Bantwala: ಹಳೆಯ ವೀಡಿಯೋ ವೈರಲ್‌; ಕೈಯಲ್ಲೇ ಮಾಲೆ ಪಟಾಕಿ ಸಿಡಿಸುವ ಬಂಟ್ವಾಳದ ಮಹಿಳೆ!

Team Udayavani, Nov 2, 2024, 12:53 PM IST

ಬಂಟ್ವಾಳ: ಮಹಿಳೆಯೊಬ್ಬರು ಮಾಲೆ ಪಟಾಕಿಯನ್ನು ಕೈಯಲ್ಲೇ ಹಿಡಿದು ಸಿಡಿಸುವ ಹಳೆಯ ದೃಶ್ಯ ದೀಪಾವಳಿ ಸಂದರ್ಭದಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಸದ್ದು ಮಾಡಿದೆ. ಆದರೆ ಇದು ಸುಮಾರು ಒಂದೂವರೆ ವರ್ಷಗಳ ಹಿಂದಿನ ವೀಡಿಯೋ!

ಒಂದೂವರೆ ವರ್ಷದ ಹಿಂದೆ ಬಂಟ್ವಾಳದ ವ್ಯಾಯಾಮ ಶಾಲೆಗೆ ಹನುಮಂತನ ವಿಗ್ರಹ ಆಗಮಿಸಿದ ಮೆರವಣಿಗೆಯ ಸಂದರ್ಭ ಬಂಟ್ವಾಳ ಪೇಟೆಯ ರಾಧಾ ಜಿ.ಹೆಗ್ಡೆ ಅವರು ಶ್ರೀ ತಿರುಮಲ ವೆಂಕಟರಮಣ ದೇವಸ್ಥಾನದ ಮುಂಭಾಗದ ಮುಖ್ಯರಸ್ತೆಯಲ್ಲಿ ಮಾಲೆ ಪಟಾಕಿಯನ್ನು ಕೈಯಲ್ಲಿ ಹಿಡಿದು ಬೀಸಿದ್ದು, ಇದರ ವೀಡಿಯೋ ಈಗ ವೈರಲ್‌ ಆಗಿದೆ. ಹಿರಿಯ ಮಹಿಳೆಯಾಗಿರುವ ಅವರ ಉತ್ಸಾಹಕ್ಕೆ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ.

ಒಂದಷ್ಟು ಟ್ರೋಲ್‌ ಪೇಜ್‌ಗಳಲ್ಲೂ ವೈರಲ್‌ ಆಗಿದೆ. ಅವರು ಈ ಹಿಂದೆಯೂ ದೇವಸ್ಥಾನದ ದೀಪೋತ್ಸವದ ಸಂದರ್ಭಗಳಲ್ಲೂ ಇದೇ ರೀತಿ ಮಾಲೆ ಪಟಾಕಿ ಸಿಡಿಸುತ್ತಿದ್ದಾರೆ. ಮದುವೆಯಾದ ಬಳಿಕ ಯಜಮಾನರು ಪ್ರೋತ್ಸಾಹ ಕೊಟ್ಟ ಕಾರಣ ಈ ರೀತಿ ಪಟಾಕಿ ಸಿಡಿಯುವುದು ಅಭ್ಯಾಸವಾಗಿದೆ. ಯಾವುದೇ ಹೆದರಿಕೆ ಇಲ್ಲದೆ ಆ ರೀತಿ ಪಟಾಕಿ ಸಿಡಿಯುತ್ತೇನೆ ಎಂದು ರಾಧಾ ಜಿ.ಹೆಗ್ಡೆ ಹೇಳಿದ್ದಾರೆ.