Pro Kabaddi League: ರೋಚಕ ಹೋರಾಟದಲ್ಲಿ ಗೆದ್ದ ಮುಂಬಾ

Team Udayavani, Nov 6, 2024, 9:30 PM IST

ಹೈದರಾಬಾದ್‌: ಬುಧವಾರದ ಅತ್ಯಂತ ರೋಚಕ ಪ್ರೊ ಕಬಡ್ಡಿ ಮುಖಾಮುಖೀಯಲ್ಲಿ ಯು ಮುಂಬಾ 42-40 ಅಂತರದಿಂದ ಪಾಟ್ನಾ ಪೈರೆಟ್ಸ್‌ಗೆ ಸೋಲುಣಿಸಿತು.
ಕೊನೆಯ ಹಂತದಲ್ಲಿ ಅಜಿತ್‌ ಚವಾಣ್‌ ನಡೆಸಿದ ಆಕರ್ಷಕ ರೈಡ್‌ ಮುಂಬಾ ಮೇಲುಗೈಗೆ ನೆರವಾಯಿತು. ಅಜಿತ್‌ ಸರ್ವಾಧಿಕ 19 ಅಂಕ ಗಳಿಸಿದರು. ಪಾಟ್ನಾ ಪರ ರೈಡರ್‌ ದೇವಾಂಕ್‌ 15 ಅಂಕ ತಂದಿತ್ತರು. ಇದು 7 ಪಂದ್ಯಗಳಲ್ಲಿ ಮುಂಬಾಕ್ಕೆ ಒಲಿದ 4ನೇ ಜಯ. ಪಾಟ್ನಾ 6 ಪಂದ್ಯಗಳಲ್ಲಿ 4ನೇ ಸೋಲನುಭವಿಸಿತು.
ಒಂದಂಕದ ಜಯ!

ತಮಿಳ್‌ ತಲೈವಾಸ್‌-ತೆಲುಗು ಟೈಟಾನ್ಸ್‌ ನಡುವಿನ ಇನ್ನೊಂದು ಪಂದ್ಯ ಕೂಡ ಅತ್ಯಂತ ರೋಚಕವಾಗಿ ಸಾಗಿತು. ಇದನ್ನು ತೆಲುಗು ಟೈಟಾನ್ಸ್‌ ಏಕೈಕ ಅಂಕದಿಂದ (35-34) ಜಯಿಸಿತು.

ತೆಲುಗು ತಂಡದ ನಾಯಕ ಪವನ್‌ ಸೆಹ್ರಾವತ್‌ 12 ಅಂಕ, ರೈಡರ್‌ ಆಶಿಷ್‌ ನರ್ವಾಲ್‌ 9 ಅಂಕಗಳೊಂದಿಗೆ ಉತ್ತಮ ಪ್ರದರ್ಶನ ನೀಡಿದರು. ತಲೈವಾಸ್‌ ಪರ ರೈಡರ್‌ ಸಚಿನ್‌ 17 ಅಂಕ ತಂದಿತ್ತರು.

ಇದು 7 ಪಂದ್ಯಗಳಲ್ಲಿ ಟೈಟಾನ್ಸ್‌ ಸಾಧಿಸಿದ 4ನೇ ಜಯ. ಇನ್ನೊಂದೆಡೆ ತಲೈವಾಸ್‌ 6 ಪಂದ್ಯಗಳಲ್ಲಿ 3ನೇ ಸೋಲನುಭವಿಸಿತು.