Kalaburagi ಜೈಲಲ್ಲಿ ಕೈದಿಗಳ ಮಜಾ; ವಿಡಿಯೋ ವೈರಲ್‌

Team Udayavani, Oct 15, 2024, 6:30 AM IST

ಕಲಬುರಗಿ:ಇಲ್ಲಿನ ಕೇಂದ್ರ ಕಾರಾಗೃಹದಲ್ಲಿ ಕೈದಿಗಳು ಜೈಲಿನಲ್ಲೇ ಕುಳಿತುಕೊಂಡು ಗಾಂಜಾ ಸೇದುತ್ತ ನಶೆ ಮಾಡಿದ್ದಲ್ಲದೆ, ನಶೆಯಲ್ಲಿ ಹೊರಗಿದ್ದವರಿಗೆ, ಶಿವಮೊಗ್ಗ ಜೈಲಿನಲ್ಲಿದ್ದ ಗೆಳೆಯರಿಗೆ ಸ್ಮಾರ್ಟ್‌ ಫೋನ್‌ನಿಂದ ವಿಡಿಯೋ ಕಾಲ್‌ ಮಾಡಿ ಮಾತನಾಡಿರುವ ವಿಡಿಯೋ ವೈರಲ್‌ ಆಗಿದೆ.

ಇದರೊಂದಿಗೆ ಜೈಲಿನಲ್ಲಿ ಕೈದಿಗಳು ಭಾರೀ ಮಸ್ತ್ ಜೀವನ ನಡೆಸುತ್ತಿರುವುದಲ್ಲದೇ ಅವರಿಗೆ ಬೇಕಾಗಿರುವ ಎಲ್ಲ ಐಷಾರಾಮಿ ವಸ್ತುಗಳು ಜೈಲಿನಲ್ಲಿ ದೊರೆಯುತ್ತಿರುವ ಮಾತಿಗೆ ಪುಷ್ಟಿಗೆ ನೀಡಿದೆ.

ಸುದ್ದಿ ತಿಳಿಯುತ್ತಿದ್ದಂತೆ ನಗರ ಪೊಲೀಸ್‌ ಕಮಿಷನರ್‌ ಡಾ| ಶರಣಪ್ಪ ಢಗೆ ಜೈಲಿನ ಮೇಲೆ ದಾಳಿ ಮಾಡಿದ್ದಾರೆ. ಜೈಲಿನಲ್ಲಿ ಗಾಂಜಾ, ಮೊಬೈಲ್‌ ಸೇರಿದಂತೆ ಇತರೆ ಐಷಾರಾಮಿ ವಸ್ತುಗಳು ಹೇಗೆ ಪೂರೈಕೆ ಆಗುತ್ತಿದೆ ಎನ್ನುವುದನ್ನು ವಿಚಾರಿಸಿದ್ದಾರೆ. ಹಲವು ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಈ ಮಧ್ಯೆ ಈ ವಿಡಿಯೋ ತಮ್ಮ ಜೈಲಿನಲ್ಲಿ ಮಾಡಿದ್ದಲ್ಲ. ಕೈದಿಗಳಾದ ವಿಶಾಲ್‌, ಸಾಗರ್‌ ಹಾಗೂ ಸೋನು ಈ ಮೂವರು ಶಿವಮೊಗ್ಗ ಜೈಲಿನಲ್ಲೂ ಇದ್ದರು. ಅಲ್ಲಿ ಇದನ್ನು ವಿಡಿಯೋ ಮಾಡಿಕೊಂಡಿರಬೇಕೆಂದು ಜೈಲಿನ ಅಧಿಕಾರಿಗಳು ಸ್ಪಷ್ಟನೆ ನೀಡಿದ್ದಾರೆ.