Kerala: ಮಲಯಾಳಂ ಚಿತ್ರರಂಗದ ಜನಪ್ರಿಯ ವಿಲನ್‌ ನಟ “ಕೀರಿಕ್ಕಡನ್‌ ಜೋಸ್”‌ ವಿಧಿವಶ

Team Udayavani, Oct 4, 2024, 11:01 AM IST

ತಿರುವನಂತಪುರಂ: ಮಲಯಾಳಂ ಚಿತ್ರರಂಗದ ಜನಪ್ರಿಯ ನಟ‌, ವಿಲನ್‌ ಆಗಿ ಖ್ಯಾತಿ ಪಡೆದಿದ್ದ ಮೋಹನ್‌ ರಾಜ್‌ ಅಲಿಯಾಸ್‌ ಕೀರಿಕ್ಕಡನ್‌ ಜೋಸ್(70ವರ್ಷ) ಗುರುವಾರ (ಅ.03) ನಿಧನರಾಗಿರುವುದಾಗಿ ವರದಿ ತಿಳಿಸಿದೆ.

“ಕಿರೀಟಂ” ಸಿನಿಮಾದಲ್ಲಿ ವಿಲನ್‌ ಆಗಿ ನಟಿಸುವ ಮೊದಲು ಜೋಸ್‌ ಅವರು ಕೇಂದ್ರ ಸರ್ಕಾರದ ಅಧಿಕಾರಿಯಾಗಿ ಕಾರ್ಯನಿರ್ವಹಿಸಿದ್ದರು.

ಕಿರೀಟಂ ಸಿನಿಮಾದಲ್ಲಿ “ಕೀರಿಕ್ಕಡನ್‌ ಜೋಸ್”‌ ಎಂಬ ಪಾತ್ರದಲ್ಲಿ ಮೋಹನ್‌ ರಾಜ್‌ ವಿಲನ್‌ ಆಗಿ ನಟಿಸಿದ್ದು, ನಂತರ ಅದೇ ಹೆಸರಿನಲ್ಲಿ ಅವರು ಜನಪ್ರಿಯರಾಗಿದ್ದರು. ಮೋಹನ್‌ ಲಾಲ್‌ ಹೀರೋ ಆಗಿ ನಟಿಸಿದ್ದ ಕಿರೀಟಂ ಮಲಯಾಳಂ ಚಿತ್ರರಂಗದಲ್ಲಿ ಬಿಗ್‌ ಹಿಟ್‌ ಸಿನಿಮಾಗಳಲ್ಲಿ ಒಂದಾಗಿದೆ.

ವಿಲನ್‌ ಆಗಿ ನಟಿಸುವ ಮೂಲಕ ಯಶಸ್ಸು ಕಂಡ ಮೋಹನ್‌ ರಾಜ್‌ ಅಲಿಯಾಸ್‌ ಜೋಸ್‌ ಸಾಲು, ಸಾಲು ಚಿತ್ರಗಳಲ್ಲಿ ನಟಿಸುವ ಅವಕಾಶ ಪಡೆದಿದ್ದರು. ಹೀಗೆ ಸುಮಾರು 300ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿದ್ದರು.

ಮಲಯಾಳಂ, ತೆಲುಗು, ತಮಿಳು ಸಿನಿಮಾಗಳಲ್ಲಿ ನಟಿಸುವ ಮೂಲಕ ಜೋಸ್‌ ದಕ್ಷಿಣ ಭಾರತದ ಖ್ಯಾತ ವಿಲನ್‌ ಪಾತ್ರಧಾರಿಯಾಗಿದ್ದರು. ಕೆಲವು ವರ್ಷಗಳ ಹಿಂದೆ ತೆಲುಗು ಸಿನಿಮಾದ ಸ್ಟಂಟ್‌ ದೃಶ್ಯವೊಂದರ ಚಿತ್ರೀಕರಣ ವೇಳೆ ಕಾಲಿಗೆ ಗಾಯವಾಗಿತ್ತು..ಆ ನಂತರ ಜೋಸ್‌ ಪೂರ್ಣ ಪ್ರಮಾಣದಲ್ಲಿ ಚೇತರಿಸಿಕೊಳ್ಳಲು ಸಾಧ್ಯವಾಗಲಿಲ್ಲವಾಗಿತ್ತು.

ಶುಕ್ರವಾರ (ಅ.04) ತಿರುವನಂತಪುರಂನಲ್ಲಿ ನಟ ಮನೋಜ್‌ ರಾಜ್‌ ಅಲಿಯಾಸ್‌ ಜೋಸ್‌ ಅವರ ಪ್ರಾರ್ಥೀವ ಶರೀರದ ಅಂತಿಮ ದರ್ಶನದ ವ್ಯವಸ್ಥೆ ಮಾಡಲಾಗಿತ್ತು. ನಂತರ ಅಂತ್ಯಕ್ರಿಯೆ ನೆರವೇರಲಿದೆ ಎಂದು ಕುಟುಂಬದ ಮೂಲಗಳು ತಿಳಿಸಿವೆ.