Pushpa 2: ರೆಡಿಯಾಯ್ತು ಪುಷ್ಪ-2 ಟ್ರೇಲರ್

Team Udayavani, Nov 10, 2024, 3:47 PM IST

ನಟ ಅಲ್ಲು ಅರ್ಜುನ್‌ ಅವರ ಬಹು ನಿರೀಕ್ಷಿತ ಪ್ಯಾನ್‌ ಇಂಡಿಯಾ ಸಿನಿಮಾದಿಂದ ಹೊಸ ಅಪ್ಡೇಟ್‌ ಬಂದಿದೆ. ಚಿತ್ರದ ಟ್ರೇಲರ್‌ ಸಿದ್ಧವಾಗಿದ್ದು, ಅದನ್ನು ಶೀಘ್ರ ಬಿಡುಗಡೆಗೊಳಿಸುವುದಾಗಿ ಚಿತ್ರತಂಡ ಹೇಳಿಕೊಂಡಿದೆ.

ಸದ್ಯ ಪುಷ್ಪ 2 ಚಿತ್ರಕ್ಕೆ ದಕ್ಷಿಣ ಭಾರತದಲ್ಲಷ್ಟೇ ಅಲ್ಲದೇ ಉತ್ತರ ಭಾರತದ ರಾಜ್ಯಗಳಲ್ಲೂ ಕ್ರೇಜ್‌ ಹೆಚ್ಚಾಗಿದೆ. ಅಲ್ಲಿನ ಸಿನಿಪ್ರಿಯರು ಸಹ ಪುಷ್ಪ 2 ಟ್ರೇಲರ್‌ಗೆ ಕಾತುರದಿಂದಕಾಯುತ್ತಿದ್ದಾರೆ. ಚಿತ್ರದ ಬಗ್ಗೆ ವ್ಯಾಪಕ ಪ್ರಚಾರ ಮಾಡಲು ಟ್ರೇಲರ್‌ ರಿಲೀಸ್‌ ಕಾರ್ಯಕ್ರಮವನ್ನು ಮುಂಬೈ ಅಥವಾ ಬಿಹಾರದಲ್ಲಿ ಮಾಡುವ ಯೋಜನೆ ಹಾಕಿಕೊಂಡಿದೆ ಚಿತ್ರತಂಡ.

ನವೆಂಬರ್‌ 15ರಂದು ಟ್ರೇಲರ್‌ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಡಿಸೆಂಬರ್‌ 5ರಂದು ಸಿನಿಮಾ ವಿಶ್ವಾದ್ಯಂತ ಬಿಡುಗಡೆಗೊಳ್ಳಲಿದೆ. ಈಗಾಗಲೇ ಅಮೆರಿಕ, ಯುಕೆ, ಆಸ್ಟ್ರೇಲಿಯಾ ದೇಶಗಳಲ್ಲಿ ಚಿತ್ರದ ಪ್ರಿಮಿಯರ್‌ ಶೋಗಳ ಟಿಕೆಟ್‌ಗಳು ಬಹುತೇಕ ಮಾರಾಟವಾಗಿವೆ.

ಫೋಟೋ ಲೀಕ್‌

ಪುಷ್ಪ 2 ಚಿತ್ರದ ವಿಶೇಷ ಹಾಡೊಂದರಲ್ಲಿ ನಟಿ ಶ್ರೀಲಿಲಾ ಅರ್ಜುನ್‌ ಜೊತೆ ಹೆಜ್ಜೆ ಹಾಕಿದ್ದಾರೆ. ಸದ್ಯ ಈ ಹಾಡಿನ ಕೆಲ ಫೋಟೋಗಳು ಸೊಶಿಯಲ್‌ ಮೀಡಿಯಾದಲ್ಲಿ ಲೀಕ್‌ ಆಗಿವೆ. ಅಲ್ಲು ಅರ್ಜುನ್‌ ಜೊತೆ ಶ್ರೀಲಿಲಾ ನೃತ್ಯ ಮಾಡುತ್ತಿರುವ ಭಂಗಿಗಳು ನೆಟ್ಟಿಗರ ಗಮನ ಸೆಳೆದಿದ್ದು ಶ್ರೀಲೀಲಾ ಲುಕ್‌ಗೆ ಅನೇಕ ಮೆಚ್ಚುಗೆಯ ಕಾಮೆಂಟ್‌ಗಳು ಬರುತ್ತಿವೆ. ಕನ್ನಡದ ನಟಿ ಶ್ರೀಲಿಲಾ ಈಗ ತೆಲುಗುನಲ್ಲೂ ಫ‌ುಲ್‌ ಬಿಝಿಯಾಗಿದ್ದಾರೆ.