Bastar: ನಕ್ಸಲ್‌ ಪೀಡಿತ ಬಸ್ತಾರ್‌ನಲ್ಲಿ 20 ವರ್ಷ ಬಳಿಕ ಶಾಲೆ ಆರಂಭ

Team Udayavani, Sep 11, 2024, 5:16 AM IST

ರಾಯ್ಪುರ: 2 ದಶಕಗಳ ಹಿಂದೆ ಬಸ್ತಾರ್‌ನಲ್ಲಿ ಮಾವೋವಾದಿಗಳ ಗುಂಡಿನ ಹಾಗೂ ಬಾಂಬ್‌ಗಳ ದಾಳಿಯಿಂದ ಮುಚ್ಚಲ್ಪಟ್ಟಿದ್ದ 41 ಶಾಲೆಗಳನ್ನು ಪುನರಾರಂಭ ಮಾಡಲಾಗಿದೆ. ಬಸ್ತಾರ್‌ ವಲಯದಲ್ಲಿ ಕಳೆದ ಕೆಲವು ತಿಂಗಳುಗಳಿಂದ ಪ್ರಾಥಮಿಕ ಶಾಲೆಗಳನ್ನು ಮತ್ತೆ ತೆರೆಯಲಾಗಿದೆ.

ದಾಳಿಯಿಂದ ಅತಿ ಹೆಚ್ಚು ಹಾನಿಗೊಳ ಗಾಗಿದ್ದ ಅಲ್ಲಿನ ಬಿಜಾಪುರ ಜಿಲ್ಲೆಯಲ್ಲಿ 34 ಶಾಲೆಗಳನ್ನು ಪುನಃಸ್ಥಾಪಿಸಲಾಗಿದೆ. ಸುಕ್ಮಾದ ಕೊಂಟಾ ಪ್ರದೇಶದಲ್ಲಿ 5 ಮತ್ತು ನಾರಾಯಣಪುರದಲ್ಲಿ 2 ಶಾಲೆಗಳನ್ನು ಮತ್ತೆ ತೆರೆಯಲಾಗಿದೆ.

2005-2006ರಲ್ಲಿ ಮಾವೋವಾದಿ ಹಿಂಸಾಚಾರದಿಂದ ಈ ಶಾಲೆಗಳನ್ನು ಮುಚ್ಚಲಾಗಿತ್ತು. ಈಗ ಈ ಶಾಲೆಗಳಲ್ಲಿ 532 ವಿದ್ಯಾರ್ಥಿಗಳು ಈಗಾಗಲೇ ದಾಖಲಾಗಿದ್ದಾರೆ. ಅವರಲ್ಲಿ ಅರ್ಧದಷ್ಟು ಹೆಣ್ಣು ಮಕ್ಕಳೇ ಇದ್ದಾರೆ ಎಂದು ಬಸ್ತಾರ್‌ ವಿಭಾಗದ ಶಿಕ್ಷಣ ಇಲಾಖೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಇವುಗಳಲ್ಲಿ ಒಂದು ಶಾಲೆ ಬಿಜಾಪುರ ಜಿಲ್ಲೆಯ ಅರಣ್ಯ ಕುಗ್ರಾಮವಾದ ಮುದ್ವೆಂಡಿ ಎಂಬ ಗ್ರಾಮದಲ್ಲಿದೆ.  ಅಲ್ಲಿ ಈ ವರ್ಷದ ಮೇ, ಜುಲೈನಲ್ಲಿ ಮಾವೋವಾದಿಗಳು ಐಇಡಿ ಸ್ಫೋಟಿಸಿದ್ದರಿಂದ ಇಬ್ಬರು ಮಕ್ಕಳು ಮೃತಪಟ್ಟಿದ್ದರು. ಸದ್ಯಕ್ಕೆ ಈ ಶಾಲೆಯನ್ನು ಬಿದಿರಿನ ಶೆಡ್‌ನ‌ಲ್ಲಿ ತಾತ್ಕಾಲಿಕ ವ್ಯವಸ್ಥೆ ಮಾಡಲಾಗಿದ್ದು,  ಶೀಘ್ರದಲ್ಲೇ ನವೀಕರಿಸುವುದಾಗಿ ಶಿಕ್ಷಣ ಇಲಾಖೆ ಹೇಳಿಕೊಂಡಿದೆ.