Ranchi: ವಕ್ಫ್ ಮಂಡಳಿಯು ಕರ್ನಾಟಕದಲ್ಲಿ ದೇಗುಲ, ರೈತರ ಭೂಮಿಯ ಕಸಿದಿದೆ: ಅಮಿತ್‌ ಶಾ

Team Udayavani, Nov 12, 2024, 9:55 PM IST

ರಾಂಚಿ: ವಕ್ಫ್ ಮಂಡಳಿ ಕರ್ನಾಟಕದಲ್ಲಿನ ದೇವಾಲಯ, ರೈತರು, ಗ್ರಾಮಸ್ಥರ ಹಾಗೂ ಮತ್ತಿತರರ ಭೂಮಿಯನ್ನು ಕಬಳಿಸಿದೆ ಎಂದು ಆರೋಪಿಸಿ, ಈಗ ಈ ಬೋರ್ಡ್‌ಗೆ ಹಾಗೂ ಕಾಯ್ದೆಗೆ ತಿದ್ದುಪಡಿ ಮಾಡುವ ಸಮಯವೂ ಬಂದಿದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಹೇಳಿದ್ದಾರೆ.

ಜಾರ್ಖಂಡ್‌ನ‌ ಬಾಘಮಾರಾದಲ್ಲಿ ಚುನಾವಣಾ ರ‍್ಯಾಲಿ ಉದ್ದೇಶಿಸಿ ಮಾತನಾಡಿ, “ಭೂಮಿಯನ್ನು ಕಬಳಿಸುವುದು ವಕ್ಫ್ ಮಂಡಳಿಗೆ ಅಭ್ಯಾಸವಾಗಿದೆ. ಕರ್ನಾಟಕದಲ್ಲಿ ದೇವಾಲಯದ ಭೂಮಿ, ರೈತರ ಕೃಷಿ ಭೂಮಿ, ಗ್ರಾಮಸ್ಥರ ಭೂಮಿಯ ವಕ್ಫ್ ಮಂಡಳಿ ವಶಪಡಿಸಿಕೊಂಡಿದೆ. ಹೀಗಿದ್ದಾಗ ವಕ್ಫ್ ಮಂಡಳಿಯಲ್ಲಿ ಬದಲಾವಣೆ ಆಗಬೇಕೇ? ಬೇಡವೇ ನೀವೇ ಹೇಳಿ ಎಂದು ನೆರೆದಿದ್ದ ಜನರ ಪ್ರಶ್ನಿಸಿದರು.

ರಾಹುಲ್‌ ಬಾಬು (ವಿಪಕ್ಷ ನಾಯಕ ರಾಹುಲ್‌ ಗಾಂಧಿ), ಹೇಮಂತ್‌ ಬಾಬು(ಜಾರ್ಖಂಡ್‌ ಸಿಎಂ ಹೇಮಂತ್‌ ಸೊರೇನ್‌) ಇದನ್ನು ವಿರೋಧಿಸುತ್ತಾರೆ. ಅವರೆಲ್ಲರೂ ವಿರೋಧಿಸುತ್ತಲೇ ಇರಲಿ, ವಕ್ಫ್ ಕಾಯ್ದೆಗೆ ತಿದ್ದುಪಡಿ ತರುವ ಮಸೂದೆಯನ್ನು ಬಿಜೆಪಿಯು ಅಂಗೀಕರಿಸಲಿದೆ. ನಮ್ಮನ್ನು ಯಾರೂ ತಡೆಯಲಾಗದು’ ಎಂದು ಹೇಳಿದ್ದಾರೆ.

ಯುಸಿಸಿ ಜಾರಿ ತಡೆ ಸಾಧ್ಯವಿಲ್ಲ: 
ಜಾರ್ಖಂಡ್‌ನಲ್ಲಿ ಜೆಎಂಎಂ ನೇತೃತ್ವದ ಮೈತ್ರಿ ಪಕ್ಷಗಳು ಅಕ್ರಮ ವಲಸಿಗರ ವೋಟ್‌ ಬ್ಯಾಂಕ್‌ ಆಗಿಸಿದೆ. ಬಿಜೆಪಿ ಅಧಿಕಾರಕ್ಕೆ ಬಂದರೆ ಅಕ್ರಮ ವಲಸಿಗರ ಮತ್ತೆ ಬಾಂಗ್ಲಾದೇಶಕ್ಕೆ ಕಳಿಸುವ ವ್ಯವಸ್ಥೆ ಮಾಡುತ್ತೇವೆ. ಯಾರು ಕೂಡ ಏಕರೂಪ ನಾಗರಿಕ ಸಂಹಿತೆ (ಯುಸಿಸಿ) ಜಾರಿ ತಡೆಯಲು ಸಾಧ್ಯವಿಲ್ಲ. ಜಾರ್ಖಂಡ್‌ಗೆ ಬರುವ ವಲಸಿಗರನ್ನೂ ತಡೆಯಲಾಗುವುದು.  ಜೆಎಂಎಂ ಹಾಗೂ ಕಾಂಗ್ರೆಸ್‌ನ ರಾಹುಲ್‌ ಗಾಂಧಿ ಜಾತಿ ಆಧಾರದಲ್ಲಿ ದೇಶವನ್ನು ವಿಭಜಿಸುತ್ತಿದೆ. ಆದರೆ ನರೇಂದ್ರ ಮೋದಿಯವರು ಬಡವರು, ರೈತರು, ಯುವಕರು ಹಾಗೂ ಮಹಿಳೆಯರ, ಜನರ ಕಲ್ಯಾಣಕ್ಕಾಗಿ ಶ್ರಮಿಸುತ್ತಿದೆ ಎಂದರು.