Kalaburagi: ಮದ್ಯದ ಗುಂಗಿನಲ್ಲಿ ಪತ್ನಿಯನ್ನು ಕೊಂದ ಪತಿ!

Team Udayavani, Oct 3, 2024, 1:21 PM IST

ಕಲಬುರಗಿ: ಪತಿ, ಪತ್ನಿ ಇಬ್ಬರು ಆ.2ರ ಬುಧವಾರ ರಾತ್ರಿ ಜೊತೆಗೆಎಣ್ಣೆ (ಮದ್ಯ) ಹಾಕುವಾಗ ನಡೆದ ಸಣ್ಣ ಗಲಾಟೆ ವಿಕೋಪಕ್ಕೆ ತಿರುಗಿ ಪತ್ನಿಯ ಕೊಲೆಯಲ್ಲಿ ಅಂತ್ಯವಾದ ಘಟನೆ ಗುಲ್ಬರ್ಗ ವಿಶ್ವವಿದ್ಯಾನಿಲಯ ಪೊಲೀಸ್ ಠಾಣಾ ವ್ಯಾಪ್ತಿಯ ಶಹಬಾದ ರಸ್ತೆಯ ಇಟ್ಟಂಗಿ ಭಟ್ಟಿಯಲ್ಲಿ ಆ.2ರ ಬುಧವಾರ ನಡೆದಿದೆ.

ಪ್ರಿಯಾಂಕಾ ರಾಠೋಡ್(35) ಕೊಲೆಯಾದ ಮಹಿಳೆ ಎಂದು ಗುರುತಿಸಲಾಗಿದೆ. ಪತಿ ವಕೀಲ್ ರಾಠೋಡ್ ಕೊಲೆ ಮಾಡಿದಾತ.

ನಿನ್ನೆ (ಆ.2ರ) ತಡರಾತ್ರಿ ಪ್ರಿಯಾಂಕಾ ಹಾಗೂ ಆಕೆಯ ಗಂಡ ವಕೀಲ್ ರಾಠೋಡ್ ಸೇರಿಕೊಂಡು ಇಟ್ಟಂಗಿ ಭಟ್ಟಿಯ ಮಬ್ಬು ಕತ್ತಲಿನಲ್ಲಿ ತಂಪಾದ ವಾತಾವರಣದಲ್ಲಿ ಮಸ್ತ್ ಮಜವಾಗಿ ಎಣ್ಣೆ ಪಾರ್ಟಿ ಮಾಡುತ್ತಿದ್ದರು. ಈ ಸಂದರ್ಭದಲ್ಲಿ ಕೌಟುಂಬಿಕ ಕಲಹ ಶುರುವಾಗಿದೆ.

ಆ ವೇಳೆಯಲ್ಲಿ ಫುಲ್ ಟೈಟ್ ಆಗಿದ್ದ ಪತಿ ವಕೀಲ್ ರಾಠೋಡ್ ಸಿಟ್ಟಿನಲ್ಲಿ ಪಕ್ಕದಲ್ಲಿಯೇ ಇದ್ದ ಇಟ್ಟಿಗೆಯಿಂದ ಪ್ರಿಯಾಂಕಾ ತಲೆಗೆ ಹೊಡೆದಿದ್ದಾನೆ. ಈ ಹೊಡೆತಕ್ಕೆ ಆಕೆ ಸಾವನ್ನಪ್ಪಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಕುರಿತು ವಿವಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.