Pro Kabaddi: ಬೆಂಗಾಲ್‌ಗೆ ಬಾಗಿದ ಬೆಂಗಳೂರು ಬುಲ್ಸ್‌

Team Udayavani, Nov 9, 2024, 10:13 PM IST

ಹೈದರಾಬಾದ್‌: ಶನಿವಾರದ ಬೆಂಗಾಲ್‌ ವಾರಿಯರ್ ಎದುರಿನ ಪ್ರೊ ಕಬಡ್ಡಿ ಪಂದ್ಯದಲ್ಲಿ ನೀರಸ ಪ್ರದರ್ಶನ ನೀಡಿದ ಬೆಂಗಳೂರು ಬುಲ್ಸ್‌ 29-40 ಅಂತರದ ಸೋಲನುಭವಿಸಿತು. ಇದು 8 ಪಂದ್ಯಗಳಲ್ಲಿ ಬುಲ್ಸ್‌ಗೆ ಎದುರಾದ 6ನೇ ಆಘಾತ. ಬೆಂಗಾಲ್‌ 7 ಪಂದ್ಯಗಳಲ್ಲಿ 3ನೇ ಜಯ ಸಾಧಿಸಿತು.

ಆರಂಭದಿಂದಲೇ ಹಿಂದುಳಿದ ಬುಲ್ಸ್‌, ಎದುರಾಳಿಯನ್ನು ಓವರ್‌ಟೇಕ್‌ ಮಾಡುವಲ್ಲಿ ಸಂಪೂರ್ಣ ವಿಫ‌ಲವಾಯಿತು. ಬೆಂಗಾಲ್‌ ಪರ ರೈಡರ್‌ಗಳಾದ ನಿತಿನ್‌ ಕುಮಾರ್‌ (14), ಮಣಿಂದರ್‌ ಸಿಂಗ್‌ (10) ಮಿಂಚಿನ ಆಟವಾಡಿದರು. ಬುಲ್ಸ್‌ ಪರ ರೈಡರ್‌ ಅಕ್ಷಿತ್‌ 11, ಅಜಿಂಕ್ಯ ಪವಾರ್‌ 8 ಅಂಕ ಗಳಿಸಿದರು.

ಟೈಟಾನ್ಸ್‌ಗೆ ಸತತ 4ನೇ ಜಯ:

ಹಾವು ಏಣಿಯಾಟದಂತೆ ಸಾಗಿದ ಮೊದಲ ಪಂದ್ಯದಲ್ಲಿ ತೆಲುಗು ಟೈಟಾನ್ಸ್‌ ಒಂದೇ ಅಂಕದಿಂದ (34-33) ಪುಣೇರಿ ಪಲ್ಟಾನ್‌ಗೆ ಸೋಲುಣಿಸಿತು. ಇದು 5ನೇ ಪಿಕೆಎಲ್‌ ಬಳಿಕ ಟೈಟಾನ್ಸ್‌ ಸಾಧಿಸಿದ ಸತತ 4ನೇ ಗೆಲುವು. ಈ ಕೂಟದ 5ನೇ ಜಯ. ಆಲ್‌ರೌಂಡರ್‌ ವಿಜಯ್‌ ಮಲಿಕ್‌ (13), ನಾಯಕ ಪವನ್‌ ಸೆಹ್ರಾವತ್‌ (12) ಟೈಟಾನ್ಸ್‌ ಪರ ಉತ್ತಮ ಪ್ರದರ್ಶನ ನೀಡಿದರು. ಪುಣೇರಿ ಪರ ರೈಡರ್‌ಗಳಾದ ಪಂಕಜ್‌ ಮೋಹಿತೆ 9, ವಿ. ಅಜಿತ್‌ 6 ಅಂಕ ಗಳಿಸಿದರು. ಇದು 8 ಪಂದ್ಯಗಳಲ್ಲಿ ಪುಣೇರಿಗೆ ಎದುರಾದ ಕೇವಲ 2ನೇ ಸೋಲು.