ID Card ಇಲ್ಲದೇ ರೂಂ ಕೊಡಲ್ಲ ಎಂದ ಮ್ಯಾನೇಜರ್‌ ಗೆ ಹಿಗ್ಗಾಮುಗ್ಗಾ ಥಳಿತ: ನಾಲ್ವರ ಬಂಧನ

Team Udayavani, Sep 9, 2024, 11:51 AM IST

ಜಬಲ್ಪುರ್(ಮಧ್ಯಪ್ರದೇಶ): ಅಧಿಕೃತ ಗುರುತು ಪತ್ರ(Identity Card) ಇಲ್ಲದೆ ರೂಂ(Room) ನೀಡಲ್ಲ ಎಂದ ಹೋಟೆಲ್‌ ಮ್ಯಾನೇಜರ್‌(Manager) ಅನ್ನು ಐದಾರು ಜನರ ಗುಂಪು ರಸ್ತೆ ಮಧ್ಯೆ ಎಳೆದು ತಂದು ಹಿಗ್ಗಾಮುಗ್ಗಾ ಥಳಿಸಿರುವ ಘಟನೆ ಮಧ್ಯಪ್ರದೇಶದ ಜಬಲ್ಪುರ್‌ ನಲ್ಲಿ ನಡೆದಿದ್ದು, ಈ ಹೊಡೆದಾಟದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.

ಮಾಹಿತಿ ಪ್ರಕಾರ, ಆರೋಪಿ ಸೋನು ತಿವಾರಿ ಹೋಟೆಲ್‌ ಗೆ ಭೇಟಿ ನೀಡಿ, ರೂಂ ಬುಕ್‌ ಮಾಡಲು ಹೇಳಿದ್ದ. ಆದರೆ ಮ್ಯಾನೇಜರ್‌ ಮನ್‌ ಜೀತ್‌ ಅಧಿಕೃತ ಐಡೆಂಟಿಟಿ ಕಾರ್ಡ್‌ ಇಲ್ಲದೆ ರೂಂ ಕೊಡಲು ನಿರಾಕರಿಸಿದ್ದ, ಆಗ ಇಬ್ಬರ ನಡುವೆ ವಾಗ್ವಾದ ನಡೆದಿತ್ತು. ಏತನ್ಮಧ್ಯೆ ಸೋನು ಹೋಟೆಲ್‌ ನಿಂದ ಹೊರಟು ಹೋಗಿದ್ದ ಎಂದು ತಿಳಿಸಿದೆ.

ಮರುದಿನ ಸೋನು ತನ್ನ ಗೆಳೆಯರ ಗುಂಪಿನೊಂದಿಗೆ ಬಂದು ಮ್ಯಾನೇಜರ್‌ ನನ್ನು ರಸ್ತೆಗೆ ಎಳೆದು ತಂದು, ಹಿಗ್ಗಾಮುಗ್ಗಾ ಹೊಡೆದು, ಆ ದೃಶ್ಯವನ್ನು ವಿಡಿಯೋ ಚಿತ್ರೀಕರಣ ಮಾಡಿ, ಇನ್ಸ್ಟಾಗ್ರಾಮ್‌ ನಲ್ಲಿ ಅಪ್‌ ಲೋಡ್‌ ಮಾಡಿದ್ದರು ಎಂದು ವರದಿ ವಿವರಿಸಿದೆ.

#WATCH | MP: Hotel Manager Attacked After Denying Room Without Authentic Identity Card In Jabalpur#MadhyaPradesh #MPNews pic.twitter.com/CoxhGVMm4L

— Free Press Madhya Pradesh (@FreePressMP) September 8, 2024

ಘಟನೆಗೆ ಸಂಬಂಧಿಸಿದಂತೆ ಪೊಲೀಸರ ಸಿನಿಮಾ ಶೈಲಿಯ ಕಾರ್ಯಾಚರಣೆ ಮೂಲಕ ನಾಲ್ವರು ಆರೋಪಿಗಳನ್ನು ಬಂಧಿಸಿದ್ದು, ಆರೋಪಿಗಳನ್ನು ಪೊಲೀಸರು ಸಾರ್ವಜನಿಕವಾಗಿ ಮೆರವಣಿಗೆ ಮಾಡಿಸಿ ಎಚ್ಚರಿಕೆಯ ಸಂದೇಶ ರವಾನಿಸಿರುವುದಾಗಿ ವರದಿ ತಿಳಿಸಿದೆ.‌