Nobel: ಕೃತಕ ಬುದ್ಧಿಮತ್ತೆ ಗಾಡ್‌ಫಾದರ್‌ ಸೇರಿ ಇಬ್ಬರಿಗೆ ಭೌತಶಾಸ್ತ್ರದ ನೋಬೆಲ್‌ ಪ್ರಶಸ್ತಿ

Team Udayavani, Oct 8, 2024, 10:27 PM IST

Godfather of Artificial Intelligence and the Nobel Prize in Physics for tw

ಸ್ಟಾಕ್‌ಹೋಮ್‌: 2024ನೇ ಸಾಲಿನ ಭೌತಶಾಸ್ತ್ರದ ನೊಬೆಲ್‌ ಪ್ರಶಸ್ತಿಗೆ ಅಮೆರಿಕದ ಪ್ರಿನ್ಸ್‌ಟನ್‌ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಜಾನ್‌ ಜೆ.ಹೋಪ್‌ಫೀಲ್ಡ್‌ ಮತ್ತು ಕೆನಡಾದ ಟೊರಂಟೋ ವಿಶ್ಯವಿದ್ಯಾಲಯದ ಕಂಪ್ಯೂಟರ್‌ ಸೈನ್ಸ್‌ ಪ್ರಾಧ್ಯಾಪಕ ಜೆಫ್ರಿ ಇ.ಹಿಂಟನ್‌ ಜಂಟಿಯಾಗಿ ಪಾತ್ರರಾಗಿದ್ದಾರೆ. ಕೃತಕ ಬುದ್ಧಿಮತ್ತೆ ಕ್ಷೇತ್ರದಲ್ಲಿ ಈ ಇಬ್ಬರು ಮಾಡಿದ ಮೂಲಭೂತ ಸಂಶೋಧನೆಗಾಗಿ ಈ ಪ್ರತಿಷ್ಠಿತ ಪ್ರಶಸ್ತಿಗೆ ಪಾತ್ರರಾಗಿದ್ದಾರೆ.

76 ವರ್ಷದ ಜೆಫ್ರಿ ಹಿಂಟನ್‌ “ಗಾಡ್‌ಫಾದರ್‌ ಆಫ್ ಎಐ’ ಎಂದೇ ಖ್ಯಾತರಾಗಿದ್ದು ಮಷಿನ್‌ ಲರ್ನಿಂಗ್‌ ಕ್ಷೇತ್ರದಲ್ಲಿ ಇವರು ಮಾಡಿದ ಸಂಶೋಧನೆಯು ಇಂದಿನ ಕೃತಕ ಬುದ್ಧಿಮತ್ತೆ ಕ್ಷೇತ್ರದ ಬೆಳವಣಿಗೆಗೆ ಹಾದಿ ಮಾಡಿಕೊಟ್ಟಿದೆ. ಚಾಟ್‌ ಜಿಪಿಟಿ ಅನ್ವೇಷಣೆಯಲ್ಲಿ ಇವರ ಕಾರ್ಯ ಮಹತ್ತರವಾಗಿದ್ದು, ಕಳೆದ ವರ್ಷ ಗೂಗಲ್‌ ಕಂಪನಿಗೆ ರಾಜೀನಾಮೆ ನೀಡಿ ಟೊರಂಟೋ ವಿಶ್ವವಿದ್ಯಾಲಯ ಸೇರಿದ್ದರು. ಜತೆಗೆ ಯಂತ್ರಗಳು ಮನುಷ್ಯನನ್ನು ಮೀರಿಸುವ ಅಪಾಯದ ಬಗ್ಗೆ ಎಚ್ಚರಿಕೆ ನೀಡಿದ್ದರು. ನೋಬೆಲ್‌ ಪ್ರಶಸ್ತಿಯನ್ನು ತನಗೆ ನೀಡಿರುವುದು ಮೂಕವಿಸ್ಮಿತರಾಗಿ ಮಾಡಿದೆ ಎಂದು ಹಿನ್‌ಟನ್‌ ಪ್ರತಿಕ್ರಿಯೆ ನೀಡಿದ್ದಾರೆ.

ಇನ್ನು 91 ವರ್ಷದ ಹೋಪ್‌ಫೀಲ್ಡ್‌ ಅನ್ವೇಷಣೆಗಳು ಭೌತಶಾಸ್ತ್ರದಲ್ಲಿ ಹೋಪ್‌ಫೀಲ್ಡ್‌ ನೆಟ್‌ವರ್ಕ್ಸ್ ಎಂದು ಖ್ಯಾತವಾಗಿವೆ. ಈ ಪ್ರತಿಷ್ಠಿತ ಪ್ರಶಸ್ತಿಯು ಒಂದು ಮಿಲಿಯನ್‌ ಡಾಲರ್‌ ನಗದು ಒಳಗೊಂಡಿದ್ದು ಇಬ್ಬರಿಗೂ ಸಮಾನಾಗಿ ಹಂಚಿಕೆ ಮಾಡಲಾಗುತ್ತದೆ ಎಂದು ರಾಯಲ್‌ ಸ್ವೀಡಿಸ್‌ ಅಕಾಡೆಮಿ ಆಫ್ ಸೈನ್ಸ್‌ ತಿಳಿಸಿದೆ.