Tirupati; ವಿವಾದದಲ್ಲೂ 4 ದಿನದಲ್ಲಿ ಮಾರಾಟವಾದ ಲಡ್ಡುಗಳೆಷ್ಟು ಗೊತ್ತೇ?

ತಿಮ್ಮಪ್ಪನ ಮೇಲಿರುವ ಭಕ್ತರ ನಂಬಿಕೆ ಅಷ್ಟು ಬೇಗ ಕುಗ್ಗಲ್ಲ: ಟಿಟಿಡಿ

Team Udayavani, Sep 25, 2024, 7:30 AM IST

tirupatiTirupati; Even in controversy, 14 lakh laddus were sold in 4 days

ಹೈದರಾಬಾದ್‌: ತಿರುಪತಿ ದೇಗುಲದ ಲಡ್ಡು ಪ್ರಸಾದದಲ್ಲಿ ಪ್ರಾಣಿಜನ್ಯ ಕೊಬ್ಬು ಮಿಶ್ರಿತವಾ ಗಿದೆ ಎಂಬ ಆರೋಪಗಳು ವಿವಾದ ಸೃಷ್ಟಿಸಿ ರುವ ನಡುವೆಯೂ ತಿರುಪತಿ ಲಡ್ಡುಗಳಿಗಿ ರುವ ಬೇಡಿಕೆ ಏನೂ ಕಡಿಮೆಯಾಗಿಲ್ಲ. ಕಳೆದ 4 ದಿನದಲ್ಲಿ ದೇಗುಲದಲ್ಲಿ ಬರೋಬ್ಬರಿ 14 ಲಕ್ಷ ಲಡ್ಡು ಪ್ರಸಾದ ಮಾರಾಟವಾಗಿವೆ.

ಈ ಕುರಿತು ದೇಗುಲ ಆಡಳಿತ ಮಂಡಳಿ ಮಾಹಿತಿ ನೀಡಿದ್ದು, ದಿನಂಪ್ರತಿ 60,000 ಭಕ್ತರು ದೇಗುಲಕ್ಕೆ ಭೇಟಿ ನೀಡುತ್ತಾರೆ. ಪ್ರಸಾದ ಸೇವನೆಗೆ, ವಿತರಣೆಗೆಂದು ಸಾಕಷ್ಟು ಲಡ್ಡುಗಳನ್ನು ಖರೀದಿಸುತ್ತಾರೆ. ಅದರಂತೆ ಸೆ.19ರಂದು 3.59 ಲಕ್ಷ ಲಡ್ಡು ಮಾರಾಟವಾಗಿವೆ. ಸೆ.20ರಂದು 3.17 ಲಕ್ಷ, ಸೆ.21ಕ್ಕೆ 3.67 ಲಕ್ಷ, ಸೆ.22ಕ್ಕೆ 3.60 ಲಕ್ಷ ಲಡ್ಡುಗಳು ಮಾರಾಟವಾಗಿವೆ. ವಿವಾದಕ್ಕೆ ಮೊದಲು ದೇಗುಲದಲ್ಲಿ ಪ್ರತೀದಿನ ಸರಾಸರಿ 3.50 ಲಕ್ಷ ಲಡ್ಡು ಮಾರಾಟವಾಗುತ್ತಿತ್ತು. ಈಗಲೂ ಅದರ ಆಸುಪಾಸಿನ ಸಂಖ್ಯೆಯಲ್ಲೇ ಮಾರಾಟವಾಗುತ್ತಿದೆ ಎಂದು ಟಿಟಿಡಿ ಹೇಳಿದೆ.

ಕಲ್ಲುಸಕ್ಕರೆ ಪ್ರಸಾದಕ್ಕೆ ಆಗ್ರಹ

ಲಡ್ಡು ಸೇರಿ ಸಿದ್ಧಪಡಿಸಿದ ಆಹಾರವನ್ನು ಭಕ್ಷರಿಗೆ ಪ್ರಸಾದವಾಗಿ ನೀಡುವ ಬದಲು ಹಿಂದೂ ದೇವರುಗಳಿಗೆ ನೈವೇದ್ಯವಾಗಿ ನೀಡುವ ಕಲ್ಲುಸಕ್ಕರೆ, ಏಲಕ್ಕಿ, ಒಣಹಣ್ಣುಗಳನ್ನೇ ಭಕ್ತರಿಗೂ ಪ್ರಸಾದವಾಗಿ ನೀಡಬೇಕು. ಎಲ್ಲಾ ದೇವಾಲಯಗಳು ಇದೇ ಪದ್ಧತಿಯನ್ನು ಅನುಸರಿಸಬೇಕು ಎಂದು ಸನ್ಯಾಸಿಗಳ ಪ್ರಮುಖ ಸಂಘಟನೆ ಆಗ್ರಹಿಸಿದೆ. ತಿರುಪತಿ ಲಡ್ಡು ವಿವಾದ ಬೆನ್ನಲ್ಲೇ ಸನ್ಯಾಸಿ ಸಂಘಟನೆಯ ಈ ಆಗ್ರಹ ಮಹತ್ವ ಪಡೆದಿದೆ.