Cricket ದಾಖಲೆಯ ಹೊಸ್ತಿಲಲ್ಲಿ ಭಾರತ-ಬಾಂಗ್ಲಾ ಸರಣಿ

Team Udayavani, Sep 17, 2024, 7:00 AM IST

ಮುಂಬರುವ ಭಾರತ-ಬಾಂಗ್ಲಾ ದೇಶ ನಡುವಿನ ಟೆಸ್ಟ್‌ ಸರಣಿ ಅನೇಕ ದಾಖಲೆಗಳನ್ನು ತೆರೆದಿಡಲು ಸಜ್ಜಾಗಿದೆ. ತಂಡ ಹಾಗೂ ವೈಯಕ್ತಿಕ ಸಾಧನೆಗಳ ಮೂಲಕ ಈ ಸರಣಿ ಕುತೂಹಲ ಹುಟ್ಟಿಸಿದೆ. ಇಂಥ ಕೆಲವು ದಾಖಲೆಗಳನ್ನು ಇಲ್ಲಿ ಉಲ್ಲೇಖಿಸಲಾಗಿದೆ.

ಗೆಲುವು-ಸೋಲು ಸಮ ಸಮ
1932ರಲ್ಲಿ ಟೆಸ್ಟ್‌ ಮಾನ್ಯತೆ ಪಡೆ ದಂದಿನಿಂದಲೂ ಭಾರತದ ಸೋಲಿನ ಸಂಖ್ಯೆ ಗೆಲುವಿಗಿಂತ ಜಾಸ್ತಿಯೇ ಇದೆ. ಒಮ್ಮೆಯೂ ಗೆಲುವು “ಸೋಲಿನ ಗಡಿ’ ದಾಟಿ ಮುನ್ನಡೆದದ್ದಿಲ್ಲ. ಇದೀಗ ಗೆಲುವು-ಸೋಲುಗಳ ದಾಖಲೆ ಸಮನಾಗಿದೆ (178). ಸೋಲನ್ನು ಮೀರಿ ನಿಲ್ಲುವ ಅವಕಾಶವೊಂದು ಭಾರತಕ್ಕೆ ಎದುರಾಗಿದೆ.

ಕೊಹ್ಲಿ 9 ಸಾವಿರ ರನ್‌
ವಿರಾಟ್‌ ಕೊಹ್ಲಿ ಟೆಸ್ಟ್‌ ಕ್ರಿಕೆಟ್‌ನಲ್ಲಿ 9 ಸಾವಿರ ರನ್‌ ಕ್ಲಬ್‌ ಸೇರಲು ಇನ್ನು ಕೇವಲ 152 ರನ್‌ ಮಾಡಿದರೆ ಸಾಕು. ಆಗ ಅವರು 9 ಸಾವಿರ ರನ್‌ ಗಳಿಸಿದ ಭಾರತದ 4ನೇ ಕ್ರಿಕೆಟಿಗನಾಗಿ ಮೂಡಿಬರಲಿದ್ದಾರೆ. ಉಳಿದವರೆಂದರೆ ಸಚಿನ್‌ ತೆಂಡುಲ್ಕರ್‌ (15,921), ರಾಹುಲ್‌ ದ್ರಾವಿಡ್‌ (13,265) ಮತ್ತು ಸುನೀಲ್‌ ಗಾವಸ್ಕರ್‌ (10,122).

ರಹೀಂ 6 ಸಾವಿರ ರನ್‌
ಬಾಂಗ್ಲಾದ ಸೀನಿಯರ್‌ ಬ್ಯಾಟರ್‌ ಮುಶ್ಫಿಕರ್‌ ರಹೀಂ ಟೆಸ್ಟ್‌ ಕ್ರಿಕೆಟ್‌ನಲ್ಲಿ 6 ಸಾವಿರ ರನ್‌ ಗಡಿಯಲ್ಲಿ ನಿಂತಿದ್ದಾರೆ. ಇದಕ್ಕೆ ಬೇಕಿರುವುದಿನ್ನು 108 ರನ್‌ ಮಾತ್ರ. ಆಗ ರಹೀಂ ಬಾಂಗ್ಲಾ ಪರ ಈ ಮೈಲುಗಲ್ಲು ನೆಟ್ಟ ಮೊದಲ ಕ್ರಿಕೆಟಿಗನೆಂಬ ಹಿರಿಮೆಗೆ ಭಾಜನರಾಗಲಿದ್ದಾರೆ.

