Railways: “ವಂದೇ ಭಾರತ್‌’ ರೈಲಿನ ಸಾಂಬಾರಲ್ಲಿ ಹರಿದಾಡಿದ ಕೀಟ

Team Udayavani, Nov 19, 2024, 7:05 AM IST

ಚೆನ್ನೈ: ತಿರುನೆಲ್ವೇಲಿಯಿಂದ ಚೆನ್ನೈಗೆ ಪ್ರಯಾಣಿಸುತ್ತಿದ್ದ ವಂದೇ ಭಾರತ್‌ ರೈಲಿನಲ್ಲಿ ಪ್ರಯಾಣಿಕರೊಬ್ಬರಿಗೆ ನೀಡಲಾಗಿದ್ದ ಸಾಂಬಾರ್‌ನಲ್ಲಿ ಹರಿದಾಡುತ್ತಿರುವ ಕೀಟಗಳು ಪತ್ತೆಯಾಗಿದೆ.

ಇದನ್ನವರು ವಿಡಿಯೋ ಮಾಡಿ ಹರಿಬಿಟ್ಟಿದ್ದು, ವೈರಲ್‌ ಆಗಿದೆ. ಅಲ್ಲದೆ, ಈ ವಿಡಿಯೋವನ್ನು ಕಾಂಗ್ರೆಸ್‌ ಸಂಸದ ಮಾಣಿಕಂ ಠಾಗೋರ್‌ ಸಹ ಹಂಚಿಕೊಂಡು, ಆಹಾರ ಸುರಕ್ಷತೆ ಕಾಪಾಡಲು ಯಾವ ಕ್ರಮ ಕೈಗೊಂಡಿದ್ದೀರಿ ಎಂದು ರೈಲ್ವೆ ಸಚಿವ ಅಶ್ವಿ‌ನ್‌ ವೈಷ್ಣವ್‌ರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

ರೈಲಿನ ಆಹಾರದ ಗುಣಮಟ್ಟದ ಬಗ್ಗೆ ಎಲ್ಲೆಡೆ ಆಕ್ರೋಶ ವ್ಯಕ್ತವಾಗಿವೆ. ಸಾಂಬಾರ್‌ನಲ್ಲಿ ಕಪ್ಪು ಬಣ್ಣದ ಕೀಟಗಳು ತೇಲುತ್ತಿರುವುದನ್ನು ವಿಡಿಯೋ ಮಾಡಲಾಗಿದೆ. ಈ ವಿಷಯ ಗೊತ್ತಾಗುತ್ತಿದ್ದಂತೆ ತನಿಖೆ ನಡೆಸಲಾಗಿದ್ದು, ಕೀಟಗಳು ಸಾಂಬಾರ್‌ನಲ್ಲಿರಲಿಲ್ಲ. ಬದಲಾಗಿ ಆಹಾರ ನೀಡಲಾದ ಪೊಟ್ಟಣದಲ್ಲಿತ್ತು. ಅದರಿಂದ ಸಾಂಬಾರಿಗೆ ಸೇರಿಕೊಂಡಿದೆ ಎಂದು ರೈಲ್ವೆ ಇಲಾಖೆ ಸ್ಪಷ್ಟನೆ ನೀಡಿದೆ. ಅಲ್ಲದೆ, ಕ್ಯಾಟರಿಂಗ್‌ ಸರ್ವಿಸ್‌ನವರಿಗೆ 50,000ರೂ. ದಂಡವನ್ನೂ ವಿಧಿಸಿದ್ದಾಗಿ ಹೇಳಿದೆ.