೆ, ಸೇತುವೆ ದುರಸ್ತಿಗೆ ಅನುದಾನ ಕೋರಿ ಸರಕಾರಕ್ಕೆ ಬರೆಯಲಾಗಿದೆ.
– ಭವಾನಿ ಶಂಕರ್‌, ಇಒ, ತಾ.ಪಂ. ಬೆಳ್ತಂಗಡಿ

ಹಾನಿ ಹಾಗೂ ಪರಿಹಾರ ವಿವರ
ಸಂಪೂರ್ಣ ಹಾನಿ: 15 ಮನೆ-ತಲಾ 1.25 ಲ.ರೂ.
ಶೇ.15-20 ಹಾನಿ: 141 ಮನೆ- ತಲಾ 6,500 ರೂ. ನಂತೆ 9,16,500 ಲ.ರೂ.
ಶೇ.20-50 ಹಾನಿ: 50 ಮನೆ -ತಲಾ 30,000ರೂ. ನಂತೆ 15,00,000 ಲ.ರೂ.
ಶೇ.50-75 ಹಾನಿ: 5 ಮನೆ- ತಲಾ 50,000ರೂ. ನಂತೆ 2,50,000 ಲ.ರೂ. ಪರಿಹಾರ
ಜಾನುವಾರ ಹಾನಿ: 2 ಹಸು, 1 ಕರು – 57,000 ರೂ. ಪರಿಹಾರ
ಕೃಷಿ ಹಾನಿ: 10 ಹೆಕ್ಟೇರ್‌ ಭತ್ತ ಬೆಳೆ ನಾಶ
ತೋಟಗಾರಿಕೆ-ಶೇ.33, ಹೆಚ್ಚಿನ ಹಾನಿಯಿಲ್ಲ.

ನಿಯಮ ಬಾಹಿರ ಮನೆ ನಿರ್ಮಾಣ
ಮನೆ ನಿರ್ಮಾಣಕ್ಕಾಗಿ ಸ್ಥಳೀಯಾಡಳಿತ ಕಾಯ್ದಿರಿಸಿದ ಸ್ಥಳಗಳೇ ಬಹುತೇಕ ಸುರಕ್ಷತೆಯಿಲ್ಲ. ಈ ನಡುವೆ ಖಾಸಗಿ ಸ್ಥಳಗಳಲ್ಲಿ ಕೆಲವೆಡೆ ಮನೆಗಳು ನಿಯಮ ಬಾಹಿರವಾಗಿ ನಿರ್ಮಿಸಿರುವುದು ಇದಕ್ಕೆ ಕಾರಣವಾಗಿದೆ. ಮನೆ ಪಕ್ಕ 90 ಡಿಗ್ರಿ ಲಂಭವಾಗಿ ಗುಡ್ಡವನ್ನು ಕಡಿದು ಸಮೀಪವೇ ಮನೆ ನಿರ್ಮಿಸಿದ ಅನೇಕ ಮನೆಗಳಿವೆ. ಸೆಟ್‌ ಬ್ಯಾಕ್‌ ಬಿಡುವ ಉದ್ದೇಶ ಬಹುತೇಕ ನಿಯಮ ಗಾಳಿಗೆ ತೂರಲಾಗಿದೆ. ಇವೆಲ್ಲ ಈ ವರ್ಷದ ವರ್ಷಧಾರೆಗೆ ಕುಸಿತ ಉಂಟಾಗಿದೆ.

248 ಮನೆ ಹಾನಿ 45 ಲಕ್ಷ ರೂ. ಪರಿಹಾರ ತಾಲೂಕಿನಲ್ಲಿ ಪ್ರಸಕ್ತ ಸಾಲಿನಲ್ಲಿ 15 ಮನೆ ಸಂಪೂರ್ಣ ಹಾನಿಗೀಡಾಗಿದ್ದು ತಲಾ 1.25 ಲಕ್ಷ ರೂ.ನಂತೆ 18,75,000 ಲಕ್ಷ ರೂ.ನೆರವು, 223 ಭಾಗಶಃ ಮನೆ ಹಾನಿಗಳ ಪೈಕಿ 191 ಮನೆಗಳನ್ನು ಮೂರು ರೀತಿಯಲ್ಲಿ ವಿಂಗಡಿಸಲಾಗಿದೆ. ಜಾನುವಾರು ಸೇರಿ ಒಟ್ಟು 45,98,500 ಲಕ್ಷ ರೂ. ನೆರವನ್ನು ಜಿಲ್ಲಾಡಳಿತದ ಮೇರೆಗೆ ತಾಲೂಕು ಆಡಳಿತದಿಂದ ನೀಡಲಾಗಿದೆ.

-ಚೈತ್ರೇಶ್‌ ಇಳಂತಿಲ