SRK: ಶಾರುಖ್ ಭೇಟಿಗೆ 95 ದಿನ ಮನೆ ಹೊರಗೆ ಕಾದು ಕೂತ ಅಭಿಮಾನಿ; ನಟ ಕೊಟ್ಟ ಉಡುಗೊರೆ ಏನು?

Team Udayavani, Nov 7, 2024, 1:05 PM IST

ಮುಂಬಯಿ: ಸಿನಿಮಾ ಮಂದಿಗೆ ಅಪಾರ ಅಭಿಮಾನಿಗಳಿರುತ್ತಾರೆ. ತನ್ನ ನೆಚ್ಚಿನ ನಟ, ನಟಿಯರನ್ನು ಭೇಟಿಯಾಗಿ ಅವರೊಂದಿಗೆ ಕನಿಷ್ಠ ಒಂದು ಫೋಟೋವನ್ನಾದರೂ ಕ್ಲಿಕ್ಕಿಸಿಕೊಳ್ಳಬೇಕೆನ್ನುವ ಆಸೆ ಬಹುತೇಕ ಅಭಿಮಾನಿಗಳಿಗಿರುತ್ತದೆ.

ರೊಮ್ಯಾನ್ಸ್‌ ಕಿಂಗ್‌ ಶಾರುಖ್‌ ಖಾನ್‌ (Shahrukh Khan) ತನ್ನ ಮನೆಯ ಹೊರಗೆ ನಿಂತಿದ್ದ ಅಭಿಮಾನಿಯೊಬ್ಬರನ್ನು ಭೇಟಿ ಆಗಿ ಅವರನ್ನು ಅತ್ಯಂತ ಪ್ರೀತಿಯಿಂದ ಮಾತನಾಡಿಸಿ ಫೋಟೋ ಕ್ಲಿಕ್ಕಿಸಿ ಖುಷಿ ಆಗಿಸಿರುವುದು ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ.

ಜಾರ್ಖಂಡ್ ಮೂಲದ ಶೇರ್ ಮೊಹಮ್ಮದ್ ಎಂಬಾತ ಶಾರುಖ್‌ ಖಾನ್‌ ಅವರ ದೊಡ್ಡ ಅಭಿಮಾನಿ. ಶಾರುಖ್‌ ಅವರನ್ನು ಭೇಟಿ ಆಗಲು ಅವರ ನಿವಾಸ ʼಮನ್ನತ್‌ʼ ಎದುರು ಕಳೆದ 95 ದಿನಗಳಿಂದ ಶೇರ್‌ ಮೊಹಮ್ಮದ್‌ ಕಾಯುತ್ತಿದ್ದರು. ಆದರೆ ಶಾರುಖ್‌ ಖಾನ್‌ ಅವರನ್ನು ಭೇಟಿ ಆಗಲು ಸಾಧ್ಯವಾಗಿರಲಿಲ್ಲ. ನವೆಂಬರ್‌ 2 ರಂದು ಶಾರುಖ್‌ ಖಾನ್‌ ತಮ್ಮ 59ನೇ ಹುಟ್ಟುಹಬ್ಬದ ದಿನದಂದು ಶೇರ್ ಮೊಹಮ್ಮದ್ ನನ್ನು ತಮ್ಮ ಮನೆಯೊಳಗೆ ಕರೆಸಿ ಅವನೊಂದಿಗೆ ಮಾತನಾಡಿ ಊಟ, ಉಪಚಾರವನ್ನು ಮಾಡಿ ಕೈಕುಲುಕಿಸಿ ಫೋಟೋ ಕ್ಲಿಕ್ಕಿಸಿಕೊಂಡಿದ್ದಾರೆ.

ಇದು ಅಭಿಮಾನಿ ಆಗಿರುವ ಶೇರ್‌ ಅವರ ಕನಸು ನನಸಾಗುವಂತೆ ಮಾಡಿದೆ. ಶಾರುಖ್‌ ಬರೀ ಭೇಟಿ ಮಾತ್ರ ಆಗದೆ “ಶಾರುಖ್ ನನಗೆ 10,000 ರೂಪಾಯಿಗಳನ್ನು ನೀಡಿದರು. ಅವರು 4,700 ರೂಪಾಯಿಯ ಪೆಟ್ರೋಲ್‌ ನನ್ನ ವಾಹನಕ್ಕೆ ಹಾಕಿದ್ದಾರೆ” ಎಂದು ವಿಡಿಯೋವೊಂದರಲ್ಲಿ ಶೇರ್‌ ಅವರು ಖುಷಿಯ ಕ್ಷಣವನ್ನು ಹಂಚಿಕೊಂಡಿದ್ದಾರೆ.

 

View this post on Instagram

 

A post shared by Instant Bollywood (@instantbollywood)

“ನನಗೆ ಕುಡಿಯಲು ನೀರು, ತಿನ್ನಲು ಆಹಾರವನ್ನು ಕೊಟ್ಟು ಅತ್ಯಂತ ಗೌರವದಿಂದ ನಡೆಸಿಕೊಂಡರು. ಅವರು ತುಂಬಾ ಒಳ್ಳೆಯವರು” ಎಂದು ಅಭಿಮಾನಿ ಹೇಳಿದ್ದಾರೆ.

ಶಾರುಖ್ ಅವರ ಈ ವ್ಯಕ್ತಿತ್ವವನ್ನು ನೋಡಿ ಫ್ಯಾನ್ಸ್‌ ಅವರನ್ನು ಕೊಂಡಾಡಿದ್ದಾರೆ. ಸದ್ಯ ಅಭಿಮಾನಿಯ ಈ ಫೋಟೋ, ವಿಡಿಯೋ ವೈರಲ್‌ ಆಗುತ್ತಿದೆ.