Kashmir ಎನ್‌ಕೌಂಟರ್‌: ಸೇನಾಧಿಕಾರಿ ಹುತಾತ್ಮ

Team Udayavani, Nov 11, 2024, 12:50 AM IST

ಜಮ್ಮು: ಜಮ್ಮು-ಕಾಶ್ಮೀರದ ಕಿಶ್ತ್ವಾರ್‌ ಜಿಲ್ಲೆಯಲ್ಲಿ ಉಗ್ರರ ಜತೆಗಿನ ಗುಂಡಿನ ಕಾಳಗದಲ್ಲಿ ಒಬ್ಬ ಕಿರಿಯ ಸೇನಾ­ಧಿಕಾರಿ ಹುತಾತ್ಮರಾಗಿದ್ದು, ಮೂವರು ಯೋಧರು ಗಾಯ­ಗೊಂಡ ಘಟನೆ ರವಿವಾರ ನಡೆದಿದೆ. ಅವರನ್ನು ನಯೀಬ್‌ ಸುಬೇದಾರ್‌ ರಾಕೇಶ್‌ ಕುಮಾರ್‌ ಎಂದು ಗುರುತಿಸಲಾಗಿದೆ.

ಇತ್ತೀಚೆಗೆ ಹಳ್ಳಿಯ ರಕ್ಷಣೆಯ ಇಬ್ಬರ ಕಾವಲುಗಾರರ ಹತ್ಯೆ ನಡೆದ ಬೆನ್ನಲ್ಲೇ ಕಿಶ್ತ್ವಾರ್‌ ನ ಭಾರತ್‌ ರಿಡ್ಜ್ ಪ್ರದೇಶದಲ್ಲಿ ಉಗ್ರರ ವಿರುದ್ಧದ ಜಂಟಿ ಕಾರ್ಯಾ­ಚರಣೆಯಲ್ಲಿ ರಾಕೇಶ್‌ ಕುಮಾರ್‌ ತೊಡಗಿಸಿ­ಕೊಂಡಿದ್ದರು. ಝಬರ್‌ವಾನ್‌ ಡಟ್ಟಡವಿ ಪ್ರದೇಶದಲ್ಲಿ 20 ವರ್ಷಗಳಲ್ಲಿ ಮೊದಲ ಬಾರಿಗೆ ಉಗ್ರರು ಮತ್ತು ಭದ್ರತಾ ಪಡೆಗಳ ನಡುವೆ ನೇರ ಗುಂಡಿನ ಚಕಮಕಿ ನಡೆದಿದೆ. ಹಳ್ಳಿಯ ರಕ್ಷಣ ಕಾವಲುಗಾರರಾದ ನಜೀರ್‌ ಅಹ್ಮದ್‌, ಕುಲದೀಪ್‌ ಕುಮಾರ್‌ ಶವಗಳು ಪತ್ತೆಯಾದ ಸ್ಥಳದಿಂದ ಕೆಲವು ಕಿಲೋಮೀಟರ್‌ ದೂರದಲ್ಲಿರುವ ಕೇಶ್ವಾನ್‌ ಅರಣ್ಯದಲ್ಲಿ ಸೇನೆ ಹಾಗೂ ಪೋಲೀಸರ ಜಂಟಿ ಶೋಧ ತಂಡಗಳು ಮತ್ತು ಉಗ್ರರ ನಡುವೆ ರವಿವಾರ ಗುಂಡಿನ ಚಕಮಕಿ ನಡೆಯಿತು. ಈ ವೇಳೆ ಮೂವರು ಯೋಧರು ಗಾಯಗೊಂಡಿದ್ದಾರೆ. ಮೂರರಿಂದ 4 ಉಗ್ರರಿದ್ದು ಹುಡುಕಾಟಕ್ಕ ತೀವ್ರ ಶೋಧ ಕಾರ್ಯಾಚರಣೆ ಕೈಗೊಳ್ಳಲಾಗಿದೆ ಎಂದು ಸೇನಾಧಿಕಾರಿಗಳು ತಿಳಿಸಿದ್ದಾರೆ.