ಜಡೇಜ 300 ವಿಕೆಟ್‌
ಆಲ್‌ರೌಂಡರ್‌ ರವೀಂದ್ರ ಜಡೇಜ 300 ಟೆಸ್ಟ್‌ ವಿಕೆಟ್‌ಗಳಿಂದ ಸ್ವಲ್ಪವೇ ದೂರದಲ್ಲಿದ್ದಾರೆ. ಅವರಿನ್ನು 6 ವಿಕೆಟ್‌ ಉರುಳಿಸಿದರೆ ಸಾಕು. ಆಗ 300 ವಿಕೆಟ್‌ ಕೆಡವಿದ ಭಾರತದ 6ನೇ ಬೌಲರ್‌ ಆಗಲಿದ್ದಾರೆ. ಹಾಗೆಯೇ 300 ವಿಕೆಟ್‌ ಪ್ಲಸ್‌ 3 ಸಾವಿರ ರನ್‌ ಸಾಧನೆಗೈದ ವಿಶ್ವದ 11ನೇ, ಭಾರತದ 2ನೇ ಸವ್ಯಸಾಚಿಯಾಗಲಿದ್ದಾರೆ. ಕಪಿಲ್‌ದೇವ್‌ ಮತ್ತು ಅಶ್ವಿ‌ನ್‌ ಉಳಿದಿಬ್ಬರು.

ತೈಜುಲ್‌ ಇಸ್ಲಾಮ್‌ 200 ವಿಕೆಟ್‌
ಬಾಂಗ್ಲಾದ ಎಡಗೈ ಸ್ಪಿನ್ನರ್‌ ತೈಜುಲ್‌ ಇಸ್ಲಾಮ್‌ 200 ವಿಕೆಟ್‌ ಪೂರ್ತಿಗೊಳಿಸಲು ಐದೇ ವಿಕೆಟ್‌ ಉರುಳಿಸಬೇಕಿದೆ. ಆಗ ಈ ಸಾಧನೆಗೈದ ಬಾಂಗ್ಲಾದ 2ನೇ ಕ್ರಿಕೆಟಿಗನಾಗಲಿದ್ದಾರೆ. ಶಕಿಬ್‌ ಅಲ್‌ ಹಸನ್‌ ಮೊದಲಿಗ (245 ವಿಕೆಟ್‌).

ಮೊದಲ ಜಯದ ನಿರೀಕ್ಷೆ

ಬಾಂಗ್ಲಾದೇಶ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಈವರೆಗೆ ಭಾರತವನ್ನು ಸೋಲಿಸಿಲ್ಲ. ಆಡಿದ 13 ಪಂದ್ಯಗಳಲ್ಲಿ 11 ಸೋಲನುಭವಿಸಿದೆ. 2 ಡ್ರಾ ಆಗಿವೆ. ಪಾಕಿಸ್ಥಾನಕ್ಕೆ ವೈಟ್‌ವಾಶ್‌ ಮಾಡಿದ ಕಾರಣ ಈ ಬಾರಿ ಮೊದಲ ಗೆಲುವಿನ ನಿರೀಕ್ಷೆಯಲ್ಲಿದೆ.

27 ಸಾವಿರ ರನ್‌ ಗಡಿಯಲ್ಲಿ ಕೊಹ್ಲಿ
ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 27 ಸಾವಿರ ರನ್‌ ಪೂರೈಸಲು ವಿರಾಟ್‌ ಕೊಹ್ಲಿ ಅವರಿಗೆ ಕೇವಲ 58 ರನ್‌ ಅಗತ್ಯವಿದೆ. ಆಗ ಅವರು ಅತೀ ವೇಗದಲ್ಲಿ ಈ ಗಡಿ ತಲುಪಿದ ಕ್ರಿಕೆಟಿಗನಾಗಲಿದ್ದಾರೆ. ದಾಖಲೆ ತೆಂಡುಲ್ಕರ್‌ ಹೆಸರಲ್ಲಿದೆ (623 ಇನ್ನಿಂಗ್ಸ್‌). ಕೊಹ್ಲಿ ಸದ್ಯ 591 ಇನ್ನಿಂಗ್ಸ್‌ ಆಡಿದ್ದಾರೆ.