Salaar 2: ಪ್ರಭಾಸ್ – ಪ್ರಶಾಂತ್‌ ʼಸಲಾರ್-2‌ʼನಲ್ಲಿ ಸೂಪರ್‌ ಸ್ಟಾರ್‌ ಮೋಹನ್‌ ಲಾಲ್?‌

Team Udayavani, Sep 10, 2024, 3:41 PM IST

ಹೈದರಾಬಾದ್:‌ ಡಾರ್ಲಿಂಗ್‌ ಪ್ರಭಾಸ್‌ (Prabhas) ʼಸಲಾರ್‌ʼ(Salaar) ಹಾಗೂ ʼಕಲ್ಕಿ 2898 ಎಡಿʼ (Kalki 2898 AD) ಮೂಲಕ ಬ್ಯಾಕ್‌ ಟು ಬ್ಯಾಕ್‌ ಮೆಗಾ ಹಿಟ್‌ ಕೊಟ್ಟಿದ್ದಾರೆ.

ಪ್ರಶಾಂತ್‌ ನೀಲ್ (Prashanth Neel) ಅವರ‌ ʼಸಲಾರ್‌-2ʼ ಬಗ್ಗೆಯೂ ದೊಡ್ಡ ನಿರೀಕ್ಷೆಯನ್ನಿಟ್ಟುಕೊಳ್ಳಲಾಗಿದೆ. ಆದರೆ ʼಸಲಾರ್-2‌ʼ(Salaar Part 2: Shouryaanga) ಆರಂಭಕ್ಕೂ ಮುನ್ನ ಪ್ರಭಾಸ್‌ ಬೇರೆ ಪ್ರಾಜೆಕ್ಟ್‌ಗಳತ್ತ ಮುಖ ಮಾಡಿದ್ದಾರೆ.

ಪ್ರಭಾಸ್‌ ಅವರ ಮುಂದಿನ ಸಿನಿಮಾದ ಬಗ್ಗೆ ಚರ್ಚೆ ಆಗುತ್ತಿರುವ ಬೆನ್ನಲ್ಲೇ ʼಸಲಾರ್-2‌ʼನಲ್ಲಿ ಖ್ಯಾತ ದಕ್ಷಿಣ ಭಾರತದ ಕಲಾವಿದರೊಬ್ಬರು ಬಣ್ಣ ಹಚ್ಚಲಿದ್ದಾರೆ ಎನ್ನುವ ಸುದ್ದಿಯೊಂದು ಹರಿದಾಡಿದೆ.

ಮಾಲಿವುಡ್‌ ಸೂಪರ್‌ ಸ್ಟಾರ್‌ ಮೋಹನ್‌ ಲಾಲ್‌ (Mohanlal) ಅವರನ್ನು ʼಸಲಾರ್-2‌ʼ ನಲ್ಲಿ ಪ್ರಧಾನ ಪಾತ್ರವೊಂದರಲ್ಲಿ ನಟಿಸಲು ಕೇಳಿಕೊಂಡಿದೆ ಎಂದು ʼಟ್ರ್ಯಾಕ್‌ ಟಾಲಿವುಡ್‌ʼ ವರದಿ ತಿಳಿಸಿದೆ.

ಈ ಹಿಂದೆ ಮೋಹನ್‌ ಲಾಲ್‌ ʼಜನತಾ ಗ್ಯಾರೇಜ್‌ʼ ಎನ್ನುವ ತೆಲುಗು ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು.

ಇನ್ನೊಂದೆಡೆ ರವಿ ಬಸ್ರೂರ್ ಅವರ ಬದಲಿಗೆ ಅನಿರುದ್ಧ್ ರವಿಚಂದರ್ ಅವರು ಮ್ಯೂಸಿಕ್‌ ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ ಎನ್ನುವ ಮಾತುಗಳೂ ಕೇಳಿ ಬರುತ್ತಿದೆ. ಈ ಪ್ರಾಜೆಕ್ಟ್ ಪ್ರಸ್ತುತ ಪ್ರಿ-ಪ್ರೊಡಕ್ಷನ್ ಹಂತದಲ್ಲಿದೆ.

ಇನ್ನು ಸಲಾರ್‌ -2 ನಲ್ಲೂ ಪ್ರಭಾಸ್ ಜತೆ ಶ್ರುತಿ ಹಾಸನ್, ಪೃಥ್ವಿರಾಜ್ ಸುಕುಮಾರನ್, ಶ್ರೀಯಾ ರೆಡ್ಡಿ, ಜಗಪತಿ ಬಾಬು ಮತ್ತು ಇತರರು ಇರಲಿದ್ದಾರೆ. 2025ರಲ್ಲಿ ರಿಲೀಸ್‌ ಆಗುವ ಸಾಧ್ಯತೆಯಿದೆ.

ಸದ್ಯ ಪ್ರಭಾಸ್‌ ʼರಾಜಾಸಾಬ್‌ʼ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದು, ಆ ಬಳಿಕ ಸಂದೀಪ್‌ ವಂಗಾ ಅವರ ʼಸ್ಪಿರಿಟ್‌ʼ ಕೂಡ ಸರತಿ ಸಾಲಿನಲ್ಲಿದೆ.