Tsuchinshan-ATLAS: 80 ಸಾವಿರ ವರ್ಷಗಳಿಗೊಮ್ಮೆ ಕಾಣುವ ಧೂಮಕೇತು ಪ್ರತ್ಯಕ್ಷ!

Team Udayavani, Oct 16, 2024, 7:13 AM IST

ನವದೆಹಲಿ: 80 ಸಾವಿರ ವರ್ಷಗಳಿಗೊಮ್ಮೆ ಕಾಣಸಿಗುವ ಧೂಮಕೇತುವನ್ನು ಈಗ ಎಲ್ಲರೂ ಬರಿಗಣ್ಣಿನಿಂದ ನೋಡಬಹುದಾಗಿದೆ.

ಸುಚಿನ್‌ಶಾನ್‌ ಅಟ್ಲಾಸ್‌ ಹೆಸರಿನ ಧೂಮಕೇತು ಈಗ ಲಡಾಕ್‌, ಕರ್ನಾಟಕ, ತೆಲಂಗಾಣ ಮತ್ತು ತಮಿಳುನಾಡು, ದೇಶದ ಇತರ ಭಾಗಗಳಲ್ಲಿ ಅತಿ ಹತ್ತಿರದಿಂದ ಕಾಣಸಿಗುತ್ತಿದ್ದು ಖಗೋಳ ಛಾಯಾಚಿತ್ರಗಾರರು, ಹವ್ಯಾಸಿ ಖಗೋಳ ತಜ್ಞರು ನೋಡಿ ಆನಂದಿಸುತ್ತಿದ್ದಾರೆ.

ಕಳೆದ ಒಂದು ದಶಕದಲ್ಲಿ ಅತಿ ಹೆಚ್ಚು ಹೊಳೆಯುತ್ತಿರುವ ಧೂಮಕೇತುಗಳಲ್ಲಿ ಇದು ಒಂದಾಗಿದೆ. ಸೆ.28ರಂದು ಭೂಮಿಗೆ ಅತಿ ಹತ್ತಿರದಲ್ಲಿ ಇದು ಕಂಡು ಬಂದಿತ್ತು. ಸೂರ್ಯಾಸ್ತದ ನಂತರ ಪಶ್ಚಿಮ ದಿಕ್ಕಿನ ಕನ್ಯಾಪುಂಜಾ ನಕ್ಷತ್ರದ ನೇರದಲ್ಲಿ ಇದು ಕಾಣುತ್ತಿದೆ.

80 ಸಾವಿರ ವರ್ಷಗಳಿಗೊಮ್ಮೆ ಸೂರ್ಯನನ್ನು ಸುತ್ತು ಹಾಕುವ ಈ ಧೂಮಕೇತು ಹಾಗೂ ಅದರ ಬಾಲವನ್ನು ಎಲ್ಲರೂ ನೋಡಬಹುದಾಗಿದೆ. ಧೂಮಕೇತುವಿನ ಬಾಲವು ಸೂರ್ಯನ ಪಥದ ಹತ್ತಿರಕ್ಕೆ ಬಂದಾಗ ಲಕ್ಷಾಂತರ ಕಿಲೋಮೀಟರ್‌ ಎತ್ತರಕ್ಕೆ ಆಗಸದಲ್ಲಿ ಬೆಳೆದಂತೆ ಕಾಣುತ್ತದೆ ಎಂದು ಹವ್ಯಾಸಿ ಖಗೋಳ ತಜ್ಞರು ತಿಳಿಸಿದ್ದಾರೆ.