Actor Arrested: ಸ್ಯಾಂಡಲ್‌ವುಡ್ ನಿರ್ದೇಶಕನ ಮೇಲೆ ಗುಂಡು ಹಾರಿಸಿ ಹತ್ಯೆಗೆ ಯತ್ನ; ನಟ ಬಂಧನ

Team Udayavani, Nov 19, 2024, 12:39 PM IST

ಬೆಂಗಳೂರು: ಸಿನಿಮಾ ನಿರ್ದೇಶಕನ (Film Director) ಮೇಲೆ ಗುಂಡು ಹಾರಿಸಿ ಕೊಲೆಗೆ ಯತ್ನಿಸಿದ ಆರೋಪದ ಮೇಲೆ ನಟ ತಾಂಡವ್‌ ರಾಮ್‌ (Thandav Ram) ಅವರನ್ನು ಪೊಲೀಸರು ಬಂಧಿಸಿದ್ದಾರೆ.

ಜೋಡಿಹಕ್ಕಿ ಸೀರಿಯಲ್‌ (Jodi Hakki Serial) ಮೂಲಕ ಕಿರುತೆರೆಯಲ್ಲಿ ಮಿಂಚಿರುವ ತಾಂಡವ್‌ ರಾಮ್‌ ನಿರ್ದೇಶಕ ಭರತ್‌‌ ಅವರ ಮೇಲೆ ನಟ ಗುಂಡು ಹಾರಿಸಿ ಕೊಲೆಗೆ ಯತ್ನಿಸಿದ್ದಾರೆ ಎನ್ನುವ ಮಾಹಿತಿ ಲಭ್ಯವಾಗಿದೆ.

ಏನಿದು ಪ್ರಕರಣ?: ಕನ್ನಡದಲ್ಲಿ ʼಮುಗಿಲ್ ಪೇಟೆʼ ಎನ್ನುವ ಸಿನಿಮಾವನ್ನು ಮಾಡಿರುವ ನಿರ್ದೇಶಕ ಭರತ್‌‌ ನಾವುಂದ (Bharath Navunda) ಅವರ ಜತೆ  ತಾಂಡವ್‌ ರಾಮ್‌ ಅವರು ಸಿನಿಮಾವನ್ನು ಅರ್ಧಕ್ಕೆ ನಿಲ್ಲಿಸಿದ್ದ ಕಾರಣಕ್ಕೆ ಜಗಳ ಮಾಡಿದ್ದಾರೆ ಎನ್ನಲಾಗಿದೆ. ಮಾತಿನ ನಡುವೆ ತಾಂಡವ್‌ ರಾಮ್‌ ತಮ್ಮ ಲೈಸೆನ್ಸ್‌ ಗನ್‌ನಿಂದ ಒಂದು ಸುತ್ತ ಗುಂಡು ಹಾರಿಸಿದ್ದಾರೆ ಎನ್ನಲಾಗಿದೆ.

ನಿರ್ದೇಶಕನನ್ನು ಬೆದರಿಸಿ ಕೊಲೆಗೆ ಯತ್ನಿಸಿದ ಆರೋಪದ ಮೇಲೆ ತಾಂಡವ್‌ ರಾಮ್‌ ವಿರುದ್ಧ ದೂರು ದಾಖಲಿಸಿಕೊಂಡು ಚಂದ್ರ ಲೇಔಟ್‌ ಠಾಣಾ ಪೊಲೀಸರು ಅವರನ್ನು ಬಂಧಿಸಿದ್ದಾರೆ ಎಂದು ವರದಿಯಾಗಿದೆ.

ಸೋಮವಾರ (ನ.18ರಂದು) ಈ ಘಟನೆ ನಡೆದಿದೆ. ಲೈಸೆನ್ಸ್‌ ಗನ್‌ ಸೀಜ್‌ ಮಾಡಲಾಗಿದೆ. ಪ್ರಾಥಮಿಕ ಮಾಹಿತಿ ಪ್ರಕಾರ ಇದು ಉದ್ದೇಶ ಪೂರ್ವಕವಾಗಿವೆಸಗಿರುವ ಕೃತ್ಯವೆಂದು ಗೊತ್ತಾಗಿದೆ. ಆರೋಪಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸ್ ಕಮೀಷನರ್ ಬಿ. ದಯಾನಂದ್ ಪ್ರಕರಣ ಸಂಬಂಧ ಹೇಳಿದ್ದಾರೆ.

ರವಿಚಂದ್ರನ್‌ ಅವರ ಹಿರಿ ಮಗ ಮನೋರಂಜನ್‌ ನಾಯಕನಾಗಿ ನಟಿಸಿದ್ದ ಮುಗಿಲ್‌ಪೇಟೆ ಸಿನಿಮಾವನ್ನು ಭರತ್‌ ಎಸ್‌ ನಾವುಂದ ನಿರ್ದೇಶನ ಮಾಡಿದ್ದಾರೆ. ಆದಾದ ಬಳಿಕ ಅಡಚಣೆಗಾಗಿ ಕ್ಷಮಿಸಿ’ಎನ್ನುವ ಸಿನಿಮಾವನ್ನು ಮಾಡಿದ್ದಾರೆ.