ಲೋಕಾಯುಕ್ತ ಪೊಲೀಸರಿಂದ 14 ನಿವೇಶನಗಳ ಸ್ಥಳ ಮಹಜರು

Team Udayavani, Oct 4, 2024, 8:27 PM IST

ಮೈಸೂರು: ಮುಡಾ ನಿವೇಶನ ಹಂಚಿಕೆ ಹಗರಣ ಸಂಬಂಧ ತನಿಖೆ ಮುಂದುವರಿಸಿರುವ ಲೋಕಾಯುಕ್ತ ಅಧಿಕಾರಿಗಳು ಶುಕ್ರವಾರ ಸಿಎಂ ಸಿದ್ದರಾಮಯ್ಯ ಅವರ ಪತ್ನಿಗೆ ನೀಡಲಾಗಿದ್ದ 14 ನಿವೇಶನಗಳ ಸ್ಥಳ ಮಹಜರು ನಡೆಸಿದರು.

ಸಿಎಂ ಪತ್ನಿಗೆ ಮುಡಾದಿಂದ ನೀಡಲಾಗಿದ್ದ 14 ಬದಲಿ ನಿವೇಶನಗಳ ಬಗ್ಗೆ ತನಿಖೆ ನಡೆಸುತ್ತಿರುವ ಲೋಕಾಯುಕ್ತ, ಶುಕ್ರವಾರ ಬೆಳಗ್ಗೆ ದೂರುದಾರ ಸ್ನೇಹಮಯಿ ಕೃಷ್ಣ ಸಮ್ಮುಖದಲ್ಲಿ ನಗರದಲ್ಲಿನ 14 ನಿವೇಶನಗಳ ಸ್ಥಳ ಮಹಜರು ಪ್ರಕ್ರಿಯೆ ನಡೆಸಿದರು.

ವಿಜಯನಗರ “ಸಿ’ ಬ್ಲಾಕ್‌ನ ನಿವೇಶನ ಸಂಖ್ಯೆ 25, ಇ ಬ್ಲಾಕ್‌ನಲ್ಲಿರುವ 50/80 ಅಡಿ ಅಳತೆಯ ನಿವೇಶನ ಸಂಖ್ಯೆ 213, 214, 215, 216, ಡಿ ಬ್ಲಾಕ್‌ನ 331, 332 ಹಾಗೂ ಜಿ ಬ್ಲಾಕ್‌ನ ನಿವೇಶನ ಸಂಖ್ಯೆ 5ರಲ್ಲಿ ಮಹಜರು ನಡೆಸಿದರು. ಅನಂತರ ವಿಜಯನಗರ 4ನೇ ಹಂತ 2ನೇ ಸ್ಟೇಜ್‌ನ ನಿವೇಶನ ಸಂಖ್ಯೆ 5085, 5108, 10855, 11189, 12065, 12068ರ ನಿವೇಶನಗಳಲ್ಲಿ ಮಹಜರು ಪ್ರಕ್ರಿಯೆ ನಡೆಸಿದರು. ಈ ವೇಳೆ ನಿವೇಶನಗಳಿಂದ ರಸ್ತೆಗೆ ಇರುವ ವಿಸ್ತೀರ್ಣ ಹಾಗೂ ಮುಡಾದ ವಿಶೇಷ ಭೂ ಸ್ವಾಧೀನ ವಿಭಾಗದಿಂದ ಲೋಕಾಯುಕ್ತ ಅಧಿಕಾರಿಗಳು ಪಡೆದ ದಾಖಲೆ, ಸ್ಥಳ ನಕ್ಷೆ ಹಿಡಿದು ಸರ್ವೆ ಮಾಡಿ ಮಾಹಿತಿ ಕಲೆ ಹಾಕಿದರು.