Kasaragod: ಕೊ*ಲೆ ಪ್ರಕರಣ: ವಿಚಾರಣೆ ಪೂರ್ಣ; ಶೀಘ್ರ ತೀರ್ಪು ಪ್ರಕಟ ನಿರೀಕ್ಷೆ

ಮೊಗ್ರಾಲ್‌ನಲ್ಲಿ ಹ*ತ್ಯೆ ಆರೋಪಿಯ ತಲೆ ಕಡಿದಿದ್ದ ಪ್ರಕರಣ

Team Udayavani, Sep 13, 2024, 6:15 AM IST

ಕಾಸರಗೋಡು: ಕೊಲೆ ಪ್ರಕರಣದ ಆರೋಪಿಯ ತಲೆ ಕಡಿದ ಪ್ರಕರಣದ ವಿಚಾರಣೆ ಕಾಸರಗೋಡು ಹೆಚ್ಚುವರಿ ಜಿಲ್ಲಾ ಸೆಶನ್ಸ್‌ ನ್ಯಾಯಾಲಯ(ದ್ವಿತೀಯ)ದಲ್ಲಿ ಪೂರ್ಣಗೊಂಡಿದ್ದು, ಶೀಘ್ರ ತೀರ್ಪು ಹೊರಬರಲಿದೆ.

ಕುಂಬಳೆ ಸಮೀಪದ ಪೊಟ್ಟೋಡಿಮೂಲೆ ವೀಟಿಲ್‌ನ ಮುಹಮ್ಮದ್‌ ಕುಂಞಿ ಹಾಜಿ ಅವರ ಪುತ್ರ ಅಬ್ದುಲ್‌ ಸಲಾಂ (22) ಅವರು ಕೊಲೆ ಆರೋಪದಲ್ಲಿ 7 ಮಂದಿ ವಿರುದ್ಧ ಪ್ರಕರಣ ದಾಖಲಾಗಿತ್ತು.

2012 ಎ.30ರಂದು ಸಂಜೆ ಮೊಗ್ರಾಲ್‌ ಮಾಳಿಯಂಗರ ಕೋಟಾದ ನಿರ್ಜನ ಹಿತ್ತಿಲಿನಲ್ಲಿ ಅಬ್ದುಲ್‌ ಸಲಾಂ ಅವರನ್ನು ತಲೆ ಕಡಿದು ಕೊಲೆಗೈಯಲಾಗಿತ್ತು. ಈ ಸಂದರ್ಭದಲ್ಲಿ ಈತನ ಜತೆಗಿದ್ದ ಸ್ನೇಹಿತ ನೌಶಾದ್‌(28) ಅವರನ್ನು ಇರಿದು ಗಂಭೀರ ಗಾಯಗೊಳಿಸಲಾಗಿತ್ತು. ಗಾಯಗೊಂಡ ನೌಶಾದ್‌ನನ್ನು ಆ್ಯಂಬುಲೆನ್ಸ್‌ನಲ್ಲಿ ಮಂಗಳೂರಿನ ಆಸ್ಪತ್ರೆಗೆ ಕೊಂಡೊಯ್ಯುತ್ತಿದ್ದಾಗ ದಾರಿ ಮಧ್ಯೆ ಆ್ಯಂಬುಲೆನ್ಸ್‌ ಮತ್ತು ಕಾರು ಢಿಕ್ಕಿ ಹೊಡೆದು ಕಾರಿನಲ್ಲಿದ್ದ ಮಾಳಂಗೈಯ ಯೂಸುಫ್‌ ಹಾಜಿ ಅವರ ಪತ್ನಿ ಸುಲೈಖಾ(60) ಮತ್ತು ಮೊಮ್ಮಗಳು ಮರಿಯಾಂ ಮುಫೀದಾ(17) ಸಾವಿಗೀಡಾಗಿದ್ದರು. ಇತರ ಮೂವರು ಗಾಯಗೊಂಡಿದ್ದರು.

ಕೊಲೆಯಾದ ಅಬ್ದುಲ್‌ ಸಲಾಂ ಕುಂಬಳೆ ಹಾಗೂ ಕಾಸರಗೋಡು ಪೊಲೀಸ್‌ ಠಾಣೆಗಳಲ್ಲಿ ದಾಖಲಾದ ಹಲವು ಪ್ರಕರಣಗಳಲ್ಲಿ ಆರೋಪಿಯಾಗಿದ್ದ. ಕುಂಬಳೆ ಪಂಚಾಯತ್‌ ಮಾಜಿ ಸದಸ್ಯ ಬಿ.ಎ.ಮುಹಮ್ಮದ್‌ ಅವರ ಪುತ್ರ ಪೇರಾಲ್‌ ಪೊಟ್ಟೋಡಿಯ ಶರೀಫ್‌ ಕೊಲೆ ಹಾಗೂ ಕಾಸರಗೋಡು ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ವಾಹನವೊಂದಕ್ಕೆ ಬೆಂಕಿ ಹಚ್ಚಿದ ಪ್ರಕರಣದಲ್ಲೂ ಅಬ್ದುಲ್‌ ಸಲಾಂ ಆರೋಪಿಯಾಗಿದ್ದ. ಅಬ್ದುಲ್‌ ಸಲಾಂನನ್ನು ಕೊಲೆಗೈದ ದಿನದ ಹಿಂದಿನ ದಿನದಂದು ಮುಂಜಾನೆ ಆತನ ನೇತೃತ್ವದ ತಂಡ ಮಾಂಙಾಮುಡಿ ಸಿದ್ಧಿಕ್‌ ಅವರ ಮನೆಗೆ ನುಗ್ಗಿ ದಾಳಿ ನಡೆಸಿತ್ತೆಂದೂ, ಇದಕ್ಕೆ ಪ್ರತೀಕಾರವಾಗಿ ಆರೋಪಿಗಳು ಸಲಾಂನನ್ನು ಕೊಲೆಗೈದಿದ್ದಾರೆಂದು ಪೊಲೀಸರು ತಿಳಿಸಿದ್ದಾರೆ.