Uppala: ಸುಮಾರು 3.5 ಕೋಟಿ ರೂ. ಮೌಲ್ಯದ ಡ್ರಗ್ಸ್‌ ವಶಕ್ಕೆ: ಓರ್ವನ ಸೆರೆ

Team Udayavani, Sep 20, 2024, 8:43 PM IST

ಉಪ್ಪಳ: ಇತ್ತೀಚೆಗಿನ ವರ್ಷಗಳಲ್ಲಿಯೇ ಗರಿಷ್ಠ ಮೌಲ್ಯ ಎನಿಸಿರುವ 3.5 ಕೋಟಿ ರೂ. ಮೌಲ್ಯದ ಡ್ರಗ್ಸ್‌ ಅನ್ನು ಕಾಸರಗೋಡು ಪೊಲೀಸರು ವಶ ಪಡಿಸಿಕೊಂಡಿದ್ದು, ಈ ಸಂಬಂಧ ಓರ್ವನನ್ನು ಬಂಧಿಸಲಾಗಿದೆ.

ಕಾಸರಗೋಡಿನಲ್ಲಿ ಅಮಲುಪದಾರ್ಥ ಜಾಲ ವ್ಯಾಪಕವಾಗಿ ಹಬ್ಬಿರುವ ಹಿನ್ನೆಲೆಯಲ್ಲಿ ಪೊಲೀಸರು ಕಾರ್ಯಾಚರಣೆ ಆರಂಭಿಸಿದ್ದು, ಬೇಕಲ ಡಿವೈಎಸ್‌ಪಿ ವಿ.ವಿ. ಮನೋಜ್‌ ನೇತೃತ್ವದಲ್ಲಿ ಮೇಲ್ಪರಂಬ ಠಾಣೆ ಇನ್ಸ್‌ಪೆಕ್ಟರ್‌ ಎ. ಸಂತೋಷ್‌ ಕುಮಾರ್‌ ಅವರ ತಂಡ ಶುಕ್ರವಾರ ಮಧ್ಯಾಹ್ನ ಮನೆಯೊಂದಕ್ಕೆ ದಾಳಿ ನಡೆಸಿ ಶೋಧ ನಡೆಸಿದಾಗ ಭಾರೀ ಪ್ರಮಾಣದ ಅಮಲು ಪದಾರ್ಥ ಪತ್ತೆಯಾಯಿತು.

ಮನೆಯ ಮಾಲಕ ಅಸ್ಕರ್‌ನನ್ನು ಪೊಲೀಸರು ಬಂಧಿಸಿದ್ದಾರೆ. ಈ ಜಾಲದಲ್ಲಿ ಇನ್ನೂ ಹಲವು ಮಂದಿ ಭಾಗಿಯಾಗಿರುವ ಶಂಕೆ ಇದ್ದು, ಪೊಲೀಸರು ಅವರ ಸೆರೆಗೆ ಬಲೆ ಬೀಸಿದ್ದಾರೆ.

ಬಾಯ್ಬಿಟ್ಟ ಆರೋಪಿ: ಆ. 30ರಂದು ಮೇಲ್ಪರಂಬ ಕೈನೋತ್ತ್ ರಸ್ತೆಯಲ್ಲಿ 49.33 ಗ್ರಾಂ ಎಂ.ಡಿ.ಎಂ.ಎ. ಸಹಿತ ಅಬ್ದುಲ್‌ ರಹೀಂ ಯಾನೆ ರವಿಯನ್ನು ಪೊಲೀಸರು ಬಂಧಿಸಿದ್ದರು. ಈತನಿಗೆ ಇದು ಎಲ್ಲಿಂದ ಪೂರೈಕೆಯಾಗಿದೆ ಎಂಬುದರ ಕುರಿತು ತೀವ್ರ ತನಿಖೆ ನಡೆಸಿದಾಗ ಪೊಲೀಸರಿಗೆ ಕೆಲವು ಮಾಹಿತಿ ಸಿಕ್ಕಿದ್ದು, ಅದರಂತೆ ಉಪ್ಪಳದ ಪತ್ವಾಡಿಯ ಮನೆಗೆ ಡಿವೈಎಸ್‌ಪಿ ನೇತೃತ್ವದಲ್ಲಿ ಪೊಲೀಸರು ದಾಳಿ ನಡೆಸಿದ್ದರು.

ಉಪಾಯದಲ್ಲಿ ಕರೆಸಿಕೊಂಡ ಪೊಲೀಸರು
ಪೊಲೀಸರು ದಾಳಿ ನಡೆಸಿದಾಗ ಮನೆಯಲ್ಲಿ ಯಾರೂ ಇರಲಿಲ್ಲ. ಅನಂತರ ಪೊಲೀಸರು ಉಪಾಯ ದಿಂದ ಆತನನ್ನು ಮನೆಗೆ ಕರೆಸಿಕೊಂಡು ಬೀಗ ತೆಗೆಸಿ ತಪಾಸಣೆ ನಡೆಸಿದಾಗಲೇ ಬೃಹತ್‌ ಜಾಲ ಬೆಳಕಿಗೆ ಬಂದದ್ದು.

ತಪಾಸಣೆ ಮಾಡಿದಾಗ ಕಾರ್ಡ್‌ ಬೋರ್ಡ್‌ ಪೆಟ್ಟಿಗೆಯಲ್ಲಿ ತುಂಬಿಸಿಟ್ಟಿದ್ದ ಸುಮಾರು ಮೂರು ಕಿಲೋ ಎಂ.ಡಿ.ಎಂ.ಎ., ಒಂದು ಕಿಲೋ ಗಾಂಜಾ ಪತ್ತೆ ಹಚ್ಚಲಾಯಿತು. ಪೇಸ್ಟ್‌ ರೂಪದಲ್ಲಿ ಅಮಲು ಪದಾರ್ಥಗಳು ಅಲ್ಲದೆ ಹಲವಾರು ಮತ್ತು ಬರಿಸುವ ಮಾತ್ರೆಗಳು ಪತ್ತೆಯಾಗಿದೆ. ಆದರೆ ಆತನಿಗೆ ಇವುಗಳೆಲ್ಲ ಎಲ್ಲಿಂದ ಬಂದಿತ್ತು ಎಂಬ ಕುರಿತಾಗಿ ಪೊಲೀಸರು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ.

ಎಲ್ಲಿಂದ ಸರಬರಾಜು? ಡ್ರಗ್ಸ್‌ ಅನ್ನು ಎಲ್ಲಿಂದ ತರಲಾಗುತಿತ್ತು ಎಂಬ ಕುರಿತು ತನಿಖೆ ನಡೆಯುತ್ತಿದೆ. ಆದರೆ ಇದುವರೆಗೆ ಪತ್ತೆಯಾದ ಹೆಚ್ಚಿನ ಪ್ರಕರಣಗಳಲ್ಲಿ ಕರ್ನಾಟಕದಿಂದ ಬಂದಿರುವ ಮಾಹಿತಿ ಸಿಕ್ಕಿತ್ತು. ಗಡಿ ಪ್ರದೇಶದ ಮೂಲಕ ಕಾಸರಗೋಡಿಗೆ ಡ್ರಗ್ಸ್‌ ಸರಬರಾಜು ಆಗಿದ್ದನ್ನು ಪೊಲೀಸರು ತನಿಖೆಯಲ್ಲಿ ಕಂಡುಕೊಂಡಿದ್ದರು. ಇಲ್ಲಿಗೂ ಅಲ್ಲಿಂದಲೇ ಬಂದಿರುವ ಸಂಶಯದ ಹಿನ್ನೆಲೆಯಲ್ಲಿ ಪೊಲೀಸರು ತನಿಖೆ ಕೇಂದ್ರೀಕರಿಸಿದ್ದಾರೆ.

ಡ್ರಗ್ಸ್‌ ಸಂಗ್ರಹಿಸಲೆಂದೇ ಬೃಹತ್‌ ಮನೆ ಖರೀದಿ!
ವಿಶೇಷ ಎಂದರೆ ರಸ್ತೆಯ ಬದಿಯಲ್ಲಿರುವ ಎರಡು ಮಹಡಿಯ ಈ ಬೃಹತ್‌ ಮನೆಯನ್ನು ಡ್ರಗ್ಸ್‌ ಸಂಗ್ರಹಿಸಿ ಇಡಲೆಂದೇ ಖರೀದಿಸಲಾಗಿತ್ತು ಎಂಬುದು ಗೊತ್ತಾಗಿದೆ. ಎಂಟು ವರ್ಷಗಳ ಹಿಂದೆ ಮನೆ ಖರೀದಿಸಿದವರು ಇದನ್ನು ಕೇಂದ್ರೀಕರಿಸಿ ಅಮಲು ಪದಾರ್ಥ ವ್ಯವಹಾರ ನಡೆಸುತ್ತಿದ್ದಾರೆಂದು ಮಾಹಿತಿ ಲಭಿಸಿದೆ. ಅಸ್ಕರ್‌ ಡ್ರಗ್ಸ್‌ ಅನ್ನು ಕಾರಿನಲ್ಲಿ ತಂದು ಈ ಮನೆಯಲ್ಲಿ ಇರಿಸುತ್ತಿದ್ದ. ಇಲ್ಲಿಂದ ಸಣ್ಣ ಸಣ್ಣ ಪೊಟ್ಟಣ ಮಾಡಿ ಬೇರೆ ಬೇರೆ ಕಡೆ ಸಾಗಿಸುತ್ತಿದ್ದ ಎಂಬ ಮಾಹಿತಿ ಲಭ್ಯವಾಗಿದೆ.

ಅಸ್ಕರ್‌ ಕುಟುಂಬ ಸಹಿತ ವಾಸಿಸುವ ಮನೆ ಬೇರೆಯೇ ಇದ್ದು, ಇಲ್ಲಿಗೆ ಹೆಚ್ಚಾಗಿ ಹಗಲಿನ ಹೊತ್ತಿನಲ್ಲಿ ಬಂದು ಹೋಗುತ್ತಿದ್ದ. ಮನೆಯ ಸುತ್ತಮುತ್ತ ಎತ್ತರದ ಕಾಂಪಾಂಡ್‌ ಕೂಡ ಇದ್ದುದರಿಂದ ಈ ಮನೆಗೆ ಯಾರು ಬರುತ್ತಾರೆ, ಯಾರು ಇರುತ್ತಾರೆ ಎಂಬುದು ಹತ್ತಿರದವರಿಗೂ ಗೊತ್ತಿರಲಿಲ್ಲ. ಶುಕ್ರವಾರ ಪೊಲೀಸರು ದಾಳಿ ನಡೆಸಿದಾಗ ಅದನ್ನು ನೋಡುವುದಕ್ಕಾಗಿಯೂ ಹಲವಾರು ಮಂದಿ ಇಲ್ಲಿ ಜಮಾಯಿಸಿದ್ದರು.