Exam ಅಕ್ಟೋಬರ್‌ 3ಕ್ಕೆ ಪಿಎಸ್‌ಐ ಪರೀಕ್ಷೆ ಮರು ನಿಗದಿ

Team Udayavani, Sep 14, 2024, 12:02 AM IST

ಬೆಂಗಳೂರು: ಈಗಾಗಲೇ ಮುಂದೂಡಿಕೆಯಾಗಿದ್ದ ಪಿಎಸ್‌ಐ ಪರೀಕ್ಷೆಯನ್ನು ಅಕ್ಟೋಬರ್‌ 3ಕ್ಕೆ ಮರು ನಿಗದಿ ಮಾಡಿದ್ದು, ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ಈ ಕುರಿತು ಅಧಿಕೃತವಾಗಿ ಪ್ರಕಟಿಸಲಿದೆ ಎಂದು ಗೃಹ ಸಚಿವ ಡಾ|ಜಿ. ಪರಮೇಶ್ವರ್‌ ತಿಳಿಸಿದರು.

ಸುದ್ದಿಗಾರರ ಜತೆ ಮಾತನಾಡಿ, ಯುಪಿಎಸ್ಸಿ ಅಭ್ಯರ್ಥಿಗಳ ಹಿತ, ಪ್ರತಿಪಕ್ಷದ ಒತ್ತಾಯದ ಮೇರೆಗೆ 402 ಪಿಎಸ್‌ಐ ಹುದ್ದೆಗಳಿಗೆ ನಿಗದಿತ ಸೆ.22ರ ಪರೀಕ್ಷೆ ಮುಂದೂಡಲಾಗಿತ್ತು.

ಅನಂತರ ಕೆಇಎ ಸೆ. 28ರ ಸ್ಲಾಟ್‌ ನೀಡಿತ್ತಾದರೂ ಮತ್ತೊಮ್ಮೆ ಯುಪಿಎಸ್ಸಿಗೆ ಸಂಪರ್ಕಿಸಿ ವಿಚಾರಿಸಿದಾಗ ಸೆ. 28ಕ್ಕೂ ಇಂಗ್ಲಿಷ್‌ ಜನರಲ್‌ ಪರೀಕ್ಷೆಯಿರುವ ಮಾಹಿತಿ ಬಂದಿದೆ. ಹೀಗಾಗಿ ಕೆಇಎ ಅ. 3ರ ಸ್ಲಾಟ್‌ ನೀಡಿದ್ದು, ಚರ್ಚಿಸಿ ಅಂತಿಮಗೊಳಿಸಲಾಗಿದೆ. ಕೆಇಎ ಅಧಿಕೃತವಾಗಿ ಈ ಕುರಿತು ಪ್ರಕಟನೆ ನೀಡಲಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.