Sri Murali: ಇಂದಿನಿಂದ ಬಘೀರ ಬೇಟೆ ಶುರು

Team Udayavani, Oct 31, 2024, 8:20 AM IST

ರೋರಿಂಗ್‌ ಸ್ಟಾರ್‌ ಶ್ರೀಮುರುಳಿ ಅಭಿನಯಿಸಿರುವ ಚಿತ್ರ “ಬಘೀರ’ ಇಂದು ತೆರೆಕಾಣುತ್ತಿದೆ. ಹೊಂಬಾಳೆ ಫಿಲಂಸ್‌ ಲಾಂಛನದಲ್ಲಿ ವಿಜಯ ಕಿರಗಂದೂರ ನಿರ್ಮಾಣದಲ್ಲಿ ಮೂಡಿಬರುತ್ತಿರುವ ಈ ಚಿತ್ರಕ್ಕೆ ಡಾ. ಸೂರಿ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ.

ಈ ಚಿತ್ರದ ಮೇಲೆ ಮುರುಳಿ ಭರ್ಜರಿ ನಿರೀಕ್ಷೆ ಇಟ್ಟಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ಟ್ರೇಲರ್‌ ಹಿಟ್‌ ಆಗುವ ಮೂಲಕ ನಿರೀಕ್ಷೆ ಕೂಡಾ ಹೆಚ್ಚಾಗಿದೆ.

ಚಿತ್ರದ ಬಗ್ಗೆ ಮಾತನಾಡುವ ಶ್ರೀಮುರುಳಿ, “ನಮ್ಮ ಮೂರು ವರ್ಷದ ಶ್ರಮ ಈಗ ಸಿನಿಮಾವಾಗಿದೆ. ಹೊಂಬಾಳೆ ಸಂಸ್ಥೆ ಹಾಗೂ ಡಾ. ಸೂರಿ ಅವರೊಂದಿಗೆ ಕೆಲಸ ಮಾಡಿದ್ದು ಸಂತೋಷದ ವಿಷಯ. ಈ ಚಿತ್ರದ ನಿರ್ದೇಶಕರು ಕೆಲಸದಲ್ಲಿ ರಾಕ್ಷಸರು, ಅವರೆಲ್ಲರ ಕೆಲಸ ತೆರೆ ಮೇಲೆ ಕಾಣುತ್ತೆ. ಸೂಪರ್‌ ಹೀರೋ ರೀತಿ ನಾನು ಕಾಣಿಸಿಕೊಂಡಾಗ ಖುಷಿಯಾಯ್ತು. ನಿರ್ದೇಶಕ ಅಜನೀಶ್‌ ಅವರ ಜೊತೆ ಇದು ನನ್ನ ಮೊದಲ ಸಿನಿಮಾ, ಅವರ ಸಂಗೀತ ವೈಶಿಷ್ಟ್ಯ ಸಿನಿಮಾದಲ್ಲಿ ಕಾಣಬಹುದು’ ಎನ್ನುತ್ತಾರೆ.

ಅಂದಹಾಗೆ, ಚಿತ್ರಕ್ಕೆ ಪ್ರಶಾಂತ್‌ ನೀಲ್‌ ಅವರ ಕಥೆ ಇದೆ. “ಬಘೀರ ಎಂದರೆ ನೈಟ್‌ ಹಂಟರ್‌, ಇದು ರಾತ್ರಿ ವೇಳೆ ಬೇಟೆಯಾಡುತ್ತದೆ. ನಮ್ಮ ಚಿತ್ರದ ಕಥೆ ಹೆಚ್ಚಿನ ಭಾಗ ರಾತ್ರಿಯಲ್ಲೇ ನಡೆಯುತ್ತದೆ. ಸೂಪರ್‌ ಹೀರೋ ಕಥಾಹಂದರ ಸಿನಿಮಾಗಳನ್ನು ಕನ್ನಡದಲ್ಲಿ ಬಂದಿದ್ದು ಕಡಿಮೆ’ ಎನ್ನುವುದು ನಿರ್ದೇಶಕ ಸೂರಿ ಅವರ ಮಾತು.

ಚಿತ್ರಕ್ಕೆ ಅಜನೀಶ್‌ ಲೋಕನಾಥ್‌ ಸಂಗೀತವಿದೆ. ಚಿತ್ರದಲ್ಲಿ ರುಕ್ಮಿಣಿ ವಸಂತ, ಸುಧಾರಾಣಿ, ಪ್ರಮೋದ ಶೆಟ್ಟಿ, ಗರುಡ ರಾಮ್‌, ಪ್ರಕಾಶ್‌ ರೈ ಸೇರಿದಂತೆ ಅನೇಕರು ನಟಿಸಿದ್ದಾರೆ.