Forest: ರಿಲೀಸ್‌ ಅಖಾಡಕ್ಕೆ ಚಿಕ್ಕಣ್ಣನ ʼಫಾರೆಸ್ಟ್ʼ

Team Udayavani, Nov 17, 2024, 3:34 PM IST

“ಫಾರೆಸ್ಟ್‌ ‘ ಹೀಗೊಂದು ಸಿನಿಮಾ ಬರುತ್ತಿರುವುದರ ಬಗ್ಗೆ ನೀವು ಕೇಳಿರಬಹುದು. ಈಗಾಗಲೇ ಪೋಸ್ಟರ್‌, ಹಾಡು, ಟೀಸರ್‌ನಿಂದ ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸಿರುವ ಚಿತ್ರವಿದು. ಎನ್‌.ಎಂ.ಕೆ. ಬ್ಯಾನರ್‌ನಡಿ ಎನ್‌.ಎಂ. ಕಾಂತರಾಜ್‌ ನಿರ್ಮಿಸುತ್ತಿರುವ “ಫಾರೆಸ್ಟ್‌’ ಸಿನಿಮಾ ಸದ್ಯ ಸೆನ್ಸಾರ್‌ ಮಂಡಳಿಯ ಬಾಗಿಲು ತಟ್ಟಿದೆ. ಶೀಘ್ರ ಸಿನಿಮಾವನ್ನು ತೆರೆಗೆ ತರಲು ಸಜ್ಜಾಗುತ್ತಿದೆ ಚಿತ್ರತಂಡ.

ಕಾಡಿನಲ್ಲಿ ನಡೆಯುವ ಸಾಹಸ ಹಾಗೂ ಕಾಮಿಡಿ ಕಥಾಹಂದರ ಹೊಂದಿರುವ “ಫಾರೆಸ್ಟ್‌’ ಸಿನಿಮಾಗ ಚಂದ್ರಮೋಹನ್‌ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ನಟ ಚಿಕ್ಕಣ್ಣ, ಅನೀಶ್‌ ತೇಜೇಶ್ವರ್‌, ಗುರುನಂದನ್‌ ಹಾಗೂ ರಂಗಾಯಣ ರಘು, ಶರಣ್ಯ ಶೆಟ್ಟಿ, ಅರ್ಚನಾ ಕೊಟ್ಟಿಗೆ, ಅವಿನಾಶ್‌, ಪ್ರಕಾಶ್‌ ತುಮ್ಮಿನಾಡು ಮುಂತಾದ ಕಲಾವಿದರು ಚಿತ್ರದಲ್ಲಿ ನಟಿಸಿದ್ದಾರೆ.

ಈಗಾಗಲೇ ಚಿತ್ರದ ಹಾಡು ಹಾಗೂ ಟೀಸರ್‌ ಪ್ರೇಕ್ಷಕರ ಗಮನ ಸೆಳೆದಿವೆ. ಚಿತ್ರಕ್ಕೆ ಸತ್ಯ ಶೌರ್ಯಸಾಗರ್‌ ಸಂಭಾಷನೆ ಹಾಗೂ ಚಂದ್ರಮೋಹನ್‌ ಕಥೆ, ಚಿತ್ರಕಥೆ ರಚಿಸಿದ್ದಾರೆ. ಧರ್ಮವಿಶ್‌ ಅವರ ಸಂಗೀತ ನಿರ್ದೇಶನ, ಆನಂದ್‌ ರಾಜಾ ವಿಕ್ರಮ್‌ ಹಿನ್ನೆಲೆ ಸಂಗೀತ, ರವಿಕುಮಾರ್‌ ಅವರ ಛಾಯಾಗ್ರಹಣ, ಅರ್ಜುನ್‌ ಕಿಟ್ಟು ಸಂಕಲನ, ಡಾ. ರವಿವರ್ಮ ಅವರ ಸಾಹಸ ನಿರ್ದೇಶನ ಈ ಚಿತ್ರಕ್ಕಿದೆ. ಬೆಂಗಳೂರು, ಮಡಿಕೇರಿ, ಚಿಕ್ಕಮಗಳೂರು, ಸಂಪಾಜೆ ಫಾರೆಸ್ಟ್ ಹಾಗೂ ಮಲೆ ಮಾದೇಶ್ವರ ಬೆಟ್ಟದ ಸುತ್ತಮುತ್ತ ಚಿತ್ರೀಕರಣ ನಡೆದಿದೆ.