Border Dispute: ಗಾಲ್ವನ್‌ ಸೇರಿ 4 ಗಡಿ ಪ್ರದೇಶಗಳಿಂದ ಸೇನೆ ವಾಪಸ್‌: ಚೀನ ಸರಕಾರ‌

Team Udayavani, Sep 15, 2024, 1:44 AM IST

ಹೊಸದಿಲ್ಲಿ: ಭಾರತದ ಜತೆಗಿನ ಗಡಿ ಬಿಕ್ಕಟ್ಟು ಶಮನವಾಗಿದೆ ಮತ್ತು ಗಾಲ್ವನ್‌ ಕಣಿವೆ ಸೇರಿದಂತೆ 3 ಸ್ಥಳಗಳಿಂದ ಶೇ.75ರಷ್ಟು ಸೇನೆಯನ್ನು ಹಿಂಪಡೆ ಯಲಾಗಿದೆ ಎಂದು ಚೀನ ಸರಕಾರ‌ ತಿಳಿಸಿದೆ.

ಜತೆಗೆ ಅಲ್ಲಿನ ಪರಿಸ್ಥಿತಿ ನಿಯಂತ್ರಣದಲ್ಲಿ ಇದೆ ಎಂದೂ ಚೀನ ವಿದೇಶಾಂಗ ಸಚಿವಾಲಯ ಹೇಳಿಕೊಂಡಿದೆ. ಆದರೆ ದೆಮ್‌ಚಾಕ್‌ ಮತ್ತು ದೆಸ್‌ಪಾಂಗ್‌ ಪ್ರದೇಶಗಳಲ್ಲಿ ಇನ್ನೂ ಚೀನ ಸೇನೆ ಇದೆ. ಈ ಪ್ರದೇಶಗಳಿಂದಲೂ ಕೂಡ ಸಂಪೂರ್ಣವಾಗಿ ಚೀನ ಸೇನೆ ಹಿಂದಕ್ಕೆ ಸರಿಯಬೇಕು ಎಂದು ಕೇಂದ್ರ ಸರಕಾರ‌ ಆಗ್ರಹಿಸುತ್ತಾ ಬಂದಿದೆ.

ಗಡಿ ತಂಟೆ ವಿಚಾರವಾಗಿ ಭಾರತ ಮತ್ತು ಚೀನದ ಸೇನಾಧಿಕಾರಿಗಳು ಇದುವರೆಗೆ 30 ಬಾರಿ ಮಾತುಕತೆ ನಡೆಸಿವೆ. ಆದರೆ ದೆಮ್‌ಚಾಕ್‌ ಮತ್ತು ದೆಸ್‌ಪಾಂಗ್‌ನಿಂದ ಸೇನೆ ವಾಪಸಾತಿ ಸಂಬಂಧ ಯಾವುದೇ ಪ್ರಗತಿ ಆಗಿರಲಿಲ್ಲ. ಸೆ.12ರಂದು ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್‌ ದೋವಲ್‌ ಮತ್ತು ಚೀನದ ವಿದೇಶಾಂಗ ಸಚಿವಾಲಯದ ವಾಂಗ್‌ ಈ ವಿಚಾರಕ್ಕೆ ಸಂಬಂಧಿಸಿದಂತೆ ಮಾತುಕತೆ ನಡೆದು, ಈ ನಿಟ್ಟಿನಲ್ಲಿ ಉಂಟಾಗಿರುವ ಪ್ರಗತಿ ಯನ್ನೂ ಪರಿಶೀಲಿಸಿದ್ದಾರೆ. 2020ರ ಜೂ.15 ರಂದು ಗಾಲ್ವನ್‌ನಲ್ಲಿ 2 ದೇಶಗಳ ನಡುವೆ ಸಂಘರ್ಷ ಉಂಟಾಗಿತ್ತು